宇宙傳送門: 2.13

現時凌晨五點零三分，啱啱係超巿嘅冷藏室再一次嘅死裏逃生，而家我係返家姐身邊嘅途中。

我只係帶咗一個電筒出嚟，然後就俾個面具男扑爛咗，而家要摸住牆咁返去。

好彩頭先出嚟係行一直線，冇轉過彎得嚟又唔遠，所以返去應該冇乜難度。我摸住埲牆，靠到好近咁望我頭先畫嘅記號。

唔使好耐，我同圈圈冇意外咁返到呢棟借宿一宵嘅商業大樓。

上返去七樓，觀察返個環境，應該就冇發生啲咩特別事，家姐都好似未醒，道門亦都仲係上鎖嘅狀態。





我放低圈圈同個背囊，身上嘅衫又要換過。除低件衫嚟睇，頭先傳送隻左翼嘅位置穿咗個窿。

原來處於同一個地方，咁近都會傳送到，好彩會甩落嚟，唔係完全生係我背脊度。

換咗件衫之後，我簡單咁處理手腕上嘅傷口，同圈圈坐低咗係間房出面嘅門前。

距離家姐醒都應該仲有少少時間，我就瞓低咗個人，將圈圈放咗係我肚上面，然後合埋眼，諗住閉目養神一陣。

「你覺唔覺而家比起之前嘅日子，反而簡單咗？」我開始同圈圈講嘢，但唔知佢有冇瞓着咗。





「我意思係….，我都唔知”簡單”係咪啱嘅形容詞。即係，以前係為咗生活，而家就只有生存。」

「自從我知道冇得報仇之後，冇咗唯一嘅家人之後，我好似對所有嘢都冇乜所謂。或者而家嘅世界會比較適合我，起碼而家我有個方向…」

講下講下，睡意終於來襲，不知不覺我都進入咗夢鄉。

一把女人聲出現係我嘅夢境「你要記住，你身邊就得返阿媽一個。而且，阿媽都得你一個。你要好好保護我….」

「Knock….knock..」隔離嘅敲門聲嘈醒咗我。





我起身之後應一應道門「家姐？係我吖。」

「林日星？做咩鎖咗門嘅？」家姐係房入面問。

我叫家姐將我尋晚揼入去嘅鎖匙再揼返出嚟，然後我係出面開返門。

「做咩事吖？…」家姐滿是疑問。

我大概咁同家姐講返，我瞓唔着所以落樓下行咗一陣。

「自己一個？咁你對手又咩事吖？」家姐見到我包紮咗嘅雙手。

「哦…遇到啲野生動物啫，冇咩事。」

「瞓唔着就自己出去？嫌呢度唔夠好玩吖？睇下。」





我伸對手出嚟，家姐捉住咗之後大力咁捏咗一下「你係咪想以後行唔到吖？」

「啊～唔係。」咩叫以後行唔到？

大家都醒咗之後，開始食個簡單嘅早餐，係舖頭拎咗啲露營嘅爐具，煮熱咗我拎返嚟嘅嗰兩罐粟米湯。

最後用作早餐嘅收尾，係另一個寶物，對我嚟講係普通，但對家姐嚟講應該係寶物，就係香蕉奶。

雖然都唔期待家姐會有啲咩少女咁嘅反應，但家姐係冇乜反應咁拎咗嚟飲，然後照舊食住煙咁飲。

食完個早餐，我哋執拾好需要嘅物資，準備出發。由於我對任何物件都係一個定時炸彈，唔知幾時會俾我搞到消失，所以重要啲嘅物資都係由家姐嚟孭住，同埋圈圈。

保守估計今日一出去之後，都好難會再返嚟呢度，所以啲物資係拎到就盡拎。





出於好奇心，我哋落返一層，睇下尋日個老闆娘仲會唔會係度。

嚟到六樓嗰間賣衫舖頭，門依然係開住，入面依然係混亂，但已經冇咗個老闆娘嘅身影。

解答完內心嘅好奇，我哋落返樓，出返呢棟大樓。

我話俾家姐知，我尋晚去嘅嗰間超巿嘅方向。

其實我哋行邊個方向都係一樣，反正都係會迷路，都係唔識路。

於是我哋向超巿嘅相反方向出發。簡單嚟講，呢次行程主要目標係想揾返李浩朗同少女佢哋，好彩嘅都仲可以揾返佢哋嘅老豆老母。

但係呢個旅程都可以話係大海撈針，可以好快就揾返大家，亦都可以係永無止境。不過，都只係過咗一日，我相信會有希望嘅。

氣溫仍然係咁悶焗，汗水係不停咁流，要不時就補充水份。





一路上，唔知係咪傳送走晒，都冇見到有其他人，只係見到啲難以置信嘅奇怪嘢。

例如我哋嚟到嘅呢個廣場，係廣場嘅中央，有一個成棵樹咁大嘅圓錐形箭嘴向上指。

最令人奇怪嘅係呢個箭嘴，係由一隻又一隻人嘅手所組成，一隻手搭一隻手咁。

當中有左手、有右手，全部係黃種人嘅膚色，睇落應該全部係女人嘅纖纖玉手嚟。

當我哋行近嘅時候，呢個肢體箭嘴由頂部開始，每隻手逐一咁打開，全部綻放出嚟。

肢體箭嘴綻放成一棵樹，之後更加奇怪嘅事情發生咗，肢體樹上嘅每一隻手都向我哋揮手打招呼。