宇宙傳送門: 2.24

舊時中四測完數學嘅一個小息，就係我屙完尿，去洗手嘅時候，身後有幾個人圍住我。

帶頭嘅人就係郭俊言，佢遞咗張紙巾俾洗完手嘅我。

「你叫咩名話？」

「好似係林日星。」後面其中一個人莫名其妙咁代我答咗。

郭俊言好唔滿意咁望向嗰個代我答佢問題嘅人「我而家問佢，你答乜撚呢？」





很快就有第二個人將個代答人拉埋咗一邊訓話。

「林日星，星仔下話？你，頭先睇到晒喎，我努力作答嘅模樣。」

「….」

「你唔會講出去㗎啦下話？」郭俊言見我冇接到佢張紙巾，佢就好親切咁幫我抺乾我對手。

「你知呢啲嘢，講出嚟會好麻煩㗎嘛。我又係….」郭俊言用威脅嘅眼神望住我「….你又係。」





「我咩冇見到。」

「噢～係咩？好吖～仲以為你會仆街到講出去添，真係咁嘅話，你死十次都唔夠。」

郭俊言傳達完佢嘅訊息俾我，就離開咗廁所。

之後我仲以為成件事經已告一段落，但係放學嘅時候，我經過教員室門口，見到郭俊言同另外兩個同學、老師。

郭俊言係單方面聽緊個老師同佢講嘢。然後，就係我行過門口偷望緊嘅呢兩、三秒，郭俊言同我又再有眼神嘅交流，而今次我隱約感覺到佢好似鎖定咗目標。





嚟到第二日嘅朝頭早，我返到班房坐低冇耐，突然有人係後面捉住我衫領，將我成個抽起。我係眾目睽睽之下被拖咗出班房，拖到去男廁，然後俾人一嘢掟咗落牆邊。

出現係我面前嘅就係郭俊言「係你吖？」

「？」

「男人老狗你咁冇口齒嘅咩？」

「….我都唔知你講緊咩。」

「你搞到我要遲走，仲要重測～呀！」隨住個‘呀’字，我塊左面食咗佢突如其來嘅一拳。

「你知唔知…算啦，都係唔講開場白啦。」郭俊言雙手舉起指住我。

其餘嘅三個人熱住身咁接近我，開始對我拳打腳踢，歷時三十秒之後，直至郭俊言將佢哋叫停。





「噢～咁都仲可以企直係度。」郭俊言一路講一路行去廁所嘅最後一個廁格，呢格係校工用嚟放啲清潔用具。

「喂，喂，喂！去第二層啦，冇位呀！」期間有一、兩個學生想入嚟去廁所，但俾其中一個郭俊言嘅手下趕走咗。

「我唔理到底個二五仔係咪你，反正我本來都睇你唔順眼。你有種令人好唔舒服嘅感覺。」

郭俊言係嗰個廁格抽咗一桶污水出嚟，呢桶污水應該係啱啱用嚟拖完地嘅污水嚟。

佢將呢桶污水放咗係中間位置「就係你而家呢個眼神，死老豆咁款。」

然後佢拎埋個水𢳂過嚟，𢳂咗一兜污水出嚟，一巴掌咁車咗落我塊面度。

「嚟！接力，潑晒呢桶嘢為止。」之後第二個人接力，第二次車落嚟，再然後第三次、四次、五次….





佢哋一個接一個，好似唔攰咁，完全唔俾時間我換氣，我仲真係換唔切氣，吞咗幾啖落肚。

呢桶污水好似有成個水塘咁多，差唔多俾佢哋潑咗三十幾次先完，我成塊面都紅晒，對眼痛到辣，然後跪低咗係地下咳到仆街。

「到此為止先，放學見。」佢哋準備離開。

「呀～！你放學唔好諗住偷走呀！唔係聽日就雙倍。」

我就係因為一個死老豆咁嘅眼神，成為咗郭俊言嘅玩具。

之後嘅放學時間，同埋接住落嚟嘅幾日，我俾佢用各式各樣嘅方式折磨，身體上嘅折磨同心理上嘅折磨，除咗圍毆之外，心理上嘅折磨方式可以話係冇重複過。

之後，甚至乎係班房公開咁玩，仲邀請其他人一齊，其他人又真係好樂意參與，因為只要被折磨嘅唔係佢哋就咩都得。

不過，我全部都死頂住，冇反抗。當時嘅我，係一個唔識反抗嘅傻仔嚟。





直到第四日，當年唔係同我同班嘅李浩朗知道咗之後，佢小息過嚟揾我。