【校園】想成為您的治癒: 93. 無視

上完堂番嚟嘅邱茗然同許洛霏一齊企喺locker前擺嘢

殷書賢喺C班嘅門口經過，邱茗然碰巧回頭望向外面，佢都唔知殷書賢最近咩事，呢幾日都係咁樣冷冷淡淡

「咦～望緊咩呀～」許洛霏湊近邱茗然，同佢向同一個方向望

「冇望咩。」邱茗然默默地擰轉身，輕輕地推埋locker門

「真係？」許洛霏明顯唔信，佢啱啱同邱茗然望緊同一個方向，「明明就有嘛～」





許洛霏用膊頭輕撞邱茗然嘅膊頭：「最近冇搵人咩？做咩心事重重咁呀～」

「佢唔知咩事就真，最近呢幾日佢都唔理我，我同佢講嘢佢都勁冷淡囉⋯！」邱茗然一回想最近殷書賢對佢嘅態度，就有啲無名火起

「你之前話你地有時會寫紙㗎嘛～你寫紙比佢咪得囉！」許洛霏拉過邱茗然嘅手細聲地講道，「佢可能會答你呢～」

「我寫紙比佢，佢唔答我呢。」邱茗然喺無表情嘅臉上掛上一個無笑意嘅微笑，「都唔知佢咩事⋯」

最近因為殷書賢好似變咗個人一樣，就算喺圖書館都係高度集中咁溫書，什至連天台都冇去





邱茗然就算再點樣留memo喺佢櫃桶都好，都得唔到殷書賢嘅回答

「最近我都有一直寫嘢比佢，但係佢一張都冇覆⋯」邱茗然有啲灰心咁耷低頭，「我都唔知我做錯咩⋯」

「咁在意嘅話去問下佢囉～」許洛霏將鎖扣喺locker嘅門上，好快咁行番埋位擺低嘢就行番去邱茗然嘅座位：「係咪先～」

「我唔係在意囉，只係覺得有啲莫名其妙⋯」邱茗然無奈咁嘆一口氣，「突然間咁冷淡咩事呀⋯」

「咁唔係即係在意咩？」許洛霏輕皺起眉頭有啲唔明，「既然你係想知佢冷淡嘅原因嘅話⋯」





「唉⋯係唔係處女座嘅人都特別難觸摸⋯」邱茗然又嘆一口氣，佢真係唔知殷書賢對佢態度唔同嘅原因，「我又冇激嬲佢呀⋯佢之前都冇事嘅⋯」

「處女座係咁樣㗎啦～神神化化～」許洛霏笑道

「哎⋯真係好煩呀⋯」邱茗然忍唔住反白眼

「你冇同張萱淇講咩？佢冇為你解困咩？」許洛霏坐低喺邱茗然前面嘅座位

「未同淇淇講⋯」邱茗然緩緩搖頭，「未搵到一個啱嘅timing同佢講⋯」

「哦～咁唯有我食咗花生先啦～」許洛霏笑道，「不過如果你開口問，佢應該會答你嘅。」

「好難講⋯我唔肯定⋯」邱茗然無奈聳肩，耷低頭額頭貼住枱面，「處女座太～難觸摸啦～」

⋯





喺邱茗然拎齊嘢去上西史堂前，邱茗然抱住博最後一次嘅心態寫多咗張memo擺喺櫃桶

「係唔係我做錯咩令你唔高興？」

「最後一次，今次都冇結果就算啦⋯」邱茗然握住對摺好嘅memo紙喺心裏帶住一絲期望講道

「行啦茗然～」張萱淇對邱茗然講道

「嚟啦！」邱茗然連忙將memo紙放入櫃桶，拎起西史堂嘅嘢急步行出課室

「叮噹叮噹⋯叮噹叮噹～」西史堂一完結，邱茗然即刻就覺得好緊張

番到自己嘅座位望到張memo紙嘅時候，心臟緊張得噗噗跳





張萱淇一個跳步行到邱茗然嘅身旁，望住邱茗然企喺度郁都唔郁：「發咩呆呀！食飯啦去！」

「嗯，好呀⋯」邱茗然將memo紙對摺放入裙袋，彎腰拎起銀包同時不自覺就嘆一口氣

「做咩呀？寫咗咩呀？」張萱淇嘅好奇心忍唔住衝出嚟，「你咩表情呀？」

「冇呀⋯冇寫嘢⋯」邱茗然聳聳肩，臉上露出難以掩蓋嘅失望，「我寫嘢比佢，佢都唔理我⋯」

「嗌交呀？」張萱淇有啲難以置信咁瞪大眼，「點解呀？」

「冇嗌交，我都唔知點解。」邱茗然無奈咁講道，「佢就係突然對我超冷淡囉⋯！」

「吓？你做咗啲咩呀？」張萱淇問道

「唔知呀，我都唔知我做咗啲咩⋯」邱茗然又嘆一口氣，「許洛霏叫我直接去問佢，點問出口⋯？」





「許洛霏？你同咗佢講呀？」張萱淇即刻一臉訝異，然後有少少不悅咁皺起眉頭，「點解我會遲過佢知㗎？」

「因為冇機會同你講呀⋯」邱茗然回答，「你最近又因為補習同學嘅事好似仲係好煩惱，然後我又唔知點開口⋯」

「佢嘅事唔重要啦同你比起嚟⋯」張萱淇合上餐牌無奈地嘆一口氣，但呢個時候都唔係計較呢種事嘅時候，「所以你打算點呀？在意就問清楚呀～」

「只係覺得，突然比佢冷淡對待，有啲唔開心啫⋯」邱茗然垂低頭，拎起啱啱送嚟嘅凍飲中嘅攪攪棒

邱茗然心入面悶悶不樂，明明自己咩都冇做錯，但又好似做錯咗啲咩一樣

「又唔係唔在意嘅⋯只係⋯」邱茗然托住腮，望住喺凍奶茶面上攪出嘅一個小漩渦，「突然咁冷淡又唔知咩事，好不爽⋯」

「咁你去問下佢呀～你唔親自問佢，佢又點會答你？」張萱淇講道，「你用memo紙問佢，佢就有唔答你嘅權利；但你親口問就唔同，佢一定要比個答案，佢都唔似啲咁冇禮貌嘅人呀～」





「但好尷尬⋯最近喺圖書館佢都唔理我，以前我地喺圖書館溫完書會去天台Hea下，但最近幾日佢連天台都唔去⋯」邱茗然又嘆一口氣，雙手捧住臉頰，「我都冇機會問佢⋯」

「唔講仲以為你地分咗手，你對佢念念不忘想復合，但佢唔肯⋯」張萱淇無奈地笑起嚟

「講咩呀⋯！」邱茗然即刻唔高興咁鼓起兩泡腮，「宜家佢突然冷淡到咁，你仲幸災樂禍⋯！」

「總之你係真係緊張嘅話你就去問清楚啦！」張萱淇一臉肯定地講道，「我唔信你當面問佢，佢都唔理你咁過份！」

⋯

放學之後喺圖書館

邱茗然早早就喺圖書館坐好，殷書賢同平時一樣嚟到圖書館，坐喺最角落嘅牆邊位置

「我今日就真係真係問清楚！」邱茗然喺心入面對自己講道，「尷尬就尷尬啦！」

邱茗然喺殷書賢戴上眼鏡之後，即刻就拋咗張memo過去：「你最近係唔係唔高興？」

殷書賢輕皺起眉頭，打開memo紙睇咗一眼之殷，狠心咁直接將memo放喺一旁當冇睇過

「唔理我！？都太過份啦掛！」邱茗然望住殷書賢嘅舉動後瞪大眼，然後又拎起放喺一旁嘅memo紙寫道：「做咩唔理我？？？」

殷書賢依舊喺打開望一眼，然後又將memo紙摺番起放喺一旁，邱茗然又朝殷書賢掉memo紙：「Halo？？？學霸你做咩唔理我？」

「唉⋯」殷書賢睇完又摺番埋，今次喺佢將紙放到一旁前，邱茗然已掉紙過嚟：「你唔好又無視我⋯」




IG Link: https://www.instagram.com/nd_cotttoncandy/?hl=zh-tw