【校園】想成為您的治癒: 115. 想多了
放學後
「喂⋯！」
殷書賢比突然從佢身後傳嚟嘅聲音嚇咗一跳，佢猛然回頭望，見到邱茗然笑嘻嘻咁企喺佢身後
「比你嚇死⋯」見到係邱茗然之後佢即刻鬆一口氣，「仲以為係Miss Hui⋯」
「Miss Hui？啱啱我見到Miss Hui喺前梯上嚟⋯」邱茗然踏上幾級經過殷書賢嘅身旁回頭指一指前梯嘅方向
「快啲行⋯！」殷書賢連忙推一推邱茗然嘅書包示意佢快啲行上去
「吓⋯？」邱茗然一頭霧水咁跟住殷書賢快步行上去，「做咩呀？」
「比Miss Hui見到我⋯佢實會突擊檢查⋯」殷書賢跑上兩層之後喘住氣講道，然後繼續向上行
「你唔好行咁快⋯要唔要考慮下我嘅感受⋯」邱茗然企喺五樓，跑幾級樓梯已經上氣唔接下氣咁
殷書賢企喺原地等邱茗然夠氣之後行上嚟，邱茗然再喘幾啖氣，然後捉住扶手往上行；殷書賢見邱茗然差唔多行到上嚟就轉身繼續行上去
「書包要爛啦⋯」邱茗然伸手捉住殷書賢嘅書包，殷書賢回頭望咗一眼
「行慢啲啦⋯！好攰呀⋯」邱茗然鬆開手，努力咁快步行上兩級行啖殷書賢隔離
「已經行得好慢。」殷書賢講道
「Miss Hui真係會check㗎？」邱茗然對呢件事有啲半信半疑，「佢應該唔會真係打電話同你媽講⋯？」
「佢真係打電話同咗我媽講。」殷書賢提起嘅時候不禁嘆氣，然後冷笑一聲，「佢一番到教員室就打咗比我媽。」
「咁你媽媽有冇鬧你呀⋯？」邱茗然頭一側，小心翼翼咁開口問
「唔⋯都唔算有。」殷書賢嘅眼神中流露出一絲失望
「你媽媽一定好擔心你，你鎅到隻手咁樣⋯」邱茗然覺得殷書賢喺度逞強，可能係怕冇面所以先咁樣講，正常一定會比人鬧一餐
「你諗多咗啦，佢擔心係擔心，但佢係擔心我嘅成績會唔會受影響。」殷書賢冷笑講道，「唔係擔心緊我呢個人。」
「佢⋯冇講出嚟佢係擔心啫～媽媽一般都係要面㗎嘛～」邱茗然笑一笑道，佢唔太相信世上有媽媽會係咁樣嘅想法
「只要我講一句係因為關乎到我考唔考到第一，佢就唔會講啲咩，我媽就係一個咁睇重成績嘅人，而我就係咁樣成為大家眼中嘅學霸。」殷書賢自嘲般搖搖頭，「你真係太唔了解我媽。」
「我唔了解係正常，我了解嘅話先恐怖⋯」邱茗然快步行上幾級，行咗兩步就轉身望向殷書賢，向佢拋咗一粒糖，「請你食。」
「做咩突然咁好？」殷書賢一提手就輕易咁將粒糖穩穩咁接住
「我不嬲～都咁好～」邱茗然抬起下巴，露出自豪嘅笑容，「你唔知咩？」
「知。」殷書賢回答嘅聲線比啱啱細咗少少，但完全係冇破綻可言
「食咗糖就會開心～」邱茗然講完之後細聲咁哼起歌
「你睇起嚟好開心。」殷書賢側着頭望住邱茗然
「嗯？Okay啦～」邱茗然抬頭望向殷書賢，然後又笑一笑，「同平時一樣～不過身邊嘅人開心，我都會覺得好開心～」
殷書賢笑而不語，邱茗然睇唔穿殷書賢諗緊啲咩，就算宜家比較熟、好多時都會見到面都好，邱茗然都會覺得殷書賢呢個人好似好神秘一樣
邱茗然細聲咁哼住聽起嚟都好愉快嘅歌，殷書賢忍唔住偷偷一笑，手下意識一樣提起
「算啦⋯」殷書賢嘅手懸喺半空時打消咗本來嘅念頭，反而將邱茗然連人帶書包輕輕一推
「做咩呀？」邱茗然回頭，一個單純嘅表情望向殷書賢
「行快啲，趕住溫書。」殷書賢隨口就講咗個小謊言，然後拉開圖書館嘅門
⋯
「嘩～好攰呀⋯」邱茗然大字形咁灘喺床上，「灘陣先～」
「喂，邱茗然。」邱旻顥閂上房門，伸手拉過書枱前嘅櫈坐低，一臉認真咁望住邱茗然
「嗯？咩呀？」邱茗然懶洋洋咁翻個身，然後爬起身坐好，「突然做咩咁嚴肅⋯」
「你係唔係拍拖？」邱旻顥嚴肅又認真咁問邱茗然
「吓⋯？」邱茗然一頭霧水咁愣一愣，面對呢一刻嘅情況，邱茗然淨係諗到一樣嘢：「點解搞到好似家長日咁嚴肅⋯？」
「吓咩呀，我問你係咪拍拖。」邱旻顥重複一次提問
「冇呀，冇拍拖。」邱茗然眼見邱旻顥咁認真，佢都認真咁搖頭，「做咩突然咁問？」
「潘景諭話佢見到你同個男仔一齊好似好close咁，叫我問下。」邱旻顥聳肩，然後連人帶櫈移番去書枱前面，「中學生不應談戀愛。」
「哥哥，你有冇覺得呢句說話喺你把口講出嚟好冇說服力⋯？」邱茗然一臉鄙視咁望住邱旻顥，「你呢個女朋友好似都係喺中學嗰陣同你一齊。」
「我唔一樣啦⋯！」邱旻顥即刻回頭望向邱茗然，「我怕你陣間又中意個同潘景諭一樣嘅，咁咪死得？」
「嘩～都陳年舊事啦⋯！」邱茗然丟臉咁將頭埋到枕頭，「而且⋯我真係冇拍拖嘅打算住⋯」
「咁好啦。」邱旻顥聽到後半信半疑咁點頭，「你唔會因為潘景諭而耿耿於懷，所以唔拍拖？」
「幻想力過於豐富⋯」邱茗然無奈咁搖頭，「最多我⋯有中意嘅人嘅話同你講。」
「冇咩所謂。」邱旻顥唔在意咁聳肩，「你想講嘅我唔會阻止你嘅。」
「不過講開又講，上次有個人以為你係我男朋友，然後一個星期都冇同我講嘢⋯」邱茗然諗起上次殷書賢對佢冷淡咗成個星期
「男仔？」邱旻顥一聽就估到對方係男仔，「咁佢實唔係將你當普通朋友啦～」
「點知⋯」邱茗然裝作不在乎，其實佢只係唔想比假希望自己，令自己諗多咗
IG Link: https://www.instagram.com/nd_cotttoncandy/?hl=zh-tw