【校園】想成為您的治癒: 46. 第一名拜托

雖然話係同班同學，但其實唔係真係咁熟，只係上個月sports day咁啱一齊做工作人員所以先熟咗

「想快啲番到學校⋯唔熟真係好尷尬⋯」邱茗然表面若無其事，但卻下意識加快咗腳步

殷書賢正朝住學校嘅正門行去，佢將耳機除落嚟放番入耳機盒中，佢回頭望咗一眼，邱茗然嘅身影喺一秒內就映入眼簾

邱茗然感覺到有人望自己，佢嘅目光跟住視線嘅方向望去，同殷書賢對上眼嘅佢對對方微微一笑

殷書賢冇露出笑容，而係默默咁收回視線





「心情唔好呀⋯？」邱茗然見到後就諗到一個可能係嘅原因，「有壓力⋯？」

邱茗然望住微微耷低頭行喺佢正前方、著住長袖冷衫嘅殷書賢，感覺佢成個人嘅氣場都唔好，感覺特別壓抑⋯

「每次一講讀書，佢嘅表情都好唔一樣⋯好緊張、好認真⋯」邱茗然望住殷書賢嘅背影，回想起每一次見到殷書賢嗰陣嘅狀況，「好似好從容嘅表情，但令人覺得佢只係逼自己當冇事⋯」

手上嘅傷痕，已經證明咗殷書賢嘅內心有幾壓抑，為咗唔令其他人失望、為咗佢嘅目標，佢一定要去完成「任務」

「唔知包朱古力，佢有冇食⋯」邱茗然記得自己上次比咗包朱古力佢，有啲好奇殷書賢有冇食到





「你話呢？」許洛霏冇留意到邱茗然處於放空狀態，佢笑笑口問邱茗然

「呀？」邱茗然即刻回神望向許洛霏，其實佢咩都只係聽到少少又聽唔到少少，但為咗避免尷尬，佢只好笑道：「嗯！我有睇呀～」

⋯

「嘟嘟嘟嘟、嘟嘟嘟嘟！嘟嘟嘟嘟、嘟嘟—」「叮噹叮噹～叮噹叮噹⋯」

代表測驗結束嘅計時器響起嘅同時，轉堂嘅鐘聲都響起





殷書賢將筆放低喺枱上，隨即輕呼一口氣，感覺今次嘅測驗自己有啲失準⋯

「將卷喺後面傳上嚟啦！」阿sir一講，大家都自動咁將卷掀番去第一頁然後向前傳

「殷書賢！後面兩題識唔識？」謝澤謙嘅卷一離手，即刻就追問殷書賢

「唔肯定啱唔啱。」殷書賢將原子筆收入筆袋，同時又準備上下一堂

「你咪信佢，佢咁講得即係佢識做。」張思群先唔信殷書賢講嘅嘢，「佢次次都話唔肯定但次次都啱。」

「咪好似啲人話測驗冇溫書然後考最高分咁囉～」趙遠寧嘆氣搖頭，「我地班最多呢啲人～」

「我冇話過我冇溫書。」殷書賢拎出下一堂嘅書放到枱上，「Miss嚟啦，你番位坐啦。」

「清空枱面，派test。」Miss踏着悠閒嘅步伐慢悠悠咁行入課室，行到老師枱前將教材放喺枱上，「唔嘥時間，跟學號出嚟拎卷啦。」





殷書賢嘅學號係男仔嘅最後，佢好專心咁聽住Miss喺比卷嗰個人嘅時候有冇講咩備住

「趙遠寧，全班第三高分啦。」Miss喺遞卷比趙遠寧嘅時候講道

「Yes⋯！」趙遠寧細聲地表達佢嘅興奮同時握一握拳

坐喺位等緊卷嘅殷書賢有啲在意緊張，心入面卻有少少覺得好彩趙遠寧係第三高分

「平時爭第一嘅得佢⋯上次佢已經高分過我，今次唔會又係咁呀⋯」殷書賢悄然地望向佢嘅競爭對手

佢嘅「對手」係喺中五下學期考第一名嘅女仔，沉默寡言嘅佢，永遠都係考第二，其他人私下稱呼佢為「萬年二姐」

「上次比佢考咗第一名之後，行過望到我嗰陣都特別得戚。」殷書賢心中不忿地道





本來比人叫做「萬年二姐」已經好唔服氣，仲要次次都掛喺殷書賢後面緊貼佢嘅名次，所以上個學期贏到殷書賢呢個長勝將軍，對佢嚟講係一個大事

「仲有兩個到我。」殷書賢見已經差唔多，就起身行出去排定隊

佢行到老師面前嘅時候，本來想瞄一眼分數睇下自己同趙遠寧差幾多分，但可惜Miss將寫住分嘅角落卷起先遞卷

「睇唔到幾多分⋯唔好係第二呀⋯」殷書賢見Miss遲遲都未開口，心臟不禁加速

「殷書賢，全班兼全級最高分。」Miss緩緩開口，以一個已經習以為常嘅平淡聲線講道

「嚇死我⋯」殷書賢悄悄地鬆一口氣，「係第一名就得。」

其實统測對佢嚟講唔係咩好困難嘅事，只係花時間溫書就可以去考，但真正重要嘅，係「第一名」呢個冇咩意義同時又有啲意義嘅名銜

「都估到係咁㗎啦⋯」謝澤謙對於喺意料之中嘅事覺得無趣，殷書賢一番嚟佢就即刻講道，「上次又話冇溫！又話唔肯定？」





「我冇話我冇溫，而且我講你都唔會信。」殷書賢坐低喺位，以平靜嘅聲線回答

「溫書對你呢啲人嚟講，係稍微咁努力一下，令已經有99%嘅記憶鞏固到變成100%，多謝晒。」謝澤謙反咗個白眼，有時佢都好想同殷書賢交換個大腦，就算係一分鐘都好

「我都想過目不忘⋯」殷書賢邊掀卷邊細聲道，佢第一件事要做嘅係睇下錯咗邊度，分數喺邊度失咗

對於滿滿都係紅色剔嘅題目，殷書賢冇咩太大感覺，直到見到一剔一點同交叉，殷書賢輕皺起眉頭

「陣間lunch請嘢飲呀殷書賢。」謝澤謙對殷書賢講道

「我又唔係最低分，測驗嗰日你話最低分嗰個請。」殷書賢即刻喺腦海嘅深處搵番當日嘅記憶出嚟

「你咁都記得⋯」謝澤謙無奈地講道，然後靠上櫈背朝張思群嘅方向望去，「咁即係唔係我就係張思群啦⋯」





兩人互相向對方展示自己嘅分數，張思群瞇起雙眼望住謝澤謙嘅卷，然後隨即高興咁笑起嚟

「多謝晒～」張思群用口型對謝澤謙講道，因為佢嘅分數比謝澤謙高兩分，「請嘢飲啦謝澤謙。」

「唉。」謝澤謙用一個短嘆氣嚟表達自己嘅無奈，「睇嚟我都要更努力先得啦⋯」




IG Link: https://www.instagram.com/nd_cotttoncandy/?hl=zh-tw