【校園】想成為您的治癒: 123. 心癮

「你真係有時都癲癲地⋯」殷書賢無奈咁笑道，佢提手將邱茗然嘅手㩒番落去，「我係鎅都鎅自己隻手，鎅你隻手冇咩意思。」

「我講笑咋！點可能真係比你鎅我隻手！我怕痛！」邱茗然笑着將袖口鈕扣番，「不過唔鎅手嘅話咪做其他嘢代替囉～」

「食糖定食朱古力？」殷書賢都唔洗聽埋落去都知邱茗然會講咩提議

邱茗然一愣後就笑起嚟，睇嚟佢成日都喺殷書賢面前講食糖食朱古力，搞到殷書賢都知佢想點

「咁⋯食糖啦～」邱茗然笑道





邱茗然望住殷書賢嘅側面，感覺最近殷書賢好似笑多咗，但係明明笑多咗，但又好大壓力一樣

「唉～希望佢唔洗成日鎅手，可以冇咁大壓力就好⋯」邱茗然喺望住殷書賢嘅時候喺心入面講咗一句

⋯

「大家都知1月考試啦，派番今年啲嘢比你地先啦，拎番屋企溫書啦。」

「今年仲有啲统測卷未派番比你地嘅，咁宜家比番你地啦，考完試就直落對卷，比番啲嘢你地番去溫書。」





「好快又到最後嘅大考啦，各位要加油知唔知！好好溫書呀番去！」

「聖誕節唔好掛住周圍玩啦～留啲時暗溫書呀，時間好緊逼啦！」

「明明仲有幾日先放假⋯點解講到好似我地聽日就係最後一日番學咁⋯」邱茗然托住頭一臉疲倦，只係過咗一個朝早，佢已經覺得想瞓覺

「我地放完假番嚟，唔係都仲有個幾星期先考試咩⋯？」張萱淇直接伏喺枱上，講嘢都有回音

「我想講我宜家個file入面全部都係嗰啲草紙制嘅卷⋯」邱茗然對住佢嘅座位雙手攤開，「望到啲卷都已經唔想溫書⋯」





「面對現實番去溫書啦⋯」張萱淇頹廢嘅舉起左手比個like表示鼓勵同支持，「我已經見到最後一個星期我地會幾痛苦，係日日都操paper嘅日子⋯」

「呢個係大考，唔係DSE，雖然我覺得DSE會更慘⋯」邱茗然搖搖頭，起身拖住腳步行番埋位拎出喺櫃桶嘅各份測驗卷，「好感動，係進步嘅分數⋯」

邱茗然掀着每一份卷，見到都係自己默默努力耕耘換番嚟嘅進度，臉上嘅笑容又疲倦又安慰

「至少我嘅努力係真係冇白費，係有回報⋯！」邱茗然嘅心鼓勵自己，「只要我再努力，DSE都會考得好！」

邱茗然拍拍自己嘅臉頰對自己打氣，雖然有時諗到考試將至都會好緊張，加上未來未清晰都會好擔心，但邱茗然相信自己努力就可以向前行達到想要嘅目標

夜晚嘅時候，書枱嘅枱燈仍然著住，邱茗然仍然坐喺書枱前溫緊書

邱茗然嘅嘴裏一直低聲喃喃自語，口裏背緊西史嘅內容，溫緊今年要考嘅範圍

對文科人嚟講，腦容量同手速最為重要，當然仲包括句子整理、論點論據，所以邱茗然想將成本西史書嘅內容記熟





「呀⋯溫書好崩潰呀真係⋯！」邱茗然拍拍自己嘅額頭，「好想放棄呀⋯」

邱茗然望住枱上嘅西史筆記，雖然佢幾中意讀西史，但係要以溫書考試做前提都真係會令佢好崩潰

佢一時坐好咁背；一時曲起雙腳、頂住書枱、將個人摺埋一樣咁背；一時盤着腿坐喺櫈上背；一時又手拎住筆記仰起頭背

「救命呀⋯好似幫我溫緊西史咁⋯」邱旻顥皺起眉頭，但佢冇出言制止，只係用被蓋過頭匿喺被入面瞓

「啱啱我背到邊話⋯？」邱茗然背到一半嘅時候忽然記唔起，然後拎起筆記望一眼，「哦，係喎⋯」

邱茗然又背多一part後起身離開書枱前，行出房去廚房酙杯水飲下休息下

「定係聽日先再溫？反正聽日都係假期啦⋯」邱茗然拎住水杯企喺廚房思考，「宜家番去執嘢瞓覺，然後聽日先再溫，還掂功課都做晒⋯」





邱茗然飲一啖水，佢自問自己又未真係到攰到要瞓著嘅地步：「但溫到咗大半part又唔溫埋剩低嗰度好奇怪⋯」

「哎呀⋯好煩惱，溫書定瞓覺好？」邱茗然輕皺起眉頭，企啖只有微弱光線嘅廚房裏好似有助佢思考一樣，「如果係殷書賢嘅話⋯」

邱茗然唔知點解突然間會諗起殷書賢，可能因為佢溫緊書，而同溫書呢兩個字最大關係嘅人就係學霸殷書賢

「完美主義者嘅處女座⋯點可以接受做嘢只係做一半唔做一半⋯？」邱茗然自己諗到都忍唔住笑，「佢實會好認真咁一氣呵成溫埋，直到溫晒成課先去瞓。」

邱茗然放低空水杯喺放杯嘅盤上，然後行番房：「算啦～都係溫埋嗰少少。」

邱茗然拎起放喺枱上嘅功課file，入面裝住佢今日收番嘅卷

佢將file拎住喺手上，額頭靠住file、合上眼祈禱：「我可以㗎我可以㗎⋯！我可以再有進步！我今次考試成績就代表我努力咗幾多，我可以考好DSE，可以考到大學㗎！加油呀邱茗然！」

喺邱茗然為自己進入考試狀態努力溫書而打氣同時，殷書賢坐喺書枱前愁眉不展，佢望住枱上嘅練習卷、past paper，大腦完全空白咗





「字⋯冇晒⋯」殷書賢仰起頭，佢感覺自己要記嘅嘢喺到大腦嘅時候被大腦反彈番出嚟一樣，「唉⋯」

殷書賢嘆一口氣，拉起衫袖又掃着自己嘅左手前臂：「好痕⋯」

最近已經冇鎅手，但都係覺得好痕，但嗰種痕但摸不著癢處嘅痕，好似喺皮下面痕一樣，想掂都掂唔到

「心痕⋯」殷書賢細聲地吐出兩個字，佢知佢呢種痕唔係真正嘅痕，「心癮起⋯想鎅手⋯」

殷書賢拎出收喺書包暗格嘅鎅刀，將刀片一格一格咁推出嚟，又一格一格咁推番入去

「Miss Hui應該星期一會check一次⋯」殷書賢心裏嘅直覺係咁樣同佢講，「兩日，應該埋得切口⋯」








IG Link: https://www.instagram.com/nd_cotttoncandy/?hl=zh-tw