【校園】想成為您的治癒: 117. 謝禮

「叮噹叮噹⋯叮噹叮噹～」落堂嘅鐘聲響起，殷書賢正打算去轉廁所，手摸一摸喺褲袋嘅鎅刀，確定鎅刀喺褲袋

「書賢。」Miss Hui見殷書賢企起身，於是將佢叫住，「跟我落教員室。」

殷書賢愣一愣，Miss Hui真係突擊檢查，最近都係呢個狀況，就算殷書賢想避都唔避得幾多次，因為Miss Hui係佢嘅班主任

「唉⋯」殷書賢默默嘆一口氣後行離座位

謝澤謙佢地目送殷書賢行出課室，殷書賢一個唔情願嘅樣都要跟Miss Hui落去





「佢又比Miss Hui叫咗去，已經係今個星期第三次。」張思群望住殷書賢跟喺Miss Hui身後，「到底做咩？」

謝澤謙聳肩，佢都冇諗過殷書賢會見得咁頻密，佢唔知道事實嘅全部，但只係知少少又好難估咩事

「9成都係成績上面嘅嘢啦⋯」趙遠寧猜測原因，「最近佢嘅成績唔係有啲跌咩？」

「雖然係啫，但又唔係真係跌得好勁，只係少少啫⋯」張思群講道，「不過佢個人最近嘅狀態都係咁，溫書溫到半夜，但成績又微跌，見完Miss Hui之後，就更加明顯⋯」

「我估只係因為就考試又近DSE啫。」趙遠寧講道，謝澤謙一直安靜咁聽住佢地講，「你知佢最緊張佢啲成績㗎啦～不過我覺得就算跌少少，都唔會影響佢考第幾。」





殷書賢跟住Miss Hui行到教員室門口，企喺門口等Miss Hui出嚟

「唉⋯好麻煩⋯」殷書賢喺心裏抱怨，「琴日先check完今日又check⋯」

宜家佢根本唔知Miss Hui幾時會檢查佢隻手，所以佢根本冇機會喺手上留低新嘅傷痕，壓力都冇地方發洩一樣嘅感覺

「唉⋯好攰好辛苦呀⋯」殷書賢喺心裏鬱悶地道

過咗一陣之後，殷書賢番到課室，佢最近的確冇留低新嘅傷痕，但對殷書賢嘅壓力嚟講完全唔係一件好事⋯





⋯

「唉，Chem堂。」謝澤謙悠閒咁拎出Chem書準備去上堂，「行未呀？」

「嗯。」殷書賢口係咁答，但完全冇郁嘅打算，什至連書都未拎，枱上仍然放住Bio嘅功課

喺打鐘前兩分鐘，殷書賢執好枱上嘅嘢同謝澤謙佢地一齊準備去上堂

「你張思群唔洗帶書？」殷書賢從櫃桶拎出Chem書，回頭望張思群時發現佢兩手空空咩都冇

「係喎⋯難怪手咁空⋯」張思群掉頭行番埋位攞Chem書

邱茗然同許洛霏行入E班嘅課室，因為打鐘之後就係地理堂

「笑咩？」蹲喺書包前拎緊嘢嘅殷書賢見到邱茗然望一望佢後耷低頭偷笑





「你圈晒之後我都係唔識計。」邱茗然笑着坦白道

「你問題。」殷書賢不禁搖頭，「真係唔知你點考試⋯」

「叮噹叮噹⋯叮噹叮噹～」上堂嘅鐘聲響起，殷書賢佢地幾個拎住Chem書離開課室去其他班房上堂

「哦～進展唔錯喎～」許洛霏喺行埋位坐低嘅時候低聲對邱茗然講道

「吓？冇咩進展可言，只係唔識做數搵佢求個救～」邱茗然笑道

邱茗然喺裙袋摸索，好困難咁將一粒糖從包裝中拆到拎出嚟，連同一張摺好嘅memo紙放喺殷書賢嘅櫃桶

喺lunchtime嘅鐘聲響起後，許洛霏同邱茗然執好嘢準備番課室





「茗然你幾多分呀？」許洛霏好奇咁問邱茗然嘅課堂小測成績

「幾好啦～」邱茗然自豪咁講道，地理都算係佢成績好好嘅科

「哦～」許洛霏微微點頭，「唉～好肚餓呀⋯」

「食咩好？」趙遠寧問道，佢個肚都餓扁咗，啱啱上Chem堂嘅時候個肚一直咕咕叫，「餓死。」

「都係食嗰間茶餐廳？」殷書賢蹲低喺櫈邊，反正都係擺一擺嘢就出去食飯

殷書賢一蹲低，就見到放喺較入位置嘅糖同比糖壓住嘅memo紙

殷書賢將兩樣嘢都令出嚟，冇留意到謝澤謙咁啱望到佢手上拎住嘅嘢，殷書賢打開memo紙睇

「係謝禮！我都未蠢到真係一題都計唔到！」





殷書賢輕輕一笑，謝澤謙望到殷書賢臉上不明所以嘅笑容，於是悄然地伸手拉一拉張思群示意

「睇緊咩呀！」謝澤謙同張思群默契咁湊近探頭想一探究竟，殷書賢嘅反應都唔慢，喺餘光見佢兩個湊近嘅時候即刻將memo紙摺埋

「冇睇啲咩。」殷書賢免得佢地偷偷地拎嚟睇，將memo紙先收入褲袋入面

「有糖食！」謝澤謙好快手，殷書賢要收埋粒糖嘅時候，謝澤謙一手就搶咗佢手中嘅糖

「食糖自己買。」殷書賢以平淡嘅聲線講道，然後將謝澤謙手上嘅糖拎番然後收入褲袋

「一粒糖洗唔洗咁緊張呀～」謝澤謙輕嘆一口氣，用手肘撞殷書賢一下

「我見啲字係女仔嘅字跡嚟～係唔係隔離班嗰個女仔？」張思群即刻講道，但其實佢咩都冇睇到，只係隨便估下





「啱啱係X2，佢坐你個位唔係咩？」謝澤謙裝作一臉震驚

「點解要明知故問⋯」殷書賢完全唔明佢兩個做咩好似啱啱知邱茗然係坐佢個位一樣嘅反應

「你兩個，一直都喺度寫紙仔⋯？」張思群好似察覺到啲咩重點一樣嘴角上揚

殷書賢因為唔想解釋而選擇沉默，但喺佢地眼中，殷書賢就係默認




IG Link: https://www.instagram.com/nd_cotttoncandy/?hl=zh-tw