【校園】想成為您的治癒: 16. 煩惱
「喂！你又唔帶筆！」張萱淇一下就捉住李雨揚嘅手腕，瞇起眼盯着李雨揚，「你上次枝筆都未還！」
「我有帶過嚟呀今次！」李雨揚從書包嘅前隔拎出張萱淇上次借比佢嘅超好用原子筆，「不過借多一日先，我今日都冇帶筆，得呢枝⋯」
「哼⋯！你下次記得還比我呀！」張萱淇再三叮囑道
「知啦知啦～」李雨揚側一側身湊近張萱淇，用膊頭撞一下張萱淇，「下次還比你囉～」
張萱淇拎住筆嘅右手托住臉頰，耳仔聽緊補習名師講課，眼睛卻一直不經意地偷望李雨揚；李雨揚邊覆message邊聽書，手一直轉筆，張萱淇見到之後默默地反個白眼
「唉～聽書⋯！」張萱淇輕嘆一口氣，然後坐好個人聽書，「唔理佢⋯」
⋯
坐喺書枱前溫緊書嘅邱茗然喺聽到開門聲，一下子將櫈往後推衝出去，企定喺門口迎接
「你企喺度做咩？」打開門入屋嘅邱旻顥見到邱茗然就企喺門前等佢
「你係唔係帶買糖水番嚟呀？」邱茗然指住邱旻顥手上拎住裝住一個發泡膠碗嘅膠袋，「唔知係唔係我想食嘅糖水呢～」
「唔係呀，我買咗我中意食嘅糖水⋯」邱旻顥將外賣糖水遞向邱茗然，「咁你食唔食？」
「食！一定要食！」邱茗然高興接過糖水衝到餐枱前坐低
「你睇下哥哥幾錫你呀，你話想食糖水就即刻買比你食。」媽媽嘅臉上掛上柔和嘅笑容，見到佢地兄妹感情好，佢都好安慰，「哥哥你食咗飯未？」
「食咗啦，同李逸彤一齊食埋先番嚟。」邱旻顥邊解鞋帶除鞋邊講道
「番學好攰呀？你今日好似咁攰嘅？」媽媽望住邱旻顥冇精神嘅眼神擔心咁問
「最近多assignment嘛⋯」邱旻顥行番房閂上門換衫
「又唔見你問下我係唔係攰⋯咁偏心哥哥㗎⋯」邱茗然聽住媽媽對哥哥嘅關心，喺心入面細聲抱怨，「人地屋企都係偏心細嗰個，我屋企就偏心大嗰個⋯」
雖然邱旻顥好錫佢好寵佢係真，佢亦好清楚咁知道，但只係比起哥哥，邱茗然更在乎媽媽對佢嘅關心
「唉～」邱茗然嘆一口氣，耷低頭繼續邊食糖水邊睇手機，「食糖水⋯」
邱茗然嘅糖水食完糖水就好快番房溫書，聽日有個數學小測，佢仲做緊練習題，希望聽日小測嘅內容自己都識做就好
另一邊廂，殷書賢沖完涼喺廁所換緊衫，喺著上居家服之後，殷書賢提起自己嘅左手，望住自己手上嘅鎅痕，今日又為佢嘅左手加多咗一道近嘅傷痕
「嘖⋯最近溫親書都記唔到入腦咁⋯」殷書賢拎起風筒吹頭，吹喺頭髮上嘅暖風令佢成個人又溫暖咗少少，「再咁落去都唔係辦法⋯」
殷書賢耷低頭合上雙眼，右手拎住風筒，左手撥着濕漉漉嘅頭髮，大腦卻努力地回想緊今日學咗嘅內容，重溫一次今日所學
「房門做咩開咗⋯我去沖涼嘅時候唔係掩埋咗⋯？」殷書賢行出廁所，就見到自己嘅房門打開咗
殷書賢行到番房，見到媽媽正企喺枱前，手上拎住本來放喺佢枱上嘅揀科紙，係學校喺佢地正式提交Jupas嘅揀科內容前要佢地先填嘅一張draft
「書賢，你仲未填好呀？」媽媽察覺到殷書賢番到嚟房，轉頭望向殷書賢好奇道
「嗯。」殷書賢行到書枱前，直接繼模擬表從媽媽手裏輕輕抽走，對摺擺番入file
「仲溫緊書呀？」媽媽望向殷書賢嘅書枱，掀開嘅書、練習題同筆記簿堆滿喺殷書賢嘅枱上，「你成日都喺屋企著外套唔熱咩？」
「唔熱，外套好薄而且有開冷氣。」殷書賢收拾好枱面
「哦⋯你繼續溫書呀？」媽媽讓開一個位置，行到房門前時問道
「唔啦，瞓啦。」殷書賢講道，然後將書放番入書包
殷媽媽喺行出去前再望多一眼殷書賢，佢心入面覺得，佢個仔好似慢慢咁變得唔中意講嘢，什至連笑都好少再見到
殷書賢閂上房門，佢更中意自己一個人安靜咁喺房，喺閂燈灘喺床準備瞓嘅時候，佢嘅大腦仍然諗緊揀科同未來嘅事⋯
⋯
今日嘅高中週會，學校特登請咗個社工輔導員嚟講下有關壓力釋放嘅問題；大家坐喺禮堂，聽住社工好似同大家傾計一樣嘅講解
「宜家成日都話讀書好大壓力呀，咁其實要做啲咩去釋放呢？」社工拎住咪喺兩邊座位中間嘅通道邊行邊問，「中四嘅要面對啱啱上嚟高中嘅課程壓力，中五可能好多測驗之類啦～咁中六就更加容易有好大壓力啦，嚟緊又要考DSE，要揀大學⋯咁可以點樣去減壓呢？」
社工行到A班坐嘅位置，隨便問個同學：「你呢？你會點樣減壓？」
「我會煲劇⋯」喺同學回答嘅同時，張萱淇轉身細細聲對邱茗然講道
「你日日都煲劇，你一定係減壓大師～」邱茗然嘅上前傾前湊近張萱淇細聲笑道
「洗乜講～」張萱淇一臉自豪地講道，「我不嬲都係啲好chill嘅人嚟～」
社工問咗幾個同學後行番去螢幕前，又同大家講下其他延續話題
喺ppt跳到新一頁之後，殷書賢望住ppt上嘅內容，下一秒就微微耷低頁將視線移開
「點解會有啲心虛⋯」殷書賢喺心入面有啲不安地笑一笑，下意識就拉一拉冷衫嘅衫袖
「有啲同學就搵到減壓方法啦～聽歌睇電視呢啲啦係咪？」社工指一指螢幕，指住新一頁嘅ppt，「但有啲人會揀唔好嘅方法去減壓，例如一啲傷害自己嘅行為，又或者係⋯」
邱茗然聽到呢度，借意望其他地方轉頭望向坐喺佢地班斜後方嘅E班，當然佢望緊嘅係一個會揀呢種唔好嘅方法減壓嘅同學
IG Link: https://www.instagram.com/nd_cotttoncandy/?hl=zh-tw