【校園】想成為您的治癒: 79. 機會⋯？
「人地屋企食飯係閒話家常，我屋企係學術研究咁⋯」殷書賢閂上房門同時喺心裏抱怨，「真係好煩⋯」
殷書賢拉開櫈又再一次坐番喺書枱前，打開文言練習打算再做多一個練習
「唉⋯宜家佢喺屋企真係愈嚟愈少講嘢，幾時變到咁唔中意講嘢？」媽媽望住又一次緊閉上嘅房門自言自語一樣講道
「大個係咁㗎啦。」爸爸輕輕一笑，搖搖頭後故意倜侃，「可能你提少兩次成績佢會講多兩句嘢。」
「嘖⋯」媽媽即刻停低準備夾餸嘅手，順便瞪爸爸一眼，「我唔係擔心佢唔上進，所以先暗示下，比啲壓力佢等佢努力啲咩？」
「咁希望唔好有反效果啦⋯」爸爸都忍唔住講道，佢日日都好似旁觀者一樣聽住，「我淨係聽都覺得大壓力。」
「你淨聽可以有幾大壓力？」媽媽皺起眉頭反問，然後一臉理直氣壯咁開口：「讀書最幸福，可以有咩壓力？咩都唔洗煩。」
爸爸無奈咁望媽媽一眼，企起身執起餐枱上嘅碗碟拎入廚房；媽媽覺得爸爸唔明白佢咁做嘅原因，喺媽媽嘅角度嚟講，佢做嘅一切都係為殷書賢好，但佢冇留意到殷書賢真實嘅感受
將期望轉成話語講出嚟，更加容易不自覺咁施加巨大嘅壓力，往往說話嘅威力比文字更強，特別係喺負面上嘅威力
殷書賢直覺覺得媽媽轉個頭又會入嚟，縱使耳機入面咩都冇播，殷書賢都係揀戴上耳機，將自己同世界嘅煩擾隔開
⋯
邱茗然同許洛霏企喺locker前邊開locker拎嘢邊有講有笑，討論喺男主角同男二之間邊個比較好
「男二係比較溫柔嗰種，但注定比女主拋棄㗎啦⋯」邱茗然失落咁嘆氣，「我真係好中意個男二⋯」
「唔緊要啦～失去咗一個理想型，仲有千千萬萬個理想型！」許洛霏認真又堅定咁講道，「下個月嘅新劇，我睇過簡介，男主就係溫柔類⋯！」
「咁我一定要抽時間睇啦～」邱茗然邊講邊將locker中嘅數學書同中文書拎出嚟，「係呢你有冇溫地理？」
「溫咗佢話今日一定會考嗰度。」許洛霏微微掂起腳尖拎出locker中嘅筆記，「其他就隨便咁溫咗啲⋯」
張萱淇行到C班嘅班房門前，伸手推門行入課室，課室嘅門一打開，張萱淇好快就望到企喺locker前嘅兩個女仔
「唔好掛住睇靚仔，溫書啦霏霏～」邱茗然笑道
「咩呀⋯！我有溫書㗎！」許洛霏否認道
「佢兩個幾時friend咗咁多⋯？」張萱淇喺心中畫出一個問號
張萱淇行番埋位，手將書包勾喺書枱旁，目光卻落喺窗台前嘅locker，見到邱茗然同許洛霏有講有笑，喺佢唔知道嘅時候講佢唔知道嘅事，張萱淇嘅心有啲呷醋
「好似有時佢地都會撞到一齊番嚟⋯」張萱淇喺座位前呆企咗一陣，然後走向locker，「唔知佢地講緊咩⋯？」
許洛霏喺張萱淇行緊過嚟嘅時候捧住疊書急步行番埋位，放低書後行出課室；張萱淇回頭望一望行咗出課室嘅許洛霏，然後不以為然咁打開locker門
「咦？早晨呀淇淇～」邱茗然見到忽然出現嘅張萱淇嚇咗一嚇，但好快就露出笑容
「早晨。」張萱淇嘅語氣平淡，同平時嘅佢完全唔一樣
「你好攰呀⋯？講嘢咁冇精神嘅⋯？」邱茗然輕皺起眉頭一臉擔心咁問
「可能琴晚傾電話傾到太夜瞓啫⋯」張萱淇頓時擠出笑容搖頭，「少少攰。」
「同嗰個男仔？補習嗰個？」邱茗然即刻就估到，佢即刻露出笑容：「你地成日都傾電話咁～sweet嘅？」
張萱淇冇出聲只係笑咗一笑，手喺locker拎嘢，但眼卻望住窗外漸漸放空，因為邱茗然嘅一句，觸碰到佢回想起琴晚嘅事嘅按鈕⋯
「今日我嗰班呢⋯」李雨揚喺電話中講起今日佢班上嘅事，同張萱淇分享
張萱淇每個星期都有幾晚會同李雨揚傾電話，傾完電話就瞓嗰種，有時傾到直接瞓著咗
「哈哈哈哈⋯！」張萱淇被逗笑，「下次你就直接同friend一齊癲嘛～」
「我又唔蠢，鬼要同佢一齊癲⋯」隔住個電張萱淇聽語氣都知李雨揚反咗個白眼，「呀⋯好攰呀⋯」
「去擔泥嚟？」張萱淇問道，「今日又唔洗補習你攰咩？」
「唔知呀好攰呀⋯」李雨揚早早就灘咗喺床，「你平時放學係唔係自己走？」
「好多時都係。」張萱淇答完先覺得有啲怪，李雨揚好地地做咩咁問，「做咩咁問⋯？」
「隨口問下八卦下啫～」李雨揚講道，「唔可以問咩？」
「可以可以，仲以為你要嚟接我放學添～」張萱淇半開玩笑咁講道，如果李雨揚真係嚟等佢，張萱淇大概可以開心一星期
「可以嘅。」李雨揚卻平靜咁講道，「你個friend唔會同你一齊走？」
聽到李雨揚咁樣問，張萱淇嘅笑容頓時塌落嚟，喺沉默一秒後淡定咁開口：「你做咩對我個friend咁有興趣啫？真係單純想識朋友？」
「所有嘢都有機會嘅～」李雨揚嘅回答無棱兩可，令張萱淇更鬱悶
「我係為你好，怕你失敗然後失去做中央空調嘅自信咋～」張萱淇嘅一笑唔帶任何感情，佢想用各種理由令李雨揚放棄
「唔試過又點知？」李雨揚笑言，張萱淇頓時一怔
李雨揚講嘅呢句其實冇咩意思，只係唔經大腦隨口答出嚟嘅答案，但呢句隨口講嘅說話卻記喺張萱淇嘅心入面⋯
「淇淇⋯！你有冇聽我講嘢㗎？」邱茗然企喺張萱淇嘅旁邊伸手喺佢眼前晃兩下，「你做咩發晒呆⋯？」
「呀⋯？」張萱淇回過神，呆呆咁望向邱茗然，「你啱啱講咩⋯？」
IG Link: https://www.instagram.com/nd_cotttoncandy/?hl=zh-tw