由青梅竹馬開始: 瞞騙

四人到酒巴坐下時，時間已是晚上九時。佩兒的練習差不多已完結。勤知道佩兒很快就會打電話給他，開始坐立不安。到九時二十分左右，在四人談笑聲間，勤的電話響起了。勤望著電話那閃縮的眼神，就像告訴其他人誰打給他一樣。勤還未想到怎樣向佩兒交待，就由得電話一直響至斷線。之後勤即時將電話調較為震機模式。但四人的對話還未恢復，勤的電話就震了。
琪琪、貓和JOE都望著凝視住電話的勤。勤還是猶豫不決。幾秒後，JOE說:“呢個電話始終都要聽架。”於是勤就帶著電話走到酒吧門外接電話。
 
佩兒：勤豬豬，你頭先做乜唔聽我電話呀？
勤：呢度好嘈。聽到時已經太遲。你練完波啦？
佩兒：係呀。你同唔同我食宵夜呀？
勤：唔啦。我同阿JOE飲緊野。
佩兒：你揼低我唔理呀？
勤：梗係唔係啦。
佩兒：咁你聽朝陪我食早餐補數？


勤：好。
佩兒：你晏晝影相好唔好玩呀？
勤：冇話好唔好玩嘅。
佩兒：唉……我唔阻你啦。你都冇心機同我講嘅。你繼續飲啦。
勤：唔好咁啦。聽朝咪見囉。
佩兒：哦。
勤：你早啲訓啦。我電話冇乜電，聽朝再講。
佩兒：BYEBYE。
 
勤關了電話，回到酒吧內。其他人沒有過問勤與佩兒說了甚麼，就繼續聊。四人多談了個半小時左右就離開。勤見琪琪說會回家，也說自己回家睡。於是四個人就一起坐在巴士上層。貓和JOE在前面的一排並肩而坐，琪琪和勤就在後面一排。這情況反而令兩人有點尷尬。他們只能望著外面的景色，或者看著貓依偎在JOE身上。疲倦的琪琪決定閉目養神。她刻意將自己的頭倚在窗上，避免自己睡著的話會碰到勤。而勤就只能幻想琪琪再一次將他的肩當成枕頭。


 
 
 
車駛到四人所住的區域。JOE準備下車送貓回家。其實勤應該也在同一個站下車。但貓在離座時轉身說：”阿勤你送琪琪返屋企啦。”勤當然不反對。雙眼仍然緊閉的琪琪也聽見了貓的建議，她選擇不發言。車再多駛幾分鐘，勤就叫琪琪下車。由車站走到琪琪家樓下只需要三分鐘左右。
 
琪琪：其實你唔駛送我喎。你返屋企先都得。
勤：都來到呢度。唔爭在啦。
這條路兩人曾經拖著手走過無數次。但今次兩人卻要保持著一定距離。在路上勤愈來愈覺得自己無法控制情緒。他很想告訴琪琪自己仍然喜歡她。佩兒暫時已被他拋諸腦後。其實琪琪也希望可以再拖著勤的手走這段路。她怪當年沒有好好處理勤的顧慮，所以現不可能拖著勤的手了。
勤一路叫自己鼓起勇氣。終於兩人來到琪琪家樓下，準備道別時，勤對琪琪說：”我有啲野想同你講。”
琪琪：咩野？


勤：我……我其實放唔低你。
琪琪：唔好咁講啦。你有女朋友啦。
勤：今晚同返你一齊我好開心。呢種感覺係同你一齊先有。
琪琪：阿勤呀，我今晚都好開心。坦白講我從來冇放低過來你。但嗰時我處理得唔好，我要承受。何況你都有女朋友啦。你都要對佢負責任。同埋……如果我地以前唔WORK，再試一次都未必WORK。或者老套啲講，我地做朋友適合啲呢。
勤：唔係咁……
 
琪琪沒有讓勤再說下去，立即轉身上樓。勤看不到的，是琪琪眼中的淚水。勤沒有流淚，卻垂頭喪氣。如果可以的話，他想立刻回家睡個飽。但他應承了佩兒明早一起吃早餐，就唯有回宿舍。在車上，他大部分時間都是想念著琪琪。沒錯琪琪不如佩兒那樣主動、性感和嬌媚，但琪琪帶給自己的舒適和幸福感，是佩兒一直無法給他的。勤從褲袋拿出電話，想打開看看琪琪會不會打電話或者發訊息給自己。但勤又想起他告訴過佩兒電話快沒有電。如果佩兒打來電話又接通，他就百辭莫辯了。勤將電話放在背包內，希望快點回到宿舍開啟電話。
勤回到宿舍樓下時，竟然見到佩兒在大門外。佩兒主動走到勤面前擁著他：”勤豬豬我好掛住你呀。”勤問佩兒：”成十二點幾你喺度等我？”
佩兒：咁人地掛住你呀嘛。
 
 
 
勤：咁你食左野未呀？
佩兒：食左啦。
勤：咁我送你返宿舍？


佩兒：唔駛啦。你都攰。我自己返去就得。見到你攬到你一陣我已經好開心。
勤：唔得。咁夜我唔放心你一個。我入去去個廁所先再送你返去？
佩兒：好呀。你對我真係好。我幫你拎住個背囊先啦。
勤讓佩兒拿著背包，自己就到宿舍的男廁小解。他提醒自己，暫時又要在佩兒面前飾演好男友的角色了。但當他回到宿舍外面時，卻見到佩兒的臉色和兩分鐘前完全是兩回事。佩兒拿著勤的手提電話對勤說：”你又話冇電？點解仲有成三格電？”