宇宙傳送門: 1.22

現時夜晚九點三十分，係我病房門口突然出現一個叫我名嘅人。

我俾佢嚇到向後坐低咗。房門打開，入嚟嘅正正就係李浩朗「喂！走啦走啦。」

佢塊面都包紮咗下，但見佢都幾精神咁，應該唔太嚴重。佢過嚟扶我起身。

「咩事吖?」

「呢個唔好要啦。」佢將插係我手嘅嗰條管掹走。





「啊！咩料吖你？」

「你自己睇啦，我都唔知點講。」

病房出面情況係一片混亂，人來人往，尖叫聲不斷。

係混亂當中，我見到有幾個人塊面同手都生晒紅色嘅瘡，有大有細，又紅又腫。呢啲人嘅表情極為痛苦，不繼大叫，四周圍咁跑。

再仔細啲咁望，周圍原來充斥住番梘泡泡。呢啲泡泡係空中冇規律咁漂浮，由於啲人四處逃亡，你撞我，我撞你咁，令到啲泡泡好容易接觸到啲人。





呢啲泡泡一但接觸到皮膚，嗰個人嘅皮膚唔使兩秒就會生出紅色嘅瘡，不繼咁生，直至生到冇位生為止，最後生到連佢哋個樣都分唔清楚。

地下已經有好幾個紅瘡人瞓咗係度，郁都唔郁。

「大家冷靜啲呀！唔好掂到啲…」混亂中有個護士戴晒眼罩，着晒保護衣咁企高係枱上面大叫。

但護士嘅勸告都未講完，就有人拉咗佢落去，搶走咗佢身上嘅保護裝備。護士嘅皮膚暴露咗出嚟，好快佢就生到一面都係瘡「啊～～～～！」

其他人見到咁，個個都走去搶醫護人員啲裝備。





呢個情形完全係電影先會出現嘅畫面，雖然近排有咁多奇怪嘢，但都仲係睇傻咗我。

「入返去先！」一把女聲加入，係李浩朗家姐，李海嵐。

「家姐？」我再次俾佢推返入間房。然後佢即刻閂埋門，再用身體頂住道門。

「點解嘅？咩嚟㗎？啲泡泡係邊嚟㗎？」啱啱先接收到呢啲資訊嘅我，係度自己分析緊。除咗我，大家都好似已經接受咗個環境咁。

「係極光，我見到啲泡泡係極光入面出嚟。」李浩朗答我。

極光？宇宙之間嘅強制傳送？啲泡泡係由另一個宇宙傳送過嚟，咁更加唔會知係咩嚟。病毒？傳染病？

但如果仲有強制傳送嘅話，一係就少女估錯咗，一係就仲有人留低未走。

「你今朝真係嚇鬼死我，仲以為你要消失吖。係咪道光都睇你唔起？」李浩朗係呢個時候攬住咗我一下，然後好快就放開咗我，可能佢自己都覺得尷尬。





原本我想好粗暴咁屌佢做咩攬住我，但諗諗下佢都係擔心我啫，加上佢家姐又係度，好似唔係咁合適。

於是我選擇咗左手搭住佢膊頭，好平靜咁講「有咩講咪得囉，唔使攬嘅。」

「身體語言係一種獨立語言嚟。」李浩朗開始好似平時咁傾計「同埋星妹….」

「斟杯茶俾你兩個坐低慢慢傾好冇！？過嚟幫手啦！揾啲可以頂住嘅嘢！」家姐大聲咁斥責我哋。

而家得家姐一個頂住嘅嗰道門，由玻璃窗可以見到有幾個紅瘡人不停咁拍門，想要入嚟。

如果呢度嘅醫生都救佢哋唔到，咁我哋呢啲普通人就更加係束手無策。雖然係好殘忍，但我哋而家為咗保命，就只能夠無視佢哋。

「Sorry, sorry…」我同李浩朗一齊道歉。





於是我先揾支嘢頂住個門柄，再一齊推個櫃過去。

有咗個基礎之後，李浩朗同我再揾多幾樣重嘢加上去。由於道門係向裏面打開，只要我哋堆實道門，咁就應該暫時唔會有人開到入嚟。

「點解家姐會係度㗎？」我細聲問李浩朗。

「唔小心俾佢發現咗我係醫院…」佢細聲咁答。

由於而家係冬天，大家都係着長袖衫褲，暴露出嚟嘅皮膚就只有手掌同頸以上嘅部分。加上呢間病房，都可以話咩都有。

最後我哋揾咗幾條毛巾，幾對膠手套。毛巾包住條頸同個頭，問題係眼嘅部分，冇理由包埋對眼，然後放棄視野。

「呢度！」李浩朗揾到啲嘢之後大叫。

李浩朗手上面攞住嘅係白色半透明嘅垃圾膠袋。「用呢個笠住個頭。」





雖然唔係完全透明，但都勉強睇到嘢，而且都安全，只要泡泡唔掂到皮膚就得。

大家開始裝備自己，我諗住拎返自己件衫但我又忘記咗今朝我係赤裸入嚟。

李浩朗裝備完「但等等，頭先見到好多人都塞咗係樓梯位吖、𨋢吖嗰啲喎，我哋點走呀。」

李浩朗指出咗個重點，我哋所在嘅位置係醫院嘅三樓，要離開就只有向下。

呢刻我諗起我今朝，不停開窿向下墜嘅我，如果我而家有極光就可以輕鬆帶大家離開，但問題係我控制唔到，無論係點樣開始定點樣停止。

「不如留係度先啦。」李浩朗始終擔心，如果要出去冒險嘅話。

「唔好，留係度都有風險。主要而家係唔知出面嗰啲係咩嚟，唔知有冇傳染性或者其他問題。」我提出咗我嘅擔心。





「由呢度走啦咁。」家姐企係窗邊，然後指住。