【校園】想成為您的治癒: 44. 幫忙

「攰死啦⋯！」許洛霏嘅朋友行過嚟，雙手搭住許洛霏嘅膊頭，「霏霏你咁快跑完嘅～」

「都係快兩個來回啫～」許洛霏笑道

「霏霏，啱啱我地話放學之後去旺角食嘢，你去唔去呀？」其中一個女仔問許洛霏

「陣間？好呀⋯」許洛霏望住大家開心嘅表情都笑一笑點頭

「上次嗰條手鏈，我地一齊買呀～」「講明先呀！我唔要黃色嗰條！」





「呀～好想去多次嗰間餐廳，上次見到嗰個男仔，都冇再撞過佢⋯」「你小心你條仔聽到會嬲呀～佢好小氣㗎～」「多謝提醒喎～」

許洛霏喺一旁聽住佢地講嘅嘢，同佢地一齊笑

有時佢都唔明，佢地點忍受到自己男朋友同自己嘅朋友一齊過呢件事，唔尷尬咩？

「霏霏呀，我地帶你識下仔仔呀～咁唔洗成日喺我地一講呢啲話題你就唔出聲嘛！」另一個女仔從旁邊攬住許洛霏

「我要求好高㗎！」許洛霏開玩笑地講道，「我中意啲陽光得嚟又有啲幽默⋯」





「不過都要睇樣！」「哈哈哈哈哈⋯！」

似乎女仔同女仔之間都有啲共通點，每個女仔嘅心入面都住咗個外貌協會嘅人格

不過女仔嘅圈子中嚟嚟去去都係講呢啲少女心事，但一班人嘅友誼要維繫比兩、三個人之間嘅友誼更難維繫⋯

「叮噹叮噹～叮噹叮噹⋯」落堂嘅鐘聲響起，C班嘅人著住直接PE衫離開學校

「咁我地仲去唔去呀？嘉敏同瑤瑤都話唔去⋯」其中一個女仔問





「咁下次先囉⋯」另一個女仔講道，「我地下次再一齊去囉～」

佢地見今日去唔成，就決定改日齊人去；許洛霏同唐曉瑩一齊走，行到去分叉路口嘅時候，佢兩個就同其他人分別

「拜拜～」「拜拜，聽日見～」

「你呀，聽到話今日去唔成鬆咗一口氣咁～」唐曉瑩見其他人行遠咗便講道，「你大可以同嘉敏佢地一樣，唔想去就話唔去嘛～」

「大家咁開心，唔想掃興嘛⋯」許洛霏扁起嘴，微微苦笑着，「不過其實我覺得有啲突然⋯」

「我都覺呀～所以其實我都鬆咗一口氣。」唐曉瑩拍拍心口笑道

許洛霏同唐曉瑩邊行邊笑，講下今日上堂嘅趣事、無聊事，講下今日喺早會嗰陣有幾眼瞓

只有同唐曉瑩一齊嘅時候，許洛霏先會覺得可以暢所欲言





另一邊廂，熱到面紅嘅邱茗然坐上巴士，今日佢唔太想留喺學校，因為今日上完PE堂成個人好似散晒一樣

「仲未番得屋企住⋯買埋嘢再番去都唔遲⋯」邱茗然企喺平日放輪椅嘅位置，平時佢落車嘅站已經過咗

邱茗然戴住耳機望住窗外，將自己同外面嘅世界隔絕開，用音樂洗滌今日疲倦嘅心靈

巴士駛到埋站緩緩停低，兩邊嘅車門打開

「嗶⋯！」「唔好意思⋯！」

喺車頭嘅拍卡機發出八達通餘額不足嘅聲音，邱茗然望向車頭嘅方向，一個男仔行到一旁喺褲袋拎出幾個大大細細嘅硬幣湊數

「唔夠錢⋯？唔係可以放紙幣咩？雖然好蝕。」邱茗然冇多理，緩緩撇開臉望向車窗外面





嗰個男仔嘅餘光留意到企喺離佢最近位置邱茗然，於是鼓起少少勇起走向佢：「唔好意思⋯」

邱茗然將右耳嘅耳機從耳中拎出嚟，疑惑地望住企喺佢眼前著住校服嘅男仔

「我八達通冇錢，我又唔夠散銀⋯你有冇$2？」對方禮貌咁問道

「哦⋯有呀⋯」邱茗然從裙袋中拎出一個$2硬幣遞比眼前嘅男仔

「唔該。」男仔接過$2後，連忙行去車頭入錢

邱茗然再一次戴上耳機，本來嘈吵嘅聲音一下子消失

邱茗然稍微打量一下啱啱嗰個男仔，見到佢身上著住嘅校服係喺呢度附近嘅一間學校校服

「知啦，嫲嫲你唔好周圍去啦⋯我過緊嚟㗎啦！」嗰個男仔拎住電話，講嘢嘅語氣好溫柔，「你同爺爺坐低等我啦！我搭緊車㗎啦，唔好周圍行呀！」





嗰個男仔望向邱茗然，面帶笑容對邱茗然點一點頭，邱茗然都禮貌咁微微點一下頭作回應

「好攰⋯快啲買完嘢就番去⋯」邱茗然放住窗外嘅街景放空，「想快啲番去沖涼⋯」

⋯

「答⋯答⋯答⋯答⋯」

喺緊閉嘅房門後好安靜，書枱上嘅時鐘發出秒針行走嘅聲音格外清晰；除咗秒針嘅聲音，房間內就只有掀書頁嘅紙聲

「十點四⋯」殷書賢靠住櫈背坐，微微抬起頭望向時鐘

殷書賢將眼鏡推起揉眼，戴住眼鏡溫咗三個幾鐘頭書嘅佢，感覺眼鏡都要痴住喺佢嘅鼻樑上面





「休息⋯」殷書賢將枱上嘅書合上，頹廢咁靠住櫈背拎起手機睇

殷書賢先啱啱拎起手機，房門就比人打開；殷書賢嘅眉頭輕輕一皺，然後回頭望向門口

「你淨係開枱燈夠啦？對眼唔好呀⋯」殷媽媽一打開門見到閂咗房燈、只留枱燈嘅睡房，即刻皺起眉頭望向房燈，「自己都已經要戴眼鏡，都唔好好保護對眼？」

「嗯。」殷書賢只係冷淡咁嗯咗一聲

「你宜家喺屋企都唔太講嘢，有時我地都想知你點諗⋯」殷媽媽行到殷書賢嘅身後，伸手搭住殷書賢嘅膊頭上，「你以前都唔係咁樣，有時都分享下嘛～」

殷書賢滑屏幕嘅動作停咗落嚟，佢默默咁吞一啖口水⋯

喺呢一刻有好多字組成好多唔同嘅句子，佢想解釋、想回答媽媽呢個疑問




IG Link: https://www.instagram.com/nd_cotttoncandy/?hl=zh-tw