由青梅竹馬開始: 眼神

一年後，勤在街上派傳單時，Agnes出現了在他面前。這幾年來，兩人時有聯絡，但見面還是第一次。
 
勤：你點會來嘅？
Agnes：來撐下你嘛……雖然呢啲野我唔識。不過我轉頭都要接返個女，都幫唔到手。買啲野飲俾你同你啲義工飲。
勤：哈！多謝晒。
Agnes：我早幾日都過左數俾你架。選舉都要駛好多錢個呵？
勤：多謝晒。選區議員駛錢都唔多嘅其實。
 
之後兩人自拍了幾張相片。
 


Agnes：喂，嗰邊個女仔，係咪對你有意思呀？
勤：嘩！你點解咁都知。我都冇同你講過。
Agnes：睇下佢啲眼神就知啦。完全係懷疑緊我同妒忌緊我。
勤：咁你都睇得出？
Agnes：佢又青春又靚女，又幫你派單張。咁為得你。你唔考慮下？
勤：佢細咁多……
Agnes：你而家個人，成個款同幾年前都唔同啦。可能而家佢呢種至啱你呢。
勤：同埋佢粗口爛舌……
Agnes：而家啲細路上網大，係咁架啦。你都唔介意我爛口架。佢叫乜名呀？
勤：Rainbow。


 
Agnes走到正在派傳單的Rainbow旁邊說：”你叫Rainbow？”
 
Rainbow：係呀。
Agnes：我叫Agnes呀？
Rainbow：哦。你好！
Agnes：你係咪鍾意阿勤呀？
Rainbow：下？你點解咁問？
Agnes：你鍾意佢咪同佢講囉。
Rainbow：佢好似鍾意你多啲。你係咪同佢有野？


Agnes：我個女都四歲啦。你話我係咪同佢有野呢？
Rainbow：以前呢？
Agnes：你都醒目。以前係有，而家冇。以後都唔會有。
Rainbow：真係？
Agnes：真係鍾意佢嘅話，你直接啲同佢表白啦。