由青梅竹馬開始: 離去

過了三年左右，即是二零一四年十月底的一個晚上。勤收到了琪琪的訊息。這是兩人分手以來，他們第一次直接聯絡。
 
琪琪：我有野想搵你傾幾句。你喺邊？
勤：金鐘。
琪琪：我半個鐘左右到。
勤：OK。
 
勤在地鐵站出口等待琪琪，再帶她到了一個較靜的角落停下來。在路上，勤忙於覆訊息。
 
勤：突然搵我，有乜事呀？


琪琪：我阿婆今朝走左。
勤：下？嗰陣時仲好精神個佢。
琪琪：老人家，身體變差可以好快。都有心理準備架啦。
勤：嗯。你唔叫我去睇下佢之前？
琪琪：我都有諗過。但佢見到你，都係會怨你冇娶到我。咁無謂啦。
勤：嗯。
琪琪：佢其中一個對我最後嘅要求，就係叫我搵返你。所以我就來搵你。
勤：遲啲我去鞠個躬啦。
琪琪：你個妹下個月結婚啦。有心。
勤：係噃。


琪琪：所以我都去唔到飲佢嗰餐。你幫我同佢講聲啦。
勤：哦……不過我呢排都好少見到佢。我成日喺度訓，多數日頭先返屋企。日頭佢又返左工。
琪琪：你自己唔駛返工咩？
勤：月頭辭左工。
琪琪：你屋企人冇意見？
勤：有少少啦。但都奈我唔何。何況嗰種生活……我捱左幾年真係唔係好頂得順。
 
琪琪正想回應時，一名少女走到勤身邊叫：”勤Sir！我搵到你啦。咦，你個Friend呀？”勤點頭。該少女續說：”Hello！我叫Rainbow 呀！以前讀中學時勤Sir教過我打波。”
 
琪琪：Hello。我叫琪琪。


Rainbow：勤Sir，今晚有冇位俾我訓？
勤：應該有嘅。
Rainbow：今晚仲有乜野人會喺度過夜呀？
 
琪琪望著勤同Rainbow對話。一分鐘後她就告辭，獨個兒走向地鐵站。