由青梅竹馬開始: 這麼近 那麼遠？

JOE也有些錯愕。他說:“佢應該約左其他人影相掛。”
 
果然，他倆隨即見到琪琪和其他同學合照。勤留意到一個貌似CARSON的人也在人群中，但琪琪跟他沒有任何互動。而琪琪拍過幾張照片後，亦見到勤等人出現。
 
琪琪和勤對望了一眼，兩人都覺得太尷尬。如果琪琪未見到自己，勤或者還可以急步離開避免這難為情的情況。但現在已不可能了。正當勤不知所措之際，琪琪主動走到勤面前對他說："你來同阿貓佢地影相？"勤點點頭說了聲"係"，就不知道可以再說甚麼了。這時阿貓即走到兩人附近說："咁啱撞到就一齊同我影相啦。"勤和琪琪不便推辭，就和阿貓、JOE合照幾張。及後阿貓又遇到其他同學，就和JOE撇下勤同琪琪，忙著和其他人合照。
 
勤和琪琪兩人站在一角，氣氛還是有點怪異。過了幾秒琪琪主動問勤：”你幾好嘛？”勤想了一想，才無精打采地說”冇穿冇爛咁囉”。琪琪見勤心情欠佳，就說：”你係咪見唔到我唔開心？仲嬲我？”
 
勤：唔係。
琪琪：阿勤，對唔住呀。嗰時係我處理得唔好。但我真係冇做過對唔住你嘅野。阿穎有幫我俾封信你架應該。


勤：我有睇。我明。
琪琪：咁你唔好乸埋口面咁架。嗰個人都喺度架。我真係同佢冇野。落左莊之後我直頭冇同佢講過野。何況你而家都有女朋友啦。聽聞話仲好索添！
 
勤再一次不知應說甚麼，只能報以苦笑。幸好阿貓和JOE正好回來兩人所在之處。阿貓隨即提議四人一起吃晚飯。琪琪本來約了一些同系的同學，但在阿貓誠邀下終於答允。而勤則猶豫不決。他心底裡想有更長時間和琪琪一起，但他又不想騙佩兒。阿JOE見勤未能決定，就索性問勤：”係咪要拎到批文先呀？”勤搖搖頭。其實佩兒在晚上有校隊練習，所以勤就算和他們去吃飯，也不會因此少了陪佩兒的時間。
之後四人就一起離開校園，往旺角進發。JOE和阿貓這對情侶拖著手走在前方，勤和琪琪這對已分手的戀人就在後面並肩而行。他倆望著前面兩人的背影，都想著昔日的時光。在路上，勤終於嘗試向琪琪打開說話的匣子。
勤：你今日唔影畢業相嘅？
琪琪：我去左exchange嘛上個學期。所以要extend多半年至畢業。