我個隔離位真係好煩: 33: 老豆
我的沉淪，從二月十四日開始，到三月十二日結束，整整度過了二十七天。
我下定決心要醒來，其實是因為一晚睡不着，而偶然聽見的對話。
「喂爸爸，知唔知個衰仔而家點。」
「唔洗講，狀態好差。」
「佢係咪......同女朋友散咗？」
「嗯，睇佢個樣，似係有事發生。」
「其實都差唔多過咗成個月啦，而家我地應該係時候要諗下點樣氹番佢。」
「唉......男人嘢，我嚟啦。」
「就咁話，希望以前嘅佢可以番嚟。」
「嗯。」
我聽到對話之後的一天，也就是三月十二日，以所剩無幾的意志，勉強應付了數學測驗，再吃過晚飯之後，一整個晚上都在海浪聲的陪伴下度過。
晚上，十時三十分。在人煙稀少的青衣海旁裏，一個穿着格仔裇衫牛仔褲的男人，悄然無聲地在我身旁出現。
「嘩老豆，嚇死人咩。」我真的被驚嚇到了，整個人差點彈起來。他沒有說一句，遞了一罐「可能係世界上最滑嘅啤酒」我，開了蓋的，然後自己再開了一罐。
我伸出握着罐子的手，跟他碰杯，沒說話。
隨着父親嗝氣，寧靜的空氣再度出現聲音。
「知唔知你老豆我有幾耐冇飲過酒。」他拿起半滿的啤酒罐，「由你出世嗰日起計，17年。你都算好嘢啦，搞到我破戒。」
「對唔住老豆，搞到您無啦啦要飲酒。」
「唔緊要啦，我都好耐冇飲，間唔中飲下都幾過癮。」
「話時話老豆，我好似未夠秤喎。」我同樣喝了半罐，然後發現問題。
「有老豆照住，驚咩啫？」他笑了笑，「想當年我激嬲你老母嘅時候，得16歲，當時係我老豆你死鬼阿爺教我飲酒。」原來，他在16歲或更早，已經和母親結緣。
「老豆，如果我做錯嘢激到個女仔好嬲，應該點。」我對着那名比我還矮的中年男子，不知為何，自然就能坦白一切。
「跪玻璃，跪keyboard，扮死狗認低威，有幾多次做幾多次，做到佢原諒你為止。」
「老豆啊，認真啲啦，您又唔諗下，煩住人地咁多次，會搞到人地憎咗我嘅。」我沒好氣地回應他的風趣幽默。
「咁個女仔當初夠日日夜夜煩住你啦，你會唔會憎咗佢吖？唔會吖嘛！」
一言驚醒夢中人。
「如果你心入面相信佢仲愛緊你，咁樣佢一定唔會嫌你煩。唔好驚講咗出嚟之後會點，因為個結果你一定唔會100%估中。你可以做嘅，就係揀講定唔講。你係着緊人嘅，就要出聲，唔好收收埋。就算到時佢真係唔要你，你都可以嚟搵我陪你劈酒。有啲嘢，如果唔開口，分分鐘就一世㗎啦。」
「多謝您呀老豆......」在酒精的催化下，我忍不住積壓已久的眼淚，一次過全部爆發出來。
「兩仔爺嚟㗎嘛，講呢啲。」他走過來，熊抱我的身軀。好像自從幼稚園畢業以來，便沒有這樣過。
好溫暖。好似太陽咁溫暖。好似我個女朋友仔咁溫暖。
我好想好想再攬下佢。我好掛住佢喺我身邊嘅日子。
「第時我老咗，靠你養我㗎嘛。如果而家個仔搞成咁，我將來點算好。」父親的話令我破涕為笑。
「放心啦老豆，呢層唔洗您講我都會。」在沉淪二十七天過後，我終於迎來一點點曙光。
對住自己最重視嘅人，就應該要有坦白從寬嘅勇氣。
這是我父親在小時候教導我的。經過多年歲月的沖刷和負面情緒的衝擊，似乎，我忘了這個簡單直白，同時又難以實行的道理。
「唔~原來啤酒真係幾好飲。」父親在我的旁邊繼續喝着啤酒，雙手放在欄杆上。
「您年紀大啦，以後唔好成日飲ok？」
「阿死仔，你老豆我都係四十幾啫，洗唔洗咁講嘢。」
「對唔住老豆，我錯了。」
「我睇死你終有一日會走嚟搵我陪你飲。」他奸笑看着我。
「好啦唔好笑我啦老豆......」
「仔，我明你有幾hurt，因為當年嘅我都一樣。不過你唔痛過，係唔會明，係唔會成長。呢個世界呢，除咗女朋友之外，真係仲有好多嘢。」
「嗯，明㗎喇。」我拿起酒罐，跟他碰杯，然後他一飲而盡，再對着大海盡情嗝氣。
涼風陣陣的海旁，我和父親喝酒談心。
「我番歸先，唔好搞到咁夜。」父親拍了拍我的右肩，然後轉身回家。
「拜拜老豆。」「嗯，拜拜。」
我就看着那離去的背影，第一次由心而發地覺得，原來他也是一個威風凜凜的男人嘛。
當晚，我喝完了剩下的半罐啤酒，然後在海旁待到凌晨兩點，才帶着些微疼痛的頭回家。
我身邊，還有最着緊我的父母，對待我的時候平平淡淡，但比起任何人更愛我。
~
隔天早上，當我打算回校跟阿芷認錯的時候，驚覺自己的頭很想裂開，使我痛不欲生。
我喺海旁，冇着褸......
我舉步維艱地拿起探熱針。38.5度。
幸好他們今天放假。母親給我煮了碗白粥，父親替我向學校請假。
「係咪衰呢？凍親喇。」「病咗要乖乖地食粥食藥，瞓多啲。」他們你一言我一句的。
「得啦得啦，知㗎啦。」我用沙啞的嗓子回答了他們，然後便緩緩地吃着白粥，白粥的溫暖，流進我的心窩，一邊吃，我的眼淚便控制不住。
老豆，阿媽，多謝您地今世人做我父母。
吃過早餐，嗑了幾顆藥，我便睡去了。
到我起來的時候，已經是中午了，我的身體好轉了不少。我從床上爬起來，卻看不見他們的身影。只見枱面有一張紙。
「仔，
爸爸同我呢，已經決定咗今日要嚟一場快閃拍拖外加staycation喇。今晚我地二人世界，就唔番屋企㗎啦。我諗你瞓完之後應該會好番好多，所以今晚就難為你自己搞掂啦。Take care。
媽子」
所以我父母就在我病重的時候出外享樂。
我能收回上述的感動嗎。
曾經不下廚的我輕而易舉地煮了個餐蛋麪，吃飽過後便回到房間。
記得當初也是她，讓我漸漸學會下廚。
我躺在床上，想了想那對快閃拍拖的老夫老妻。
這二十七天，他們應該也辛苦了。
然後，我便在寂靜無人的屋內睡去。