執屍執到女殭屍: 十三．蛇怪

消滅咗螳螂怪嘅Helena穿過間房另一邊嘅門，繼續向前行。都算好彩，Helena一路都無再遇見敵人。再行一陣，佢發現佢原本所在嘅隧道，係同另一條隧道二合為一，然後再一齊繼續向前，好似一個倒轉嘅Y字咁。當Helena考慮緊應該轉頭探索另一條隧道定係繼續向前走，前面嘅通道傳嚟戰鬥嘅聲音，仲有女仔嘅慘叫聲。
 
Helena知道應該係其他隊員同殭屍戰鬥緊，即刻向住戰鬥聲跑過去。喺一個轉彎位之後有一間石室，佢見到Bella一行人同一隻人身蛇尾嘅變異殭屍戰鬥緊，似乎就係K小隊見到嘅果一隻。戰況並唔樂觀，Bella身體多處受傷，另外N小隊幾個戰鬥員已經瞓咗喺地下，剩低Tina喺Bella身後面，而Jimmy就喺度左閃右避。
 
話說Bella、Jimmy同N小隊跌咗入中間嘅隧道，亦只有好似其他人咁向前探索。佢哋一路上遇到嘅都係普通殭屍，有 Bella同N小隊合作根本不成問題，三兩下手勢就消滅晒，所以佢哋比Helena更早到逹兩條隧道匯合嘅地方，而且選擇咗向前行。當佢哋入到呢間石室嘅時候，就遇到呢隻蛇怪同佢展開戰鬥。
 
Bella佢哋包圍蛇怪，從前後左右各個方向攻擊，但係全部都俾蛇怪用長長嘅蛇尾擋開。佢全條尾都有非常堅硬嘅鱗片，武器嘅攻擊都無作用。見到形勢唔對路，Bella就轉用精彈攻擊蛇怪。蛇怪依然係用蛇尾抵擋，咁亦正中Bella下懷。Bella見到蛇尾中彈部分嘅鱗片快速脫落，一於再接再厲，全部精彈送晒俾佢，地上面嘅鱗片越嚟越多。蛇怪突然趴落地下，然後用蛇尾緊緊咁包住自己嘅身體，變成一個蛇餅。幾個N 小隊嘅成員走近諗住追擊弱化咗嘅蛇怪，但係Bella見蛇怪動作無變慢，覺得事有蹊蹺，大叫：「小心！」
 
N小隊嘅成員仲未反應得切，突然蛇尾開始旋轉鬆開，好似壓實咗嘅彈簧彈返開一樣，旋轉橫掃四周，轉咗幾秒咁耐。N小隊嘅成員俾蛇尾打到彈開撞晒埋牆，只係得返Tina因為企為比較遠，受傷無咁重可以勉強企得返起身。蛇怪中咗咁多精彈，但係完全睇唔到有弱化嘅跡象。原來蛇怪每次中彈之前，就先將鱗片快速剝落，然後生出新嘅鱗片，好似啲蛇脫皮一樣。所以精彈打中嘅鱗片，已經唔係蛇怪身體一部份，打中亦對蛇怪無影響。
 


蛇怪迴旋攻擊完之後，好似蛇髮女妖咁喺頭度生出四條蛇，又向剩低嘅Bella、Tina同Jimmy進攻。Tina俾蛇尾重擊之後已經無作戰能力，Bella喺佢前面頂住，的碓有精英戰鬥員嘅本色。Bella不斷用鐮刀斬斷蛇頭，但係蛇頭無幾耐就會生返出嚟，佢為咗保護Tina又無得避開，慢慢身上都累積咗唔少傷痕。Jimmy一邊努力咁左閃右避，一邊都嘗試攻擊啲蛇。但係佢把彎刀嘅威力太弱，對住呢幾條蛇只可以輕輕咁刮花佢哋表面，根本傷唔到分毫。
 
就喺佢哋苦苦頑抗嘅時候，Helena亦嚟到呢間房，帶嚟一線轉機。Helena同Bella簡單對答咗幾句，交代吓大家嘅情況，然後就夾手夾腳消滅啲蛇。雖然斬完都係會再生，但係中間都爭取到一啲空檔，可以去攻擊蛇怪嘅本體。Helena同Bella嘅攻擊俾蛇怪嘅尾擋開，而生出嘅蛇又俾佢哋不斷斬斷，形成一個僵持不下嘅形勢。突然蛇怪又再捲成蛇餅，睇嚟又想重施固技。Bella大聲提醒Helena要跳高避開，自己亦都一躍而起。好在Tina同Jimmy喺攻擊距離之外，應該唔會波及佢哋。
 
當蛇尾開始旋轉攻擊，Bella就趁呢個蛇怪無辦法用蛇尾擋嘅空檔攻擊蛇怪。空中嘅Bella同佢把鐮刀開始向前旋轉，駛出大風車鐮刀斬向蛇怪。蛇怪舉起雙手想用嚟擋住鐮刀，但係都俾鐮刀斬斷埋。鐮刀由蛇怪左肩一路斬落去，只差一兩厘米就斬開心臟。就係差果少少，鐮刀嘅柄俾由左右兩邊攻入嘅兩條蛇纏住，停咗喺空中。另外兩條蛇就撞向Bella嘅身體，令佢握唔住鐮刀，成個人向後飛咗出去，大風車鐮刀嘅攻擊亦功敗垂成。
 
但係蛇怪要安心亦太早。避開咗蛇尾攻擊嘅Helena已經跳到嚟鐮刀旁邊，用斧頭斬斷晒啲蛇，然後高舉雙手，準備要打落鐮刀度，送埋蛇怪果一兩厘米嘅最後一程。蛇怪嘅蛇尾未嚟得切防守，雙手同四條蛇都已經被斬斷，無咁快再生到，仲有乜嘢可以阻止到Helena？當Helena確信可以消滅蛇怪嘅時候，蛇怪嘅頸好似長頸鬼咁伸長，個頭伸嚟到Helena面前，咬住咗Helena嘅雙手。將佢吊喺空中，正式瓦解咗Helena同Bella嘅呢一輪攻擊。
 
再生出雙手同四條蛇嘅蛇怪怒不可遏，拔出鐮刀之後，四條蛇咬實Helena嘅手腳，雙拳係咁毆打被吊喺空中無辦法還手嘅Helena。另一邊嘅Bella，就不停受到蛇尾嘅重擊。無咗鐮刀喺手，Bella根本扺擋唔到蛇尾嘅攻擊，已經被打到奄奄一息。Helena嘅情況比Bella更差，除咗受到蛇怪拳頭嘅攻擊，佢嘅意識亦逐漸模糊。女性俾殭屍咬傷之後，幾分鐘之內會失去意識。之後經過一段因人而異嘅時間，就會殭屍化。Helena知道自己就快要失去意識，之後更加會變成殭屍。即使咬呀切齒都好，都已經無能力扭轉。
 


睇到Helena俾蛇怪咬到同毆打，Jimmy唔知邊度嚟嘅勇氣，竟然衝向蛇怪。佢無期望可以打敗蛇怪，只係希望可以分散蛇怪嘅注意力，令Helena有機會脫身。蛇怪見Jimmy喺戰鬥當中根本無威脅，都懶得大費周章對付佢，只係其中一條蛇放開Helena，轉去攻擊Jimmy。Jimmy知道自己凶多吉少，但係都要盡力引開蛇怪嘅注意力，揮刀斬向蛇頭。Jimmy而家先發現彎刀嘅刀身發出淡淡嘅紅光。出乎意料之外，彎刀嘅威力同之前簡直天淵之別，蛇頭應聲俾Jimmy切成兩半。Jimmy自己都嚇咗一跳，跟住諗咗一下，又似乎明白咗當中嘅玄機，而刀身嘅紅光就變得更強。
 
蛇怪見蛇頭俾Jimmy斬開，大吃一驚之餘，放開咬住Helena嘅蛇，全部轉去攻擊Jimmy。由蛇咬之中解放嘅Helena身體跌咗落地下，已經無晒反應。面對三條蛇嘅攻擊，Jimmy好似上咗身咁，彎刀連斬，蛇頭又全部被斬斷。最後連蛇怪用盡全力打向Jimmy嘅蛇尾，都俾如有神助嘅Jimmy用彎刀一段段斬件。呢個時候，倒地嘅Helena已經再撐唔住，眼角最後見到一個男人嘅身影，跳起揮刀將蛇怪斬成兩半之後，就失去咗意識。