【校園】想成為您的治癒: 54. 施壓

「冇⋯」殷書賢忽然有少少欲言又止，然後就轉身行，「我走先啦。」

「哦，好⋯」邱茗然呆呆咁點一下頭

殷書賢企喺巴士站等車，喺巴士駛嚟之前邱茗然行到出嚟到巴士站嘅後面

「嗨～」邱茗然伸手拍一拍後書賢嘅左邊膊頭，喺殷書賢向左邊擰轉頭嘅時候，邱茗然行到殷書賢嘅右邊，「又見面啦～」

巴士喺呢個時候啱啱好駛到站，兩人上咗車之殷行到上層搵個位坐低；兩人各有各戴住耳機，巴士一直向前駛





「拜拜～記得confirm我IG嘅follow request！」喺邱茗然企起身準備行落下層準備落車之前，邱茗然提一提醒殷書賢

殷書賢怔一怔，邱茗然落咗下層之後，殷書賢先擰開IG睇，見到邱茗然嘅IG request，佢冇咩猶疑就confirm，然後㩒咗follow back

⋯

夜晚食飯嘅時候，殷書賢嘅爸媽邊睇電視劇集邊食飯

「書賢呀，你有冇諗好萬一讀唔到醫咁點？」殷媽媽忽然一個回頭望向殷書賢問道





「又嚟⋯」殷書賢嘅內心有啲煩躁，但都係平靜咁開口：「讀Chem。」

「讀Chem？純Chem？你Band A有揀咩？」媽媽一臉愕然，佢以為殷書賢一定會揀同醫科有關嘅嘢

「嗯。」殷書賢瞄一眼媽媽嘅表情後，淡然咁回答一個字

「你冇擺藥劑呀？我以為你會擺藥劑⋯！」媽媽輕皺起眉頭，「你讀Chem可以有咩出路？呢行咁窄⋯」

「其實唔會冇出路，可以做科研、化學工程、鑑證、化驗。」殷書賢喺搭車番嚟嘅時候已經上網睇過一次肯定可有嘅出路，就係為咗避免媽媽突擊檢查，「有好多相關可以。」





「交咗啦？仲有冇得改呀？你將藥劑放番上去總好過Chem。」媽媽緊張咁拍殷書賢嘅手兩下

「交咗。」殷書賢平靜地講道，食啖飯之後就夾餸，「冇得改。」

「咁⋯」媽媽即刻更加擔心，「書賢你要努力考醫啦！」

「讀Chem有咩問題？」殷書賢聽到媽媽嘅一句，就好似踩中佢嘅地雷點一樣令佢即時反問

「醫生係專業人士，人工又好未來嘅路都好，所有嘢都好好多呀！」媽媽解釋，「讀藥劑唔好咩？你點解要擺Chem上去？」

「做化驗做科研都係專業，有咩咁大分別？」殷書賢唔明白，「我有擺藥劑，但佢唔喺Band A。」

「書賢你唔明咩？媽媽想你將來條路行得舒服啲，所以先想你做醫生，做醫生有咩唔好？」媽媽憂心咁望住平靜食飯嘅殷書賢，「你努力去考醫，你考到嘅話爸爸媽媽就放心晒、最開心！」

「冇咩唔好⋯」殷書賢此刻有千言萬語想講，但佢講唔出口，佢將佢想講嘅嘢都吞番入去，「書賢，爸爸媽媽唔想你將來辛苦，但你要明白，將來嘅路係你自己行，你讀書係為咗自己唔係為任何人。」媽媽一臉認真咁對殷書賢講，「所以你努力，以後得到嘅嘢都係你自己嘅。」





「讀書係為自己⋯？」殷書賢聽到之後不禁一愣，「我努力到底係⋯為咗啲咩⋯？」

殷書賢一直以嚟嘅努力讀書、努力咁去攞第一名，好似唔係以「為自己」作主要目標，主要嘅目標係為咗一份由父母施加比佢嘅期望⋯

為咗唔好令父母失望、唔好令佢地傷心、唔好令佢地覺得自己唔叻唔努力⋯為咗達到父母嘅期望所以佢先要咁努力去做好

「書賢，你信媽媽啦，讀醫嘅話，你嘅將來會好好多。」媽媽對殷書賢講道

「嗯⋯」殷書賢望向媽媽，望見媽媽一臉認真、又擺出為佢好嘅模樣，殷書賢唔想爭論所以點一點頭

「媽媽係過來人，唔會點你行歪路。」媽媽微笑道

所有父母都會認為自己係過來人，所以潛意識中會認為「我講嘅嘢係啱，你聽我講就得」，但可能連佢地都冇察覺到呢種想法先會令仔女喺通往未來嘅路上一直卻步





「嗯，我飽啦。」殷書賢冇意再聽，拎紙巾抹個嘴就番房

⋯

「我番到啦」張萱淇喺踏入屋企門口嘅同時send咗個message比李雨揚

「Okay收到」李雨揚好快就睇咗message回覆

張萱淇同李雨揚好多時都會一齊放補習，而李雨揚喺落車前都會提張萱淇番到屋企同佢講聲

張萱淇見到李雨揚send比佢嘅一個可愛貼圖嘅時候不禁甜甜一笑

「有時係真係幾warm嘅～」張萱淇窩心一笑，但笑容露出唔夠兩秒，張萱淇嘅笑容就塌咗落嚟，「不過，佢應該對個個都一樣⋯」

中意一個中央空調係一種咩體驗？就係佢對你做嘅每一件貼心事都好似會對所有人做一樣，而你只係眾多個中嘅某一個人；喺你覺得好窩心嘅時候，佢又用同一種溫柔令幾多個人窩心？





「下次補習見啦」李雨揚坐喺梳化上拎住手機，「下次同你食好嘢」

「哦哦，最好真係啦，唔好又臨時話約咗其他女」張萱淇不滿咁回覆道，「有女萬事足啦」

「下次唔會，真係，答應你」李雨揚笑一笑回覆張萱淇

「又答應我呀？你次次都咁講㗎啦～」張萱淇望住李雨揚嘅回覆搖搖頭，「你當我小朋友？你講我就信呀？」

「做咩唔信我？我對你好好囉」李雨揚回覆道，「對你最好囉」

「多謝喎⋯」張萱淇有啲不屑咁回覆道，李雨揚講嘅嘢張萱淇都唔敢盡信

望住本來一直係秒回嘅message突然間冇咗藍剔，張萱淇就覺得李雨揚一定又係覆緊其他女仔，而李雨揚的確係覆緊其他女仔⋯





「你睇下⋯又係咁樣啦⋯」張萱淇望住手機自言自語地講道，「講就天下無敵⋯」

張萱淇有時都覺得自己好蠢，居然會對李雨揚呢種人有好感⋯自己唔通期待李雨揚真係會為咗自己而改變？真係會因為自己一個微不足道嘅人而疏遠其他女仔？

「算啦⋯放棄啦⋯」張萱淇嘆一口氣，佢有啲無奈，「及時止損⋯」

李雨揚飲咗啖水之後拎起手機睇IG，本來只係隨便睇下其他人動態嘅佢喺睇到某一個po嘅時候停咗落嚟

「有啲過去，唔係可以隨隨便便咁輕易放低」喺一張影住女仔嘅側面嘅「港女相」嘅下方留下咗一句caption

李雨揚望住呢張相嘅caption時愣一愣，呢個女仔係佢嘅朋友們口中講嘅嗰個人，係佢介意身邊人提起嘅嗰個人⋯




IG Link: https://www.instagram.com/nd_cotttoncandy/?hl=zh-tw