由青梅竹馬開始: 貓的勸勉

貓:咁咪好囉。
 
琪琪沒有回應，專心和孩子玩。貓就再說:“尋日阿勤問我你有冇人追。”琪琪放下孩子問:“咁你點答呀?”
 
貓:咪話冇。我冇講大話架。人地真係冇追你。
 
琪琪:其實阿勤佢尋日來左接我機。
 
貓:下?佢又知你幾時返?
 


琪琪:我尋日朝早喺酒店就走時喺facebook同佢傾左幾句。佢就估到我幾時返到。平時唔見佢咁醒目。
 
貓:佢主動搵你?
 
琪琪:係呀。
 
貓:估唔到你又睬佢。
 
琪琪:我估……我平時都唔會睬佢。但係尋日朝早可能個人down down地，個腦function唔到咁就同佢講返野。
 


貓:接完機咁點呀?
 
琪琪:食左餐飯囉。
 
貓：咁簡單？
 
琪琪：佢……佢有話想同返我一齊。
 
貓：咁你點答？
 


琪琪：諗下先，諗下先。
 
貓：哈！你冇say no噃！以前你明明話過唔會再諗佢。
 
琪琪：你結婚嗰晚我都俾晒機會佢啦。佢又完全唔出聲。但尋晚我係覺得有啲sweet，有啲warm嘅。
 
貓：咁唔好等咁耐啦。快啲應承佢。
 
琪琪：咪傻！唔可以一時衝動呀。要諗清楚啲先得。
 
貓：你唔覺得都係有啲緣份咁咩？你啱啱放低左另一個，阿勤又出現返。
 
琪琪：我就係驚尋晚嗰種warm嘅感覺係咁樣來。我唔想佢只係一個因為我寂寞所以要嘅水泡。
 
貓：我明……但都唔一定要咁樣諗嘅。人嘅本性應該就係唔想寂寞。但唔係每個人都可以令你覺得warm，覺得sweet嘅。


 
琪琪：嗯……但係……喺返埋一齊……我點同佢交待我呢幾年嘅事呢？如果要坦白講呢啲……我面對唔到佢……
 
貓：咁人人都有過去架啦。何況咁多年，你數埋都係兩個男人啫最多。冇濫交喎！
 
琪琪：但佢呢幾年冇拍過拖、冇第二個女人嘛。我唔想好似我欠左佢咁。
 
貓：佢讀書時咪有過第個囉。
 
琪琪：你咁講我而家諗返起……自己嗰陣時同返佢一齊，都因為佢有過第二個所以一直都有條刺。我唔想佢對住我都有條刺咁。
貓：你唔講咪得。佢唔會知。
 
琪琪：唔通對佢都唔坦白咩？你會唔會有啲野特登瞞住呃住你老公呀？
 
貓：咁又冇。


 
琪琪：咪係囉。
 
貓：但兩個人相處，幾愛對方、幾順利都好。都冇可能冇野隱藏。唔通我又會將你啲野講晒俾我老公聽咩？唔會架嘛。有時佢做啲野我唔鍾意，都唔可以下下話我唔鍾意架。有時都要忍住。
 
琪琪：嗯……再睇下點先啦。可能佢尋日都係一時衝動，之後唔再搵我呢。
 
貓：你都可以主動出擊嘛。我地咁熟唔怕講……你都唔細個。冇乜時間再等架啦。我唔想見到你自己一個孤伶伶咁。
 
琪琪：嗯……你而家做埋媽咪，我悶都冇可能咁易搵到你陪我啦。
 
一個小時後，琪琪離開了貓的家。在升降機內，她想起她和貓的對話，又被貓一家三口樂也融融的氣氛觸動。琪琪站在行人路，拿出電話，思索著是否要打電話給勤。但在按鍵前，她還是決定要再仔細想清楚。琪琪將電話放回在手袋內，乘車回家。在途中，手提電話響起，打來的是勤。