【校園】想成為您的治癒: 124. 討厭
殷書賢吞一啖口水，坐好起身，將目光放到枱上嘅書上，果然書上嘅字都係逐漸消散嘅狀態
「集中唔到⋯」殷書賢托着額，呢種溫唔到書嘅感覺令佢難以忍受，內心深處係煎熬，「鎅一下啫⋯都唔怕啦⋯佢發唔發現都一樣⋯」
殷書賢再一次將刀片推出嚟，然後將刀片架喺左手嘅前臂上，佢都冇心情諗呢個位置鎅咗幾多次、有冇空位之類
「Miss Hui好似每一次都係check左手⋯」殷書賢忽然間諗到呢個重點，「咁右手嘅話⋯」
殷書賢推起右邊嘅衫袖，右手嘅前臂上乾淨冇痕跡；殷書賢拎起鎅刀，猶疑咗一秒之後將鎅刀上消毒抹乾淨，然後收番刀片將鎅刀掉到枱上
「點可能真係話戒就戒得甩⋯」殷書賢沉重咁嘆氣，臉上寫滿疲倦
⋯
「Miss Hui，我都話咗我真係冇⋯」殷書賢將左邊嘅衫袖拉番落嚟
「嗯，你番課室啦。」Miss Hui點頭示意，今日嘅突擊檢查完成
殷書賢行出輔導室嘅時候，啱啱好撞正邱茗然喺小食部行上嚟，兩人四目相對望咗一眼
「你喺度嘅？」邱茗然感覺自己講咗句廢話，其實殷書賢點解喺度對佢嚟講冇咩影響，佢都只係要搵個話題傾計
殷書賢踏上梯級時回頭望一眼，邱茗然都跟住佢望去後面，見到Miss Hui從輔導室行出嚟，邱茗然即刻就清楚了解
「今日突擊檢查？」邱茗然細聲問道
「其實都唔叫突擊，我都估到佢會今日check⋯」殷書賢輕嘆一口氣，然後細聲講咗一句，「好彩佢淨係check咗左手⋯」
「咦～」邱茗然即刻側着頭望住殷書賢笑，「你又偷偷地對右手做咗啲咩？」
「冇呀⋯放棄咗，難得隻手仲咁乾淨。」殷書賢低頭一笑講道，「就唔好整花佢啦⋯」
「睇嚟真係忍手喎～」邱茗然笑着從裙袋拎咗粒糖遞比殷書賢，「恭喜你啦～」
「咁快就恭喜我⋯？」殷書賢輕輕一笑，伸手接過邱茗然手上嘅糖望咗兩眼，「我覺得我都係戒唔到⋯太辛苦啦。」
「比啲信心自己嘛～」邱茗然有啲猶疑咁輕輕用指尖拍一拍殷書賢嘅膊頭鼓勵道
⋯
喺圖書館內，殷書賢拎住紅筆幫自己對卷：剔、剔、剔、剔、交叉、剔、圈、交叉、剔
「嘖⋯」殷書賢計完分之後，喺寫低分數嘅一刻喺心入面輕嘖一聲抱怨自己，明顯地唔滿意呢個成績
殷書賢推起眼鏡，捏着眉心深呼吸一口，佢都唔知點解自己會好似不在狀態一樣，明明平時嘅佢都唔係咁樣，但最近佢都覺得一溫書就渾身唔自在咁
「成績又跌咗啲⋯」殷書賢調整好眼鏡，掀着練習題，望住自己犯下自己幾乎唔會犯嘅大意位，「搞咩呀⋯」
殷書賢苦惱咁托着額重新做一次題目，佢討厭自己犯大意嘅錯，什至係因為狀態唔好而犯嘅錯，佢最討厭自己係咁樣⋯明明係自己拿手嘅科目，更加唔可以接受⋯
「再做一次，今次一定要計啱啦⋯」殷書賢又一次拎起cal機，拎起鉛筆，就算做一百題，佢都要確保自己唔出錯，「再錯嘅話真係會死⋯」
殷書賢拎住擦膠同鉛筆，寫完又擦，寫完又擦，計一計唔啱又擦再重計，一直來來回回咁做，愈計落去大腦石化嘅速度愈快，快到最後個頭都有啲重
「又唔啱呀⋯？」殷書賢掀去答案頁對一對答案，但答案仍然係錯，「錯啲咩？」
邱茗然拎住英文堂派番嚟嘅閱讀練習卷做，本來係聖誕功課嚟，不過邱茗然抱住「既然佢早派，我就快啲做完，聖誕就可以多啲時間休息」嘅心態搶先一步做功課
「雖然唔係差，但都討厭英文⋯」邱茗然嘅左手托住臉頰，右手掀番去前一頁睇文章，「果然英文好麻煩⋯咦～搵到～」
邱茗然一見到佢要搵嘅答案，即刻掀番去後面寫低，搵到答案令佢心情變好咗少少，佢唔太中意做英文reading，次次做完reading都會好眼瞓，完全打唔起精神
「努力努力！為咗聖誕可以休息！」邱茗然為自己打打氣，一個深呼吸後又努力起嚟
邱茗然安靜咁望咗殷書賢一眼，佢都唔知點解突然間會望佢，但喺佢諗呢個問題嘅時候，佢嘅目光已經停留咗喺殷書賢身上
「一如既往好努力呢～」邱茗然喺心中又一次對殷書賢嘅努力感到佩服，「我都要努力啦⋯！」
喺5點半嘅鐘聲響起後，所有事都一如既往：從天台到地面離開學校、企喺巴士站一齊等車、坐同一班巴士番屋企
殷書賢仍舊坐喺靠窗嘅位置，左耳戴上耳機，聽住同一個playlist嘅筆記；邱茗然仍舊係放鬆時間，拎住手機睇IG、覆message
「睇下我買嘅聖誕卡～」張萱淇手拎住一疊啱啱收到嘅聖誕卡影比邱茗然睇，「係唔係好靚呢～我留番最靚嗰張比你」
「我都買咗，抽起咗最靚嗰張比你～」邱茗然露出笑容回覆道，「我番到去影我買嗰疊比你呀～」
「好呀～我都係啱啱收到，嗰個李雨揚一直喺度問我今年寫唔寫聖誕卡比佢⋯」張萱淇喺句子嘅最後加多咗個反白眼嘅emoji，「我怕咗佢真係⋯」
「佢好想收到你嘅聖誕卡喎～」邱茗然打咗個面紅嘅emoji喺最後回覆道，「聖誕節佢實有約你啦」
「我話咗考慮下先」張萱淇回覆道，「你會唔會寫聖誕卡比你個學霸呀～」
「咩我個學霸？唔係我㗎⋯」邱茗然先以無奈嘅語氣回覆，但見到張萱淇嘅提問時都會不自覺咁嘴角上揚，「唔知呀，應該都會⋯？」
邱茗然抿着唇望向殷書賢：「佢想唔想收聖誕卡呢⋯？佢唔想要嘅話我又好難比佢⋯」
IG Link: https://www.instagram.com/nd_cotttoncandy/?hl=zh-tw