執屍執到女殭屍: 十．陷阱

「R小隊，包括Marco同Jimmy，緊急集合。」分局各處嘅喇叭傳嚟集合廣播。佢哋需要緊急出動，目的地係K小隊同N小隊所在嘅一間廢棄工廠。事緣有目擊情報指出有兩隻殭屍喺現場出現，所以分局派出兩個小隊去消滅佢地。喺執行任務途中，K小隊目擊到相信係變異殭屍嘅物體，好彩對方並無主動攻擊。而家兩個小隊都退返出工廠外圍等緊支援。而目前唯一有對付異變殭屍能力同經驗嘅，就係可以裝備精彈嘅R小隊。
 
現場嘅三個小隊，統一由Jennifer指揮。根據K小隊四個成員嘅報告，今次嘅變異殭屍又唔同咗款，係一隻人身蛇尾嘅怪物。趁戰鬥員喺車外討論嘅時候，Marco同Jimmy就喺車入面準備精彈。佢地今日著住新嘅防護服，攞住武器，一邊做精彈一邊幫裝備吸收訊息。由於可以製造嘅數量有限，精彈都係分配返俾比較熟手嘅R小隊成員。
 
N小隊嘅四位成員之中，有一位明顯比較生手。佢年紀同Bella差唔多，都係十六七歳，相信就係啱啱入隊替補陣亡成員嘅新人。Bella見大家差唔多大，就同佢搭訕：「你好，我叫Bella呀，係R小隊嘅，你係咪新人嚟㗎？」對方點點頭，答：「係呀，我叫Tina，啱啱入咗隊幾星期。我知你哋R小隊全部都係精英戰鬥員，請你多多關照。」Bella俾人當面話係精英，點都係開心嘅，笑呵呵同Tina講：「我雖然無Jennifer佢哋咁犀利，不過都算係有經驗。放心喇，有我哋喺度，加埋Sin果啲古靈精怪嘅發明，就算係變異殭屍都無問題。」Tina聽到Bella咁講，好似真係放心咗。
 
喺Jennifer嘅帶領之下，一行十四人進入工廠。今次Marco同Jimmy都孭埋製造精彈嘅工具隨隊行動，一來係精彈作為對付變異殭屍嘅必要手段，要確保有需要嘅時候可以即時補充；二來亦係要用實戰測試新裝備嘅精服同兩件武器。如果唔係要埋牙作戰，Sin又點會咁好死幫佢地整咁多裝備呀？
 
經過廠門大閘，佢哋進入一塊空空如也嘅草地。工廠嘅規模好大，有好多間廠房。其中一間嘅門口打開咗，而入面就見到有一隻殭屍喺度。Jennifer一行人入到廠房，殭屍就衝向佢哋。呢隻殭屍望落似乎係普通殭屍，無變異種嘅蹤跡。Jennifer指揮Suki同K小隊消滅殭屍，同時叫其他人繼續小心留意變異種有無出現。五對一實力懸殊之下，殭屍嘅心臟好快就俾Suki嘅短刀刺穿，K小隊嘅隊員都驚嘆Suki嘅身法實在快如閃電。啱啱消滅完第一隻殭屍，第二隻殭屍又撲出嚟。佢一現身，就俾Bella用鐮刀攔腰斬成兩半，手臂都斷晒，然後就俾N小隊嘅隊員破壞佢嘅心臟。
 


正當大家都覺得贏得未免太輕鬆，廠房嘅地面開始震動，成個地面向下跌。廠房下面係一個好大嘅斜坡，好似sir滑梯咁，佢哋十四個人分成三批滑咗入三條隧道，跟著隧道嘅入口就俾跌落嚟嘅石屎同沙泥封住咗，返唔到出去。Jennifer、Suki、K小隊嘅成員同埋Marco跌咗入左邊嘅隧道、Bella、N小隊同Jimmy跌咗入中間嘅一條，而Helena就一個人跌咗入右邊隧道。「全部人報告情況。」Jennifer對住耳機發出指示，但係耳機已經收唔到訊號。在場嘅所有人都一樣，似乎係受到干擾。呢個明顯係一個陷阱，不過佢哋亦無其他選項，只能夠向前走。不過單係殭屍會設陷阱呢件事，已經令佢哋覺得相當不安，顛覆咗一向殭屍只係根據捕食本能行動嘅諗法。
 
Suki起返身之後，發現一邊腰包入面嘅紅色精彈喺跌落嚟嘅時候撞爛晒唔用得，只可以靠Jennifer手上嘅存貨。佢哋一路只係遇到一啲普通嘅彊屍，以Jennifer、Suki加上K小隊足夠應付有餘。一路上Marco都有份戰鬥，主要就係自保同埋喺其他戰鬥員擋住殭屍嘅時候補刀。唔知係咪真係啲殭屍都唔想太接近件精服，自從入咗隧道之後，啲殭屍似乎都無以Marco為捕食目標，反而係先攻擊戰鬥員。Marco嘅長劍斬落殭屍度都算有用，雖然無做成好大嘅直接傷害，但係斬中之後殭屍係見到有弱化同動作變慢嘅效果。令戰鬥員可以更輕鬆對付佢哋。
 
佢地走吓走吓，身邊嘅環境由泥石慢慢變成好似喺建築物嘅入面咁。繼續向前走，佢哋去到一道鐵門前面，而門前面有一隻好似上次果隻，又係一身樹皮甲嘅變異殭屍係度守住。隻樹皮怪無主動攻擊，只係守住道門。但睇嚟要通過呢度，就要先打低佢。
 
有過上一次嘅經驗，Jennifer同Suki提醒其他戰鬥員小心，一邊對樹皮怪作出試探攻擊。呢隻樹皮怪同之前果隻一樣，身體可以擋開武器，但係力量同速度就無咁強。Marco有咗啱啱戰鬥嘅經驗，一路跟住其他戰鬥員包圍樹皮怪，一路搵機會補刀削弱佢。終於俾佢搵到個位，趁住樹皮怪背後中門大開，Marco一劍篤佢背脊。Marco呢一劍唔只篤唔入，仲俾樹皮甲彈開成個人都企唔穩，樹皮怪亦唔見有任何弱化嘅效果。唔知樹皮怪係咪特別唔鍾意俾人篤背脊呢？佢一下反手就打向Marco個頭。Marco企都未企返穩，邊度避得開？心諗：「又話神兵利器嘅？Sin，你點我！」突然Marco對腳俾人大力橫掃，成個人跌低咗，全靠咁避開咗樹皮怪嘅攻擊。
 
原來係Suki衝過嚟救咗Marco。喺其他人嘅攻擊掩護之下，Suki拖住Marco離開樹皮怪嘅攻擊範圍。眼見戰鬥員嘅武器攻擊同Marco嘅弱化攻擊都唔凑效，Jennifer向樹皮怪掟出兩粒精彈，確實咁弱化咗對方。跟著喺四方八面嘅武器同精彈嘅連番攻擊之下，樹皮怪終於俾Jennifer嘅長槍刺穿心臟。
 


雖然有部份K小隊嘅成員受咗輕傷，佢哋總算喺基本上無戰力損失之下消滅咗一隻變異殭屍。但係之前目擊到嘅蛇型殭屍仲未出現，即係之後肯定仲有更多變異殭屍要應付。而經過呢一戰，Jennifer手上嘅精彈只係用剩兩輪。為咗應付之後嘅戰鬥，Jennifer決定要先補充精彈。而家Jimmy唔喺度，藍彈係無得補。但係只要補返Suki爛咗嘅紅彈，即係Marco造嘅精彈，就可以同剩低嘅藍彈發揮作用。好彩Marco有將製造精彈嘅工具帶係身，於是佢搵個地方坐低，拉開褲鏈準備chok嘢。周圍嘅戰鬥員就背向Marco，各自戒備殭屍嘅襲擊。Jennifer同Suki對呢種場面可謂見怪不怪，但係K小隊嘅成員就有啲尷尬。