由青梅竹馬開始: 琪琪的信二

晚上，和家人晚飯後，琪琪來到貓住處樓下。貓見到琪琪第一眼就問:“你做乜剪短左頭髮呀?”琪琪只淡然回應:“晏晝剪架。”
 
貓帶琪琪進入大廈。一進升降機貓就說:“我好似識你咁耐都未試過見你頭髮唔過膊頭。而家仲剪到耳仔咁短。實嚇親我屋企人。”果然，當貓的家人見到琪琪的新髮型時，都嚇了一跳。
 
和貓的家人簡單寒暄了一輪後，琪琪就跟貓進房。兩人坐在床上開始聊天。
 
貓:嘩!你啲腳趾咁嘅?以前叫你一齊搽你又話唔好。
琪琪:你借支洗甲水俾我呀。
貓找來洗甲水遞給琪琪時就問:“冧仔所以搽?”



琪琪沒有說話，只是點點頭就開始用洗甲水抹去腳趾上的指甲油。
 
貓:我以為你今晚喺度訓添。
琪琪:尋晚用左個quota啦。
貓:臨別一擊?
琪琪:嗯。同埋應該以後都唔會見。
貓:下?點解?唔係好地地咩你之前話?
琪琪:係我嘅問題。其實我一直都冇話佢知公司要我去外國training。
貓:尋晚至講?
琪琪:都冇講。


貓:你諗住不辭而別呀?
琪琪:我會俾封信佢同佢講嘅。
貓:大半年啫你都係去……咁冇信心?
琪琪:唔係呀。我自己嘅問題。
貓:即係點?
琪琪:你之前講得啱嘅。我帶唔到佢返屋企。我係好開心架呢幾個月……但係諗唔到將來。
貓:都話左你架啦一早。
 
 
琪琪開始眼泛淚光:“所以我都覺得自己好衰，好對唔住佢……”


 
貓:但係如果你真係愛佢，唔會真係試下?試下克服下人地啲目光?我第一個唔歧視你地。 
琪琪:我都有諗過。但係仲有個問題。
貓:咩野? 
琪琪:我有諗過叫佢等我。但係……我早排執行李喺屋企……我搵返阿勤啲野出來……就喊左。我喺公司執野見到同佢影張相……個心又係乸住乸住咁。我唔知……我可能其實從來冇放低過阿勤。咁我點有資格叫東仔等我……
 
 
琪琪的眼淚開始掉下。貓捉著琪琪雙手給她一些溫暖。
 
 
琪琪:我係咪錯得好緊要?我係鍾意東仔架。但我放唔低阿勤……我係咪好似呃左東仔咁呀?我覺得自己好衰呀……我係咪真係一個好自私嘅人……嗚“
貓:唔好喊啦。
 
琪琪擁著貓繼續哭。到琪琪稍為冷靜下來後，貓就說:“呢啲野冇話邊個衰嘅。你對佢好時係真心咪得囉。”琪琪哭著回應:“我真心架。我相信佢都開心。但係我始終要hurt佢。我好嬲我自己呀。我自私到連喺佢面前講清楚嘅勇氣都冇……”
 


貓:唔好喊唔好喊。唔好嬲自己。你都為左陪佢放榜花錢改機票啦。
 
琪琪:我有諗過講架尋晚。但係……佢送左條頸鏈俾我。佢真係好愛我。我先醒起我一路都冇送過啲乜有紀念價值嘅野俾佢……我更加講唔出口……我好差……
貓:你點會差呢?如果係差就要罰啦。
琪琪:真係好差。我諗好左。我來緊一年都唔會同任何人一齊。算係罰自己。
貓:下?所以你剪短頭髮等啲男人唔埋你身?
琪琪:你係咪覺得可能有用呀?
貓:你校花來架。剪短頭髮就唔靚咩?
琪琪:總之如果我呢一年同你講我對人有意思，你記得阻止我。
貓:呢個東仔我都嗌過你唔好呀啦。呢啲野要來的話，邊有得阻?
琪琪:今次唔同。今次係我要罰自己嘛。
 
 
兩姊妹聊了兩個多小時，琪琪就回家。回到家中，琪琪沒有即時睡覺，而是執筆寫信。信的內容如下:
 


東仔:
 
很對不起。我只能陪到你放榜。這大半年我很開心。很多謝你。只可惜我想像不到我們可以有將來。既然公司剛好要我到外國受訓一段長時間，那我們的這段關係就到這裏結束吧。請原諒我沒有勇氣在你眼前說這番話。對不起!
 
請記住，如遇到心儀的對像，請別猶豫。我真心希望你幸福!還有，你記得某一個晚上你應承過我，如果我不要你，你一定要接受嗎?我知道這樣對你很不公平。你一定很傷心。其實我又何嘗不是?你或者也會因此恨我。如果你真的恨我，我也無話可說。因為是我的錯令你恨我的。
我真是愛你的。但我們活在這世界總不能隨心所欲。請你聽我最後兩個命令。放下我和好好讀書、生活。
對不起，多謝你!
琪琪
 
2007年6月
 
 
翌日，琪琪辦理完登機手續就寄出這封信。之後她就準備登上前往英國的飛機。上機前，琪琪憶起很多她和東的畫面。但偶爾，勤的身影也出現在她腦海畫。這令琪琪想在:”到底勤的近況如何呢?”