【校園】想成為您的治癒: 148. 沒這打算

「呼⋯」望住放喺枱上嘅試卷被收走嘅時候，邱茗然喺心入面鬆一口氣，「完晒啦⋯終於可以休息⋯」

「嘩～我終於都自由啦！」邱茗然行出考場嘅學校大門即刻用力咁呼吸呢一刻自由嘅空氣

「考完啦終於⋯！」張萱淇一臉疲倦咁行出校門

冇咗DSE嘅束縛，呼吸緊嘅空氣都特別清新一樣；邱茗然喺行去巴士站嘅途中拎出手機，打開IG

「我都考晒啦～鬆一口氣～」邱茗然將呢個message send出去，呢份輕鬆感喺考完試後嘅第一時間同殷書賢分享，「終於考完試」





「有冇信心？」比佢早考完嘅殷書賢好快就回覆

「Okay啦～我覺得都穩陣有4」「全部？」

「感覺全部都有4，但數學同LS就難講啲⋯」「有啲信心啦」

「我又唔係你，你實攞晒星啦～」「呢個就唔敢講」

「你地呢排有見咩？Study leave。」張萱淇瞄咗邱茗然嘅手機一眼，「冇得寫紙就一定要打字啦～」





「吓？冇呀～我日日都喺屋企溫書，都冇行出過屋企。」邱茗然搖搖頭，佢見到張萱淇嘅視線落喺佢嘅手機上，「只係有時都會講兩句，佢嗰日考完都有同我講～」

邱茗然全個study leave基本上除咗有時出去買個零食買個lunch，同張萱淇約佢出去之外，幾乎日日都喺屋企對住四面牆溫書

「我都冇離開過屋企，點可能見到佢⋯？」邱茗然無奈道，「佢又係日日喺屋企，我地都係偶爾講兩句，冇特別傾計⋯」

「哦～我咁樣問啫，你唔洗咁緊張嘅～」張萱淇望住邱茗然嘅反應笑道

「我冇緊張囉⋯我比較緊張我會考成點多啲⋯」邱茗然輕嘆一口氣





雖然DSE對佢地考完嘅人嚟講已經落幕，但擔心完一樣又有另一樣嘢要擔心⋯

邱茗然呢一刻完全唔想諗同放榜有關嘅事，唔想去想像拎到成績表嘅時候會喺成績表上見到啲咩

「不過我覺得我都應該⋯算啦唔好再講⋯陣間講完考得唔好就死⋯」邱茗然連諗一下成績都唔想亦唔敢，「講下其他嘢分散下注意力先⋯」

「你諗住幾時表白呀？」張萱淇忽然間掉出一個令邱茗然措手不及但又可以分散注意力嘅問題

「吓⋯？」邱茗然呆咗一下

「吓⋯？」張萱淇見到邱茗然嘅反應，同佢做出同一個反應，「表白呀⋯」

「我冇諗過喎⋯我冇諗住要表白⋯」邱茗然搖搖頭，回答嘅答案令張萱淇露出難以置信嘅表情

「吓⋯？」今次張萱淇真係呆咗一呆，邱茗然嘅答案先係剎佢一個措手不及，「但可能畢業之後就唔再見⋯」





「唔⋯都係嘅⋯」邱茗然稍微思考一下都同意張萱淇嘅講法，但同意還同意，佢心入面都係冇要表白嘅想法

「喂喂，你要唔要好似之前咁，喺畢業禮表白？」張萱淇靈機一動提議邱茗然可以同以前一樣，「可能今年有收穫呢～」

「考慮下啦～有排都未到畢業禮⋯」邱茗然冇所謂咁聳肩，佢本來對呢件事就冇特登諗太多，不過張萱淇咁樣講完，佢又猶疑咗一下，「而且，都未知嗰陣會變成點⋯」

⋯

「點呀？考晒試啦，安心晒啦？」邱旻顥望住邱茗然悠悠閒咁灘喺床上睇手機

「暫時啦～」邱茗然覺得成個人都好輕鬆，但同時又有啲唔慣咩都唔洗做，「仲要等放榜⋯」

「今年幾時放榜？」邱旻顥問道，「畢業禮先定放榜先？」





「唔係年年一樣㗎咩？」邱茗然嘅目光停留喺手機嘅螢幕上，雙手拎住手機打字，「畢業禮之後先放榜。」

「哦⋯」邱旻顥漫不經心咁哦咗一聲

「哥哥，你會嚟我畢業禮㗎可？」邱茗然坐起身望住執緊袋嘅邱旻顥，「你嗰日要抽空嚟我嘅畢業禮⋯！」

「嗯，會嚟呀。」邱旻賢爽快咁答應，「冇計啦～邊個叫係你畢業呀～都冇得唔去。」

邱茗然無奈咁反咗一下白眼，佢打開手機嘅月曆望一望，仲有兩個月先係佢嘅畢業禮

「咁就畢業啦⋯」邱茗然自言自語一樣講道，「真係唔捨得⋯」

「唔捨得邊個？」邱旻顥好自然咁就搭話問邱茗然

「唔⋯」邱茗然下意識思考起嚟，下一秒佢清醒起嚟起身望住邱旻顥，「唔捨得你呀！」





「唔洗。」邱旻顥望住扁起嘴嘅邱茗然笑一笑，「唔捨得嘅話，咁有冇咩會遺憾嘅嘢未做？」

「唉～」邱茗然向後大字型嘅灘落床，「遺憾呀⋯都⋯有掛⋯唔肯定⋯」

邱茗然都唔太肯定有啲咩事佢唔做會有遺憾，但就算諗到，都係啲要時間考慮同做心理準備嘅事

「諗到想做嘅咪去做～陣間冇機會呀～」邱旻顥淡然咁講咗一句，然後將佢平時番學孭嘅袋放喺地上

「嗯⋯」雖然邱旻顥咁講，但顯然地，邱茗然都係有啲猶疑

「呀⋯到時畢業典禮嗰陣，你記得話我聽你中意邊個男仔。」邱旻顥望咗邱茗然一眼，輕描淡寫咁講咗一句

「冇呀，諗多咗⋯！」邱茗然一個轉身攬住枕頭，將頭埋喺枕頭中，當聽唔到邱旻顥同佢講嘅嘢








IG Link: https://www.instagram.com/nd_cotttoncandy/?hl=zh-tw