執屍執到女殭屍: 十二．螳螂

Helena一個人跌咗入右邊嘅隧道，耳機嘅訊號又失靈，只可以向前探索。行咗一陣，隧道中間出現一間大約三四百平方呎嘅房。Helena直覺覺得會有敵人出現，已經握好斧頭。果然，房嘅另一邊出現一隻變異殭屍，上半身係人型，但係雙手就係好似兩把鐮刀，下半身有六隻類似昆蟲嘅腳，好似螳螂咁。
 
Helena一嚟就掟兩粒精彈俾螳螂怪做見面禮，但係佢用六隻腳一跳，好快咁彈咗去旁邊牆避開咗，仲黐住喺牆上面。一發唔中，Helena再連環兩發，等螳螂怪跳起之後，再𣈴準佢會落腳嘅地方發射。但係螳螂怪實在跳得太快，始終都係打佢唔中。
 
Helena見遠攻唔得，就衝埋去拉近距離再掟。佢用斧頭同螳螂怪近戰較量咗幾吓，發現螳螂怪力量比起普通彊屍唔係強好多，但係就相當敏捷同機警。近戰嘅時候，螳螂怪用兩把鐮刀扺擋Helena嘅斧頭幾乎滴水不漏。當每次螳螂怪扺擋唔住斧頭嘅攻擊，又或者Helena一將精彈攞上手，螳螂怪就會即刻跳開拉返遠距離，非常警愓。
 
Helena一路老鼠拉龜已經相當煩燥，火上加油嘅係Jimmy今次又幫Helena嘅精彈特別包裝，搞到佢一手都係黏液。Helena望住手上嘅黏液，越諗越火滾，下定決心今次行動之後要打Jimmy一身。Helena大嗌一聲，唔再拖拖拉拉，要同螳螂怪決一勝負。佢將手上嘅斧頭飛向螳螂怪，亦不出意料咁俾螳螂怪避開咗。轉頭Helena雙手都已經攞住精彈，雙手連發開始向螳螂怪掟過去。一彈避開咗，另一彈又再飛過去。連續幾波，迫到螳螂怪差唔多無路可走。可惜正喺要甕中捉鱉嘅時候，Helena身上嘅精彈已經用完。怒氣沖沖嘅Helena握住拳頭，頹然企咗喺度。
 
螳螂怪見Helena已經掟完，迫近Helena開始攻擊，一邊仍然警惕住佢會唔會有收埋嘅精彈，而Helena就舉起雙手抵擋。雖然螳螂怪嘅力量唔算強，但係連番攻擊之下，Helena嘅緊身衣都出現多處破損。面對已經無還手之力嘅Helena，螳螂怪攻擊得越嚟越放膽，Helena身上嘅傷痕亦越嚟越多。
 


當螳螂怪覺得時間差唔多，要俾Helena最後一擊嘅時候，Helena雙掌拍向佢心口。螳螂怪知道Helena嘅拳腳攻擊根本傷唔到佢，根本就無諗過要避開。螳螂怪中掌之後當然無成隻爆開或者彈開幾丈，而係紋風不動。的確係停咗無郁，身上嘅甲殼仲要開始脫落。究竟點解中咗兩掌會咁大效果，唔通Helena學識咗降龍十八掌？
 
原來Helena喺望住手上黏液嘅時候，諗到呢個消滅螳螂怪嘅方法。佢呢個方法要用晒雙手收集兩種唔同嘅精液，為咗令對方唔會懷疑佢點解唔攞斧頭，佢先將斧頭飛出去。然後每一次掟出精彈之前，Helena都先整爛個彈殼，令入面嘅精液流晒落手，只係掟個彈殼出去。Helena知道根本掟唔中螳螂怪，咁做只係為咗令對方認定自己已經用晒彈藥。當滿手都係精液，佢就握緊拳頭，將精液收集喺掌心。果然螳螂怪之後就放心靠近，而且喺放鬆戒備之後，俾Helena滿係精液嘅雙掌打中，就好似中咗好多精彈咁。當然呢個方法都只係搏一舖，萬一對方唔中計，咁斧頭又無喺手，精彈又用盡嘅Helena，就只可以認命坐以待斃。
 
Helena趁螳螂怪定咗喺度，執返飛咗出去嘅斧頭。Helena雙手握斧，由螳螂怪左肩劈落去，劈開佢嘅身體，直至將心臟斷開兩半。