宇宙傳送門: 1.3
現時夜晚八點零二分，屋企廚房地下嘅嗰一灘血，不斷咁擴大。 我跪咗係度抱住我媽嘅上半身。
李生係我屋企門口行入嚟，係佢嘅身後跟咗幾個人。
「先生！先生……..」我好似冇咗靈魂咁，冇晒反應。
嗰幾個人我諗係差佬？我都唔知。佢哋拉咗我起身，想去睇一睇我阿媽咩情況。
企返起身嘅我慢慢咁行去飯枱坐低，眼前嘅係我媽最後煲嘅飯，原本就已經冇乜温度，但而家感覺係冰一樣咁凍。
我左手攞起碗飯，右手攞起雙筷子，流住眼淚咁想食晒佢。但有個人行咗過嚟想阻止我。我冇諗住理佢，死都將啲飯擺落個口度。
係我隔離嘅嗰個人捉住咗我雙手，我望住佢，佢把口不停咁郁，但我咩都聽唔入耳。
佢不停咁講嘢，仲用手指指住某啲嘢，我望過去，原來係頭先嗰把刀。
佢哋又拉開咗我，帶咗我去客廳梳化坐低，然後又有人嚟處理我塊面嘅傷口。
「…佢終於望過嚟，佢係度笑！佢係恥笑緊我..」個痴線佬講嘅嘢不斷係我腦海徘徊，亦有似曾相識嘅感覺。
時間又唔知過咗幾耐，我嘅三魂七魄開始慢慢返嚟，我發現間屋多咗好多人，而我面前都企咗兩個男人。
兩個男人都着住普通嘅便服，一個後生啲，一個年紀大啲。
佢兩個條頸都戴住張證，當我諗住仔細睇下張證嘅時候…
「你係林生？死…，個仔係咪？」年紀大嗰個開口問我。
我眼向上望「係…」我冇咩力咁答佢。
佢哋拎起自己張證俾我睇。「林生，我哋係重案組，我姓盧，呢邊姓張。」年紀大嗰個介紹完自己再介紹埋隔離嗰個。
今次可以望清楚佢哋張證，就正如佢哋所講。
「林生，大約咩事我哋已經由嗰個李生口中略略了解咗啲。我哋伙記已經係呢度附近搜索緊，我諗凶手應該未走得遠。」個盧sir同我講。
冇出過聲嘅嗰個張sir，望住咗我個樣一陣，皺咗一皺眉頭，然後同盧sir咬耳仔講咗啲嘢。盧sir聽完之後諗咗諗，再睥住張sir，張sir就唔係幾好意思咁耷低咗頭。
「頭先李生話自己太驚，唔係好清楚記得凶手個樣。我知道你而家嘅心情好複雜，但我哋都需要你講下個凶手有咩特徵。」盧sir做埋手勢叫個張sir準備記低。
聽到佢哋話係附近搜索緊嘅時候，我突然記起啲嘢，然後企咗起身，指咗向窗口位置。兩個重案都好奇咁跟住望向窗口。
「佢，跳咗落去..」我自己講出嚟都覺得有啲疑惑，何況係嗰兩個重案。
「吓？」張sir唔太明白咁反應。
「你話凶手，跳咗出窗？」盧sir想確認一下我講嘅嘢。「但呢度係22樓喎。」張sir好似仲唔係好相信。
見到佢哋咁嘅反應之後，我都對自己嘅記憶冇乜信心。冇錯，呢度係22樓，跳落去根本就係自殺。但嗰個痴線佬唔似係會想死嘅人。
我行近窗邊，由22樓嘅窗口望落去。22層嘅距離令到地面嘅所以人同物都變到好似粒豆咁細，但隱約都見到有一班人圍住咗架車。
「盧sir!」一個同樣應該係重案組嘅女人聽完個電話之話過嚟。「樓下有架銀色貨van，車頂嚴重凹陷，地下同車頂都有未乾嘅血跡。」個女重案繼續講。
「咁，人呢？」張sir問。
女重案叉住腰，唞咗個大氣「問題就係車頂上面咩都冇。問過兩個路人，佢哋都聽到有嘢跌落架車嘅聲音。同埋，一道光，又紅又綠嘅光。但佢哋都話冇睇到有任何人或者屍體。」
「等陣先，又紅又綠嘅光？即係極光？」張sir嘅重點首先放咗係道光度。
光？冇人，冇屍體？先唔講道光嘅問題，由22樓跳落去竟然冇死到？有未乾嘅血但冇屍體，即係佢只係受咗傷冇死到，而且仲…走咗？咩料呀究竟？！
女重案然後係電話度開咗張相出嚟，擺咗係我哋面前俾我哋睇。
張相就係樓下嗰架銀色嘅貨van「由個車頂嘅凹陷程度嚟睇，都有一定嘅高度跌落去。 」
個盧sir嘆咗口氣「…..睇嚟近排啲古靈精怪嘢真係特別多。雖然有好多令人疑惑嘅地方，但唔完全代表跌落去呢個車頂嘅就係嗰個凶手。而且都仲未揾到凶手或者佢嘅屍體，先查下呢棟樓有冇其他嘅墮樓案，再將周圍嘅CCTV揾晒出嚟。」
「收到。」女重案答。
去到呢度為止，雖然大家都難以相信凶手應該就係由呢度嘅窗口出去，但如果係真嘅話，另一個問題就出現。
「如果佢真係呢度出去嘅，佢係自己跳落去，定係你推佢？」張sir手指住窗，雙眼係望實我。
我周圍咁望，其他人其實都係同樣有呢個疑問，大家都望住我等我答。
的確一個正常人除咗想自殺都唔會係22樓跳落去，但呢刻我嘅情緒就係覺得好委屈。
「哼…….，你班人冇撚嘢吖？如果吖，如果真係我推，我仲會咁講？！我會同你講佢係門口走啦！……你班人望下發生咗乜撚嘢事未呀？而家我媽先係受害者呀！我媽俾個唔撚識嘅痴線佬殺咗呀！做嘢啦唔該！」講到我成塊面同對眼都紅晒。
「林生，你冷靜啲。我同事只係講出其中一個懷疑啫，當然係未揾到凶手之前都唔會下定奪。而且目前最重要嘅係要揾到佢先，我哋會盡力。我相信你要啲時間去整理你嘅情緒，同埋之後都有好多手續要搞，我哋會盡快聯絡你再做個詳細啲嘅口供。唔該。」講完，個盧sir轉身諗住走。
我稍為將頭先嗰份委屈感收埋，然後大聲講「個凶手，高我大約一個頭，我諗應該1米8，身型比較健碩。佢着住件深啡色嘅拉鍊外套同長黑色褲。同埋佢，同我好似樣..」我再次得到全場人嘅注意力。
個盧sir同張sir擰返轉身，兩個互望。「你話個凶手，同你好似樣？」張sir問。
我唞咗個大氣，然後確定咁答佢「係。」