宇宙傳送門: 2.12

現時凌晨四點二十三分，我、圈圈、面具男仲有吸入粉紅色氣體而變得兇殘嘅巨型肉色蝙蝠。

再次聽到蝙蝠咆哮嘅面具男，變得更加心急，仍然係開唔到冷藏室嘅門。佢心急咁大叫咗一聲，然後執起地下嘅電筒，用電筒不停扑個門柄。

先唔講面具男會扑爛我個電筒，佢就咁拎走個電筒已經令我呢邊一瞬間失去咗光明。

不過，我唔需要時間去適應忽然漆黑嘅環境，因為面前已經出現咗另一道光。

方才我面前有嗰隻蝙蝠嘅位置出現咗一道極光，呢道極光令我又可以睇返嘢。





發出極光嘅係隻蝙蝠嘅左翼。

巨型蝙蝠好奇咁望住自己嘅左翼做咩會咁，不過隨住極光嘅消失，佢好快就知道佢成個左邊翼都跟住消失咗，身體就好似俾人切割咗咁，血液不斷流出嚟，隻蝙蝠隨即由發出咆哮聲變做痛苦嘅嚎叫。

隻蝙蝠嘅左翼被強制傳送嘅同時，我身後亦都出現咗一道力，將我一下子向後拉，我又一次向後仆咁坐低咗，呢道力斷斷續續咁將我拖咗幾米遠，直到去門口，面具男嘅隔離。

我望向我嘅身後，原來我右邊背脊都出現咗極光，由背脊道極光走出嚟嘅係同嗰隻肉色蝙蝠一樣嘅肉色蝙蝠翼。

我背脊出現嘅蝙蝠翼不停咁拍動，所以我先會俾佢向後拖，但拖到門口嘅時候，隻翼就變到冇晒力，最後仲由我嘅背脊剝落，然後極光都消失咗。





冷藏室又再重新變返漆黑一片，眼睛需要一段時間去適應。巨型蝙蝠受咗傷應該亦都需要啲時間，冇咁快再進攻過嚟。

巨型蝙蝠嘅嚎叫停止咗，雖則我眼睛仲未完全適應到，但都依稀可以見到隻蝙蝠嘅輪廓，仲有啲腳步聲可以聽到。

蝙蝠嘅行動變得緩慢，但都係冇放棄對我嘅攻擊。佢準備再次撲向我，不過今次緩慢咗嘅佢，令我容易啲去應付。

當巨型蝙蝠要起跳，撲過嚟嘅時候，我揸實拳頭，一拳將隻蝙蝠打到飛埋咗一邊，亦都係面具男嗰邊。

由於面具男仲係度用個電筒扑緊道門，仲以為隻蝙蝠攻擊緊我，所以佢都嚟唔切防避突然飛過去嘅蝙蝠。





巨型蝙蝠跌落係面具男嘅背脊，然後立即轉移咗攻擊對象，獠牙咬向面具男嘅膊頭。

面具男當然都反抗，拎佢把刀出嚟反擊。呢個時候隻蝙蝠咬完一啖人肉之後，好似吸咗毒咁仲加興奮咗。

巨型蝙蝠完全無視面具男插佢嘅刀傷，用腳上嘅利爪抓實面具男嘅大脾，再用僅餘嘅嗰隻翼上利爪，插向面具男揸刀嘅嗰隻手。

「啊～」面具男痛到揸唔實把刀。

我趁隻蝙蝠攻擊緊面具男嘅時候，去抱返起圈圈，再去睇下我開唔開到道門。

雖然呢道門同出面嘅開法唔一樣，但其實都只係向下撳多一下，然後再扭就開到。

面具男見我開到道門，然後向我求救「喂！唔好走吖，救我吖！」

我唔知道面具男望唔望得清楚我個樣，不過我係睇唔到佢個樣。





我向面具男嘅求救回應返「Enjoy~」

然後我就帶住圈圈走咗出去，再閂埋咗道門，但係我冇即刻走，而係企咗係冷藏室嘅門前。

我企係門前，聽住面具男最後嘅悲鳴，直到冷藏室裏面再冇任何嘅聲音傳出嚟。

「所以你啲屁原來係興奮劑嚟。」我摸住圈圈。

相信唔只係面具男，嗰隻巨型肉色蝙蝠係入面都唔會過到今晚。

一切都回歸安靜之後，我再執返起頭先被迫要放低嘅背囊，同圈圈一齊離開呢度。

臨走前，係超巿嘅門口又揾到兩個寶物，即刻執咗落袋。





行返出去出面，向家姐所在嘅商業大廈方向返去。

行唔夠兩步，前面出現一啲腳步聲，應該唔只係一個人，我下意識馬上去咗隔離後行嘅一個大垃圾桶後面匿埋。

我伸半個頭出嚟偷望，咁大霧又咁黑，呢個距離嘅佢哋冇可能見到我，相反我都係睇唔清，只可以聽聲。

呢班人行到呢個後行嘅轉角位，因為佢哋都有拎電筒嘅關係，我可以睇得清佢哋係咩人。

佢哋有五個人，同頭先嗰個面具男一樣，全部都係戴有面具，有兩個仲着有護甲。

我聽到佢哋嘅其中一句問「條撚樣行咁遠做乜撚嘢吖？」佢哋應該係講緊已經死咗係冷藏室嘅嗰個面具男。

雖然都係可以估到好似嗰個面具男嘅人仲有好多個，但都希望之後唔會遇到佢哋。