【校園】想成為您的治癒: 15. 搭話
殷書賢諗起琴晚喺屋企嘅時候，媽媽問佢Jupas打算點揀，係唔係會擺醫學院喺A1，殷書賢諗到就覺得煩
「A1擺醫科，咁A2、3擺咩呀⋯」殷書賢苦惱地沉思着，微風似乎冇吹走佢嘅煩惱，煩惱嘅事將佢包圍住，「讀醫真係好咩⋯？唉⋯」
邱茗然邊伸懶腰邊行近矮牆，佢只係想喺溫完書有啲攰嘅時候上嚟行個圈再番屋企，有時覺得吹下風個人都會冇咁攰，伸個懶腰都會精神啲
「原來你仲喺度呀？」邱茗然行到離殷書賢三步嘅距離，微微側着頭望住殷書賢
殷書賢聽到邱茗然把聲之後慢慢咁從Jupas揀科嘅事入面回神，佢望向右邊，見到邱茗然企咗喺度望住佢
「未走⋯上嚟休息下。」殷書賢喺回答嘅同時迅速地將被推起嘅衫袖拉番落嚟
「哦⋯」邱茗然微微點頭
「點解又會見到佢⋯」殷書賢望一眼邱茗然，然後緩緩地將視線移開
邱茗然見氣氛突然靜落嚟，感覺到一絲嘅尷尬，於是隨便搵咗個話題問：「你平時都會留喺圖書館㗎⋯？」
「多數都係⋯」殷書賢稍微望邱茗然一眼後就收回視線，眺望遠處，「喺屋企溫唔到書。」
「我都覺得係⋯！」邱茗然對於殷書賢呢句說話好有同感，露出笑容回答：「喺屋企真係溫唔到書⋯！所以有test嘅話我都會揀留喺學校溫書！」
兩句說話後又迎嚟新一次嘅沉默，邱茗然企喺原地伸懶腰，轉個身背靠矮牆，從裙袋中拎出手機睇一陣同時等5點半嘅鐘聲響起
殷書賢望住邱茗然一個輕鬆愉快嘅心情，佢不禁微微耷低頭、手托住下巴，心入面嘅煩惱好似又番嚟啦
邱茗然見殷書賢沉默不語，忽然靈機一動，然後行到長櫈前打開書包，拎出佢放喺功課file入面嘅一疊淡黃色嘅memo紙，拎起筆喺memo紙上寫：「你大學想讀咩科」然後伸出食指，用指尖輕輕地戳一戳殷書賢
殷書賢接過memo紙望咗一眼，然後從褲袋拎出一枝原子筆寫：「醫科」寫完就將memo遞番比邱茗然
「你成績咁好，應該可以的」「唔知，你揀咩科」
「Jupas應該會揀社工喺Band A」「社工都唔錯」
「都唔知考唔考到」「努力啲溫書都可以」
「我都想，成績好真係好呀⋯」邱茗然衝口而出地慨嘆道，「只要成績好，選擇都可以有好多～」
佢以羨慕嘅目光望住殷書賢，因為喺香港呢個地方，成績往往就代表一切一樣，好多人都會以成績去斷定一個人，讀書係，社會都係，有好嘅成績就好似已經贏咗一大截一樣
殷書賢望住邱茗然寫嘅嘢，由文字中都睇得出邱茗然羨慕自己有好成績；而面對其他人嘅羨慕目光嘅佢，一啲開心嘅感覺到冇
「成績好真係代表選擇變多咩？都只不過係加大咗其他人嘅期望⋯」殷書賢以複雜嘅感覺望住文字，緩緩提筆寫道：「都差唔多」
「都係會特別大壓力」邱茗然嘅回覆令殷書賢默默一愣，呢句說話，根本係佢嘅心底話
「都係」「所以要帶鎅刀喺身⋯？」
邱茗然抱住少少嘅好奇心寫道，由佢見到殷書賢寫望住佢啱啱嘅回答時嘅反應，邱茗然都估到少少
「叮噹叮噹⋯叮噹叮噹～」學校嘅鐘聲響起，邱茗然聽到鐘聲後都唔記得咗張memo紙嘅存在一樣
「打鐘啦，呵～欠⋯」邱茗然打咗個喊露、伸個懶腰就行到長櫈前拎書包，佢準備行嘅時候，回頭望一眼殷書賢，「我走先啦，我只係好奇問下，唔想講都唔緊要～拜拜～」
今日邱茗然先一步離開學校；殷書賢將memo紙摺成小方形收喺褲袋，拎起放喺櫈上嘅書包孭到背上，然後就轉身離開天台
「第一名嘅壓力，應該⋯會更大先係。」邱茗然喺離開天台落樓梯嘅時候，心中忍唔住猜測起嚟，「所以先要鎅手呀⋯」
⋯
「又話喺附近叫我等埋佢⋯佢到邊㗎⋯！」張萱淇望一望手機嘅時間，仲有十分鐘補習堂就開始，佢唔想遲到，但係李雨揚又未到
張萱淇微微踮起腳尖左右張望，眼見仲未見到李雨揚嘅身影，於是拎出手機打算send個message比李雨揚：「你到邊？」
Message都未send出去，身穿校服嘅李雨揚就小步跑嚟：「Sorry sorry！我到啦！都唔係好遲啫～」
「多謝喎，喺呢堂開始前五分鐘趕到⋯」張萱淇露出一個皮笑肉不笑嘅微笑，「行啦！」
「唔嬲唔嬲～啱啱同個friend食飯，所以先遲咗少少啫～」李雨揚笑嘻嘻地講道，對張萱淇雙手合十求原諒
「你個friend，即係女啦～」張萱淇一睇就睇穿李雨揚嘅朋友係女仔，「集晒郵咁啦～」
「痴線啦！朋友咋！咩集郵？」李雨揚提起手肘輕輕地撞一下張萱淇，然後跟喺張萱淇身後行出電梯
「點知你，都唔知你係讀書定溝女⋯」張萱淇行入課室，佢太了解李雨揚，手機成日都有大量嘅女仔搵佢，唔知真係以為佢一腳踏幾船
「最多下次約係食飯囉～想食咩呀？」李雨揚講到好似張萱淇已經答應咗同佢一齊食飯一樣，「你想食咩？唔好話我唔好人，唔同你食飯啦～」
「下次囉～」張萱淇滿臉不在意咁聳肩
張萱淇坐低喺座位，拎出補習用嘅筆記，將成個筆袋拎出嚟放喺面前；李雨揚瞄一眼離佢不遠嘅筆袋，悄悄地伸手去借一枝筆用
IG Link: https://www.instagram.com/nd_cotttoncandy/?hl=zh-tw