【校園】想成為您的治癒: 19. 生日
邱茗然拎住黑色膠板企喺負責計算高度嘅同學隔離，對方同佢講咗高度，佢就拎起筆寫低
「Okay，二跳，下一個。」負責老師見佢地都記錄好之後道
邱茗然抬頭，目光好快就落喺接住落嚟二跳嘅同學身上
「下個係⋯殷書賢。」邱茗然低頭望一眼手上嘅記分板，拎起筆準備mark數，「佢啱啱一跳嘅成績都唔錯，二跳同三跳應該都唔會失手⋯」
企喺一旁嘅負責老師點一點頭示意可以二跳，邱茗然望住殷書賢，殷書賢嘅右腳踏後一小步借力將自己推出去
頭髮隨住助跑時迎嚟嘅風微微被吹起，佢輕鬆地邁步助跑，佢喺腦海中稍微計算距離，喺差唔多到中間點要起跳嘅時候，殷書賢微微側身背向軟墊起跳，佢嘅背同水平放嘅橫桿仲有一段空隙
「啪！」殷書賢落喺軟墊上嘅聲音好響，佢坐起身行開，一副預咗自己會跳到呢個高度嘅模樣
邱茗然見到殷書賢輕鬆完成嘅時候，心入面都不自覺鬆咗一口氣；殷書賢行番去佢原本嘅位置，拎起放咗喺地上面嘅水樽，扭開樽蓋飲咗啖水，然後又將水樽放番喺地上
「陣間仲有三跳。」邱茗然攬住膠板微微左右搖晃，目光朝殷書賢瞄一眼，「學霸原來都唔係淨係文理雙全，體育都唔差嘛～」
殷書賢彎腰將水樽放低，喺再次企好半彎腰嘅狀態時，見到邱茗然偷偷地瞄咗佢一眼
「6E18⋯」邱茗然又再望一眼，今次佢望向殷書賢身上嘅號碼布
佢地嘅「號碼布」其實只係一張用密實袋裝住嘅顏色紙，然後再用小扣針扣喺運動衫，大概喺小腹左右號位置上
「嗯？」邱茗然嘅目光下意識向上望，然後喺無預警嘅情況下同殷書賢對視，邱茗然莫名其妙地有啲心虛，只好一笑，「嘻⋯」
殷書賢耷低頭望一眼自己身上嘅號碼布，佢好奇自己嘅號碼布係唔係有啲咩咁特別，都只不過係有班別同學號
「嗯？佢呢個困惑樣⋯？睇我嘅號碼布？」邱茗然見殷書賢望向自己嘅眼神中夾雜着一絲疑惑，於是拎開本來攬住嘅膠板，耷低頭望一望自己嘅號碼布後拉一拉自己嘅運動衫
豈料殷書賢見到邱茗然嘅舉動後神色略帶尷尬地將視線移開，邱茗然一頭霧水：「佢做咩咁尷尬？」
⋯
喺三跳完成之後，殷書賢同謝澤謙準備行離跳高比賽嘅地方番班嘅看台
「喂！」謝澤謙行到殷書賢嘅身旁，伸手一下就順手搭住殷書賢嘅膊頭，「啱啱咁好成績，應該有獎牌啦～」
「點知。」殷書賢微微聳肩
「睇嚟殷書賢會有獎⋯」邱茗然望咗計分紙一眼，見到老師用筆圈起咗殷書賢嘅名，「呀⋯陣間乙組比賽，我可以番去班休息一陣⋯」
邱茗然喺等待負責乙組嘅同學過嚟時，佢攬住膠板坐喺跳高比賽區嘅旁邊，坐喺太陽遮下面等
「今日好曬呀⋯陣間唔想跑步呀⋯」邱茗然頹廢地靠住櫈背，「都唔知今日咁曬一曬會黑幾多⋯」
邱茗然望向遠處，見到乙組跳高嘅人慢慢咁行緊過嚟，即刻坐好然後迅速起身，一連串嘅動作敏捷到不得了
「咦⋯？邊個樽水？」邱茗然一起身，就見到孤獨咁喺地上嘅一樽水，「放得喺地一定唔係工作人員啦⋯」
邱茗然行到去樽水面前，微微彎腰將佢拎起，努力地回想一下邊個啱啱拎住水過嚟
「好似係佢，佢飲過呢枝水⋯」邱茗然諗起啱啱見過疑似物主拎起呢樽水飲過嘅畫面
「去唔去買嘢食？好肚餓比完賽⋯」謝澤謙喺行到番去佢地班坐嘅看台位置時問
「我唔餓，你買啦。」殷書賢微微搖頭，轉身踏上一級
「你唔買嘢飲呀？」謝澤謙喺殷書賢番上看台前又問道
「陣間食飯先，我有帶水⋯」殷書賢提手本想係想示意自己手上有水樽，但一提手先發現，水樽唔喺手上，「我樽水呢？」
「哈哈⋯！你舉手做咩？神父送祝福呀？」謝澤謙見到殷書賢一臉愣住嘅罕見表情，忍唔住就笑出聲，「不過，你啱啱唔係仲拎住去集合咩？」
「係⋯可能漏咗喺跳高嗰度⋯」殷書賢回頭望向跳高比賽嘅地方，「你去買嘢食，我去拎番。」
殷書賢講完就自顧自邁步行去跳高比賽嘅地方，謝澤謙都趕唔切再講多一句
「喂！你真係唔洗⋯」謝澤謙企喺原地望住殷書賢嘅背影無奈地道，「唉⋯都唔聽人講嘢⋯」
殷書賢行到嚟啱啱跳高比賽嘅地方，邱茗然見到殷書賢時微微側着頭
「佢終於記得自己漏咗樽水喺度冇拎走啦？」邱茗然微微耷低，嘴角以微小嘅幅度上揚偷笑
「有冇見到一樽水？我啱啱唔記得拎。」殷書賢開口問道
「呀，呢度⋯」邱茗然彎腰，將放喺旁邊嘅水物歸原主，「呢樽係你嘅？」
邱茗然其實親眼望住殷書賢拎枝水過嚟，只係為免搞錯，所以再確認一次
「係，唔該。」殷書賢伸手接個樽水，然後轉身離開跳高比賽嘅位置
殷書賢拎住水樽轉身離開同時順手咁扭開樽蓋飲水，忽然佢發現樽底好似有啲痴住咗
「咩嚟⋯？」殷書賢口入面含住啖水，喺扭番樽蓋同時吞下口中嘅水，左手摸一摸樽底將貼喺樽底嘅嘢拎落嚟
「聽到你啲frd話你生日，生日快樂，祝你拎到獎牌」
殷書賢打開memo，見到入面熟悉嘅字跡，好快就回頭望向仍然喺跳高比賽區幫手嘅邱茗然
邱茗然冇望過嚟，專心地做自己嘅工作
「希望有獎啦真係～」殷書賢將memo紙摺番好放入褲袋，拎住樽水就番去看台
IG Link: https://www.instagram.com/nd_cotttoncandy/?hl=zh-tw