【校園】想成為您的治癒: 18. 陸運會

「你唔係得上年學期尾⋯」邱茗然想講嘅說話只講咗一半，因為佢都已經諗到，殷書賢呢種一直考第一名嘅人，又點可能接受自己考第二名

第二名，代表唔夠努力、唔夠盡力、唔夠人叻，代表住一種失敗，一種長勝將軍眼中嘅失敗

「要一直保持喺第一名，係要花幾多嘅時間，幾多嘅努力？」邱茗然彷彿自言自語一樣細聲道，佢冇親手感受過但佢亦可以理解，「仲要今年係中六，要考DSE考大學⋯壓力大係正常嘅～」

「冇人會聽第一名跌落第二名嘅解釋。」殷書賢直接道出事實，係一個佢好清楚，一直經歷緊嘅事實，「只會話第二名考到第一名有幾叻。」

「咁現實㗎⋯都唔可以樂觀啲咁諗咩⋯？至少我考個第二名，我都叫有好努力過呀！」邱茗然喺心裏無奈道，輕輕抿唇後，柔和嘅目光落喺殷書賢嘅前臂上，「鎅手痛唔痛⋯？係唔係好痛㗎？」





殷書賢微微轉頭望向邱茗然，直接從褲袋拎出鎅刀遞比邱茗然：「試下咪知。」

「吓，我先唔要⋯我怕痛。」邱茗然連忙搖頭，將頭埋喺雙臂中，「唔似你。」

殷書賢嘅左手將頂喺鼻樑上嘅眼鏡除落嚟，用指腹輕輕揑鼻樑，一直戴住眼鏡睇書上嘅字，雙眼又攰又乾

「你好攰呀⋯？」拎起數學書同數簿嘅邱茗然見到殷書賢嘅舉動便關心道

「眼攰。」殷書賢再次戴上眼鏡打算繼續溫書





「唔⋯哦。」邱茗然離開殷書賢身旁嘅位置，朝住自己本來坐緊嘅位置行咗兩步，猛然一個回頭行番去殷書賢旁邊，微笑問道：「喂喂，去唔去天台行轉呀？」

⋯

「拜拜～我就到啦～」邱茗然從座位起身，喺巴士駛緊去下一個站嘅時候起身，捉住扶手小心翼翼咁企出走廊

「拜拜。」殷書賢微微點頭，目光同邱茗然短暫咁對望一秒

邱茗然捉實扶手跌跌撞撞咁向前行，等巴士停定之後先匆忙落樓梯





手機突如其來嘅鈴聲從耳機傳出，殷書賢將面向下嘅手機一翻，隨即輕皺起眉頭

「喂？書賢？」電話一接通，就傳嚟媽媽嘅聲音，「你係唔係番嚟食呀？番到邊呀？定你今日溫書唔番嚟食？」

「我番緊嚟。」殷書賢喺媽媽一連串嘅提問後淡然回答

「你唔喺學校溫書啦今日？」喺殷書賢打算收線之際，媽媽追問道

「我溫完書番緊嚟。」殷書賢再加上重點字眼重複一次

「哦好啦，我以為你仲喺學校溫緊書。」媽媽笑道，但殷書賢完全笑唔出

「溫到攰，番緊嚟。」殷書賢疲倦地托住頭，無神地望住車窗外嘅街景

「有冇咁攰？」媽媽唔理解殷書賢嘅攰，笑一笑問，「溫個書有幾攰？我番工仲攰啦⋯」





「嗯，收線先啦，就落車。」殷書賢嘅內心瞬間覺得煩躁，直接就收咗線

殷書賢望向窗外，佢都唔知到底由幾時開始，佢同媽媽嘅關係變得咁疏離⋯好似離DSE愈近，佢同媽媽嘅關係就愈拉得遠⋯

⋯

一個星期後，陸運會當日

「茗然！」張萱淇跑向邱茗然，衝上去攬住邱茗然，「早晨呀～」

邱茗然比突然出現嘅張萱淇嚇咗一跳，呢個時間係喺班集隊，班主任點名嘅時間

「今日我地冇得痴住一齊啦⋯」張萱淇失落地講道，「我要去做工作人員幫手計時啦⋯」





「唔緊要！我都去做工作人員！」邱茗然豎起手指公比個like，「雖然係比Miss Choi強制我去幫手⋯」

「我地晏就一齊食lunch呀～」張萱淇痴住邱茗然，一啲都唔覺得熱

「好呀～」邱茗然輕輕推開張萱淇，嫌棄地講道，「好熱呀，唔好痴到實一實⋯！」

喺陸運會嘅開幕禮完結後，張萱淇同邱茗然聽到工作人員嘅召集時，便離開班嘅看台去工作崗位

⋯

「甲組男子跳高、甲組男子跳高，請到20號看台集合。」隨住召集廣播喺運動場內響起，邱茗然拎住點名紙跟喺負責老師旁邊，走向20號看台等其他人嚟集合

「喂！生日快樂喎！」同樣報咗跳高嘅謝澤謙行到殷書賢嘅身旁，手自然而然地搭住喺殷書賢嘅膊頭上

「多謝。」殷書賢淡然一笑，佢一直都唔太將生日呢樣嘢放喺心





「喂！生日要點樣？要心想事成係唔係？」趙遠寧好似嚟湊熱鬧一樣，用手肘撞殷書賢一下，「我另外再祝你⋯」

「祝埋你年年有餘，歲歲平安添呀！」張思群打斷趙遠寧嘅說話好似要搶住講一樣

「我已經好平安，少啲同你地一齊癲會更平安⋯」殷書賢無奈地講道

「原來今日係殷書賢嘅生日呀⋯」行喺佢地後面嘅邱茗然聽到謝澤謙佢地同殷書賢嘅對話，心入面好少少好奇

「你想點慶祝先！做兄弟一定幫你實現！」趙遠寧一臉認真講道，佢最中意喺呢啲事上面湊熱鬧

「想放煙花定唱生日歌？」謝澤謙明知殷書賢最怕呢啲尷尬事仲特登問佢，「邊樣先？」

「放煙花係咩事？」殷書賢忍唔住笑問道，「你兩個又跳高咩？做咩跟埋過嚟集合？」





「喺你比賽前為你送上生日祝福，獎牌手到拿來。」趙遠寧用力地握起拳頭，送上佢最大嘅祝福

「多謝住先。」殷書賢對有冇獎牌呢件事，其實唔太在意，佢更加在意今日放學番屋企之後要先溫M2嘅測驗定係先溫Chem嘅測驗好




IG Link: https://www.instagram.com/nd_cotttoncandy/?hl=zh-tw