【校園】想成為您的治癒: 147. 成了習慣
短短只有一個半月嘅Study leave，有人每日都全力以赴，堅持溫書；有人會先甜後苦，打算到最後一、兩個星期先沖；亦有人會玩下又認真下咁行落去
「唉～」邱茗然拎住筆記坐到床上然後向後灘，「溫書都溫到好頹⋯」
邱茗然嘅手無力咁垂低放喺床上，日日都係喺屋企自主學習嘅日子已經好足夠，足夠到令人覺得厭倦⋯
「好悶呀⋯但都仲有兩個星期先考試⋯」邱茗然拎起手機睇日子，然後又不禁嘆氣，「就嚟努力唔起啦⋯」
邱茗然一個轉身，側身瞓喺床上望住筆記，頹廢咁繼續背書
「唉⋯冇得番學好悶呀⋯」邱茗然嘆氣道，「好想番學⋯」
喺邱茗然仲休息緊同慨嘆緊嘅時候，另一邊廂嘅殷書賢邊溫書邊食緊m&m朱古力
「唉⋯好想番學操卷⋯」殷書賢靠後靠住櫈背，心入面特別掛住番學操卷嘅日子
殷書賢抬起頭，一眼就望到放喺櫃中嘅聖誕卡，收到咁多張嘅聖誕卡，只有邱茗然送嘅呢一張擺咗出嚟喺櫃入面
邱茗然嘅笑容喺殷書賢嘅腦海中一閃而過，殷書賢摸一摸額頭後撥一撥頭髮：「又會突然諗起佢⋯」
「佢應該都係溫緊書啦⋯」殷書賢拎起筆，將已經空晒嘅朱古力袋掉入垃圾桶，「半年呀⋯」
殷書賢搖搖頭，將心裏嘅雜念都甩走，要繼續努力溫書，因為剩比佢嘅時間已經唔多
「溫書溫書⋯！」殷書賢拍自己嘅臉頰一下，「趁冇人喺屋企好快啲溫多啲⋯！」
雖然話自從上次嘅事之後，媽媽喺佢溫書嘅時候打擾佢嘅次數少咗，但似乎要提住殷書賢唔中意聽嘅嘢嘅呢個習慣冇辦法改變
夜晚嘅時候殷書賢喺食完飯之後坐喺書枱前睇手機，打算休息一陣再繼續溫埋剩低嘅進度
「哈⋯再咁食真係會蛀牙⋯」殷書賢偶然睇到邱茗然嘅story，成個垃圾桶入面都係零食袋，「真係本性嚟⋯」
殷書賢無奈咁笑，佢下意識咁望咗自己嘅垃圾桶一眼，入面有個空嘅朱古力袋
「好似比佢同化咗咁⋯」殷書賢默默咁嘆一口氣，以前嘅佢好少食呢啲糖類嘅嘢，但識咗邱茗然之後，每個星期都要食一次先得咁
殷書賢㩒一下喺右下角嘅心心比咗個like，呢個可能係出於順手而㩒嘅like，喺邱茗然嘅手機中即刻彈出通知
「佢like咗我嘅story⋯？」邱茗然一臉震驚，「居然唔係溫緊書，係睇緊手機？」
邱茗然send咗同一個message比殷書賢，仲休息緊嘅殷書賢好快就回覆：「食完飯休息緊」
「學霸大人都要休息？」「我係人類，要休息係正常」
「就考DSE啦點算好？我未ready好呀⋯」「邊食朱古力邊溫書」
「你先係，你成日食朱古力小心蛀牙呀！」「唔似你成日食」
「好想番學⋯」邱茗然猶疑咗一陣之後先將message send出去，「日日喺屋企自律好痛苦」
「都一樣，不過我都會想番學多啲」殷書賢回答道
「學霸大人，你要保佑我數學考得唔錯呀⋯！到時冇人比我問」「平常心就得，前一晚早啲瞓，唔洗我保佑你都會考得好」
邱茗然望住殷書賢答佢嘅嘢，明明只係好簡單嘅文字，但邱茗然望住回覆嘅文字嗰陣都會露出笑容
「我都會保佑你考到好多星番嚟」邱茗然回答道
殷書賢like咗邱茗然嘅message，本來仲想再休息多陣，但宜家呢一刻嘅佢覺得好精神，已經可以繼續溫書
⋯
Study leave嘅時間好似好長，但其實一眨眼就過，DSE好似忽然間行到面前又好快咁轉個圈就走一樣
最後收穫係點就睇你當初願意付出幾多去換，但同時間，臨場嘅壓迫感亦唔可以忽視，最後出嚟嘅結果都要包括多方面嚟睇
有人願意由第一日開始努力，亦有人寧願到最後先發憤圖強，讀書冇指定嘅方法，只靠自己嘅決心大小
殷書賢選擇一直逼住自己進步、維持喺最佳嘅水平，因為佢嘅目標好明確；邱茗然選擇以輕鬆但唔鬆懈嘅心去面對，將勤補拙，盡全力去試去做
坐喺考場入面，空氣都會比平時凝重，拎起筆就唔可以輕言放棄，特別係喺一個著重成績、以成績為本嘅地方
每一分代表住你每一份努力，但同時亦唔可以完全代表你整個人生
由開始計時嘅一刻，就決定你喺呢六年到底有冇白過，你嘅努力就喺計時器響起嘅一刻下定論
成績點樣，都係表達緊你花咗幾多心機去完全呢件事，同往後日子嘅成敗冇關
「加油加油⋯」邱茗然著住外套坐喺考場上，喺開考前一刻喺心裏為自己打打氣
殷書賢盯住放喺禮堂台上嘅時鐘，仲有二十秒就到開考時間
「第一科⋯」殷書賢望一眼枱上嘅試卷，喺最後嘅時間完全放空唔諗任何嘢
令自己嘅心情先放鬆起嚟，將緊張嘅感覺先掉到一邊，作為打頭陣嘅第一科，如果冇一個好嘅開頭，咁接住落嚟都會有唔順利嘅感覺⋯
「宜家嘅時間係8點30分⋯」
監考員開口嘅時候，大家都即刻拎起筆，冇人真係留心聽住監考員講嘢，個個都爭分奪秒做卷
「嚓嚓嚓嚓嚓—」考場上傳嚟嘅寫字同掀頁聲，比起平時嘅考試，真正嘅考試顯得更嚴厲凝重
每一個人好似連呼吸都唔可以發出好大嘅聲音，呼吸淺促，拎住筆嘅手都會微微顫抖
有人偶爾會抬起頭望一眼掛喺台上正中央嘅鐘，有人完全唔望一眼，淨係專心做卷
由第一份試卷開始，到最後一份試卷，足足考咗差唔多一個半月
「嘟嘟嘟嘟！嘟嘟嘟嘟！」「夠鐘，停筆！」
喺最後一科嘅計時器響起嘅時候，都可以暫時咁自由啦
IG Link: https://www.instagram.com/nd_cotttoncandy/?hl=zh-tw