宇宙傳送門: 1.21

現時夜晚九點十六分，我係一張陌生嘅床上面驚醒。

我環望周圍嘅環境，可以判斷到呢度係醫院。係我隔離，坐咗一個男人，佢睇緊手上面嘅一啲文件。

仔細一望，原來又係嗰個重案張sir。佢都發現咗我醒咗「醒啦？」

佢起身，係我床頭撳咗個掣，然後又打咗電話。

兩分鐘之後，一個醫生入咗房，隨後仲有個女護士。醫生嚟到我床邊，檢查啲儀器，讀咗幾個我唔識嘅字同啲數字出嚟，護士都隨即抄低。





然後，醫生攞咗個電筒仔出嚟，左右照一照我對瞳孔「先生，記唔記得自己叫咩名？」

「林日星。」我答。

「你記唔記得今朝發生嘅事？」醫生再問。

今朝？原來只係過咗半日，仲以為我會昏迷好耐。

「記得。」唔好彩地，直到我暈低之前我所見到嘅嘢我都記得好清楚。刀疤佬同少女同時間傳送走咗。我知道佢並唔會真係死咗，而係去咗第二個宇宙，但我都未好好咁同佢離別。





雖然唔知發生啲咩事，但估計少女應該係為咗救我同李浩朗。

呢個時候，又有一個男人入咗房，就係重案個盧sir。

醫生聽到我嘅答案之後，佢唔係同我講，而係同個張sir講「佢無咩大礙……..」。

講完，醫生同護士都離開咗。間病房就得返我、盧sir，同張sir。

「林生你冇乜大礙嘅，係有啲皮外傷同幾個地方瘀咗啫。」張sir同我報告返。





「林生，又見面啦。我知你需要休息嘅，但無奈我哋實在係有太多問題要問你，你冇問題嘛？」盧sir問我。

雖然我冇做任何犯法嘢，但有啲嘢講出嚟會好麻煩，搞到我都有少少緊張，要諗清楚先回答佢哋嘅問題。「冇問題。」

「首先，你今朝同呢個人見面嚟係咪？」張sir攞咗張相出嚟，係刀疤佬個樣。

「係。」

「CCTV見到你兩個係雙儀商場嘅六樓發生毆鬥。」

「係，佢想殺咗我。」

「知唔知道係咩原因？」

「佢話佢鍾意。」





「咁呢兩個人呢？」佢攞咗另一張相出嚟，相入面係李浩朗同少女。

「男嘅係我朋友，……..」等等，我應該點講我同少女嘅關係，要點講好？

盧sir見我停頓咗冇再出聲，佢追問「相入面呢個女人係邊個嚟，你同佢係咩關係？」

我個腦不停咁轉，如果講錯嘢，可能就產生不必要嘅誤會。點講好？兩個重案嘅目光令我更加緊張，心跳得好快。

正當我係度徬徨之際，病房出面傳嚟唔只一道嘅尖叫聲。

我哋三個同時都望向門口。都唔知係好事定壞事，總之呢個尖叫聲暫時拯救咗陷入困局嘅我。

病床前呢兩個人，作為執法人員，當然要去睇下究竟發生咩事。





「林生你留係度，唔好出嚟先。」盧sir叮囑我，然後帶埋張sir出咗去。

病房入面就得返我自己一個。我係完全唔知出面發生咩事。但我想首先聯絡下李浩朗，睇下佢有冇事。

我起身，想係隔離個櫃攞我條褲出嚟，但咩都冇。係喎，今朝極光嘅時候應該又熔晒，所以我今朝係完全裸體？

嗰兩個重案出咗去大約有二十秒，尖叫聲再次出現。但今次係聽得出有好多把聲，聲源有遠有近。

我都冇辦法唔好奇，我拖住個鹽水，慢慢咁行去門口。道門上面有個小小嘅長方形玻璃窗，可以略略睇到病房出面咩環境。

出面多道嘅尖叫聲持續，而我由個玻璃窗見到出面啲人，有醫生、有護士、有着病人袍嘅病人、有普通人。佢哋全部都顯得好慌張，跑嚟跑去。

究竟出面發生啲咩事？我緩緩咁伸手去捉個門柄。

「星～！」玻璃窗突然出現一個人，差啲俾佢嚇撚死。