【校園】想成為您的治癒: 78. 她的標準

巴士平穩咁喺路面行駛朝住乘客嘅目的地開去，邱茗然耷低頭睇手機，殷書賢望住窗外嘅街道，好似每一日都一樣

「今晚一唔一齊睇劇呀～」許洛霏send咗個message比邱茗然

「今晚唔啦，溫地理呀⋯佢話明聽日有默書」邱茗然喺句子嘅最後加上一個傷心嘅表情

「Okay～」許洛霏好快就回覆邱茗然，「你啱啱喺學校走？」

「係呀，你又知嘅？」「你上次話你通常都會留喺學校嘛」





「做埋功課溫陣書，差唔多啦」「今日都係同人地一齊喺圖書館呀？」

「我又唔係為咗佢留喺度，只係咁啱撞到」「日日都撞到係緣份呀～」

之前同許洛霏仲係慢慢熟緊嘅狀況時，許洛霏問呢啲問題都會小心翼翼咁，但宜家好似已經可以唔忌諱咁講

「我同你喺同一班日日見，緣份大100倍」「嘻嘻我都覺」

「霏霏份人其實真係幾好⋯」邱茗然望住兩人密密麻麻嘅聊天記錄喺心裏笑一笑，「估唔到會同佢咁啱key⋯雖然霏霏都係有啲小八卦，中意聽戀愛花生，但又唔係好似八婆咁會令人討厭⋯」





「緣份嘅嘢好難講⋯」邱茗然喺心裏輕嘆一口氣，佢唔討厭許洛霏講佢同殷書賢，可能係因為佢唔討厭許洛霏亦唔討厭殷書賢

「講開又講，你中意咩類型？之前都冇問過你」許洛霏喺邱茗然一眨眼嘅功夫又send咗嘢過嚟，「我上次講咗但你未講⋯」

「因為冇特定條件」邱茗然send多個笑喊嘅emoji過去

「理想型呢？理想條件」許洛霏好感興趣一樣追問

「高過我同溫柔係必須」邱茗然只係講咗兩個條件，然後佢又補充：「溫柔係唔刻意嗰種，自然流露嗰種」





講到呢一點，邱茗然第一個諗起嘅人係佢嘅哥哥邱旻顥，可能因為由細到大都對住嘅關係，邱茗然嘅潛意識都好習慣，而且從來都覺得呢種唔造作嘅溫柔好令人心動

偽裝出嚟嘅溫柔好容易令人動心，但刻喺骨子裏嘅溫柔更容易刺中人心裏柔軟嘅一地

「冇啦？」「冇啦⋯可以有幾多？？？」

「有時真係覺得我地好啱傾～」許洛霏忽然send一個message過嚟，「即係一嚟就可以講想講嘅嘢嗰種」

「所以話做朋友要真係相處過先知」邱茗然對於許洛霏講嘅嘢好有同感，一開始講兩句就發現啱channel，心事好容易會分享比對方

邱茗然輕嘆一口氣後鎖上手機嘅螢幕，攬住書包微微耷低頭稍作休息

⋯

「咁勤力喺度溫地理？」邱旻顥沖完涼行入房，見到書枱上放住地理書、地理筆記同雞精書





「嗯⋯因為阿sir話嚟緊會有突擊同默書⋯」邱茗然手上拎住嘅原子筆戳住自己嘅下巴，「唉⋯我仲未搞明呢度呀⋯」

「邊度呀？」邱旻顥行到邱茗然隔離望住佢睇緊嘅嗰頁

「呢度。」邱茗然指住佢唔清楚嘅地方

「佢教就真係好彩，佢最中意突擊小測⋯」邱旻顥望一望邱茗然指住嘅地方，然後用佢自己以前理解嘅方法解釋比邱茗然聽

「明唔明？」邱旻顥解釋完之後問道

「明⋯」邱茗然有啲遲疑咁點頭，「好過阿sir講，解釋完都唔明⋯」

「阿sir係咁㗎，靠自己啦。」邱旻顥踏上樓梯爬上上格床灘





邱茗然再自己溫習多一陣，今晚佢唔打算睇劇，今晚佢真係打算乖乖地溫書

「真係要比心機啦⋯今次考試就真係可以話係模擬DSE⋯」邱茗然輕輕咁拍自己嘅臉頰令自己打起精神溫書

呢邊嘅邱茗然伸手拎起地理書，另一邊嘅殷書賢將中文嘅文言練習放低喺枱上，起身行出房

「今日食飯聽我講friend講起佢個仔⋯」

殷書賢一拎起碗筷，媽媽就打開話題對爸爸講，殷書賢默默咁嘆一口氣，然後當咩都聽唔到一樣繼續食飯

「係咩？佢個仔上年考到Law咁叻呀？」爸爸半敷衍咁比反應

「佢真係一門雙傑呀！兩個仔都好有本事就真。」媽媽嘅雙眸中係滿滿嘅羨慕，嗰種羨慕嘅氣氛令坐喺飯枱前安靜食飯嘅殷書賢覺得好受壓

「佢公司點解日日都係講呢啲，冇其他嘢做⋯？」殷書賢喺心裏不解咁問自己，「唔係同事個女就朋友個仔，個個都咁得閒炫耀唔洗做嘢⋯」





「書賢你比心機考到醫學院等媽媽都可以驕傲下～」媽媽果然下一句就叫住殷書賢

「嗯⋯」殷書賢抬眼望咗媽媽一眼，然後微微點頭，佢嘅回答都已經係喉嚨發音

「Keep住呢個成績又或者再上，咁一定考到嘅，唔洗擔心！」爸爸都對殷書賢充滿信心

「嗯，冇擔心。」殷書賢無奈回答，心裏反咗個大白眼：「食個飯都好攰⋯佢地番咗全日工唔攰㗎咩⋯？仲有精力折磨我⋯」

安靜咁食一餐飯，講下真正嘅日常嘢已經係殷書賢最大嘅願望，不過睇嚟冇咩可能實現

「聽新聞都好過聽學術會議⋯」殷書賢食飯嘅速度默默加快

最後一啖飯一擺落口，殷書賢咀嚼嘅速度都加快，一食完就即刻放低碗筷





「我食飽啦。」殷書賢起身轉身行番房

由細到大都喺呢個環境長大，愈大個愈覺得咁樣好煩，殷書賢都唔知媽媽係唔係真係察覺唔到佢對呢樣嘢嘅厭惡




IG Link: https://www.instagram.com/nd_cotttoncandy/?hl=zh-tw