起舞吧!愛與舞蹈的感覺: 6
「你去邊呀？」「我約左屋企人食飯，夠鐘啦」同佢對望左差唔多兩分鐘，尷尬癌發作嘅我好快就搵個藉口離開左現場，呼…呼…呼，點解…點解個身咁熱？
「阿女你到啦，唔駛跑過黎喎」爹地媽咪兩個已經坐左係大堂等我，一家三口去左平常食飯果間度食，老闆老闆娘都認得我地，所以送左個甜品比我地…
「嗯…，好味…」我一直食一直食，直到返屋企果陣就諗返岩岩對望果一刻…
「樂盈，不如聽日…」原來係WhatsApp收到影天嘅訊息，聽日？，佢想…
「聽晚我要練舞，你問下依旋就知」好快就想Close File，而姊妹果邊就開始…
「喂，你唔係好想一齊咩，佢約你做咩拒絕呀」呢個係芝詩嘅回復，而其他…
「不如結左婚先同佢去街囉，盈盈你咁保守架咩，想要幸福就去啦」麗晴好似唔記得琴日發生過咩事咁，一邊鼓勵我一邊就Send同佢「男友」嘅對話過黎。
「咁我…」「你答佢可以，再問下依旋佢阿哥想去邊咪得」好似將依旋變左個卧底咁用，而呢個方法令到聽日嘅約會好快就約得成，佢仲送埋我去跳舞教室…
「聽日」約成之後就同姊妹傾緊點做好，我有嘅化妝品唔多，佢地見慣見熟…
「聽日十點樂盈屋企集合，愛情大作戰開始！」芝詩就咁宣佈完大家都好興奮咁傾下我咩妝好睇，咩妝岩我面形咁，而第二朝十點，大家真係齊集係我度…
「A0第一次拍拖係咁架啦，放鬆啲，佢唔會食左你嘅應該」芝詩一路幫我化妝一路同我講緊啲唔知邊度黎嘅說話，喂…，你咁講搞到我更加緊張呀小姐…
叮噹…，門口傳黎按鐘嘅聲音，睇返時間…仲有半個鐘喎，邊個咁早過黎？
咔…，麗晴好快就去左開門，跳入黎嘅係依旋，而影天就跟左係後面，嘩…
「依旋？」「姐姐你好靚呀」「樂盈…你好…靚…」再一次口窒窒，而我地兩個半個鐘就係屋企出發…，嗯…，目的地係不明，但佢好似好有目的咁行，嗯？
「Book左姓劉，兩位，電話係…」依家時間係十二點半，佢帶我黎食晏畫？
「一陣去邊？」「去睇戲？」我地兩個好似朋友咁傾計，一個鐘後走出餐廳，諗到嘅只有睇戲呢個選擇，而今日揀左套笑片黎睇，完左就不停計返咩事…
「不如去行多陣書局？」係愉景新城睇完，不知不覺就到左細細間嘅誠品…
「好，仲有兩個鐘先跳舞…」突然記起呢件事，所以同時係提提自己要跳舞…
「咁一陣搭小巴返去？」我地講完有咩要做就分開去睇書，但我個心仲係噗噗…噗噗好快就亂跳…，嗯，我知啦我知啦，我對佢係有感覺，但係太快…
「唔該…」隔離一個女仔望住我手上本書…，呀，係我阻住佢拎想睇本書…
「唔好意思」好快就行左去另一邊，而呢件事亦都比影天睇在眼內，佢好快…
「不如坐係度睇？」我地兩個就咁係隔離睇左成個鐘書，差唔多係時候走…
「嗯，去搭車啦」我地慢慢行返南豐中心，慢慢行去巴士站，上落巴士，直到跳舞中心門口，聽到芝詩佢地三個把聲，先知道係時候要分別，有啲唔捨得…
「姐姐你黎啦」依旋見到我係門口出現，好快就撲出黎我身上，嗯，好重呀。
「好啦，咁一陣黎接你地啦」你地？，接果個係包括我？，發生咩事呀依家？
唔知咩事嘅我跟佢地三個返左班房，亦都開始左今日嘅練習，隻腳好似冇事？
「呀…」跳左差唔多半個鐘，隻腳開始唔聽使，係一個大鞭轉之後跌低左…
「盈盈」芝詩聽到我嘅叫聲之後好快就走過黎我身邊，睇下我隻腳發生咩事。
「樂盈你係隔離休息一下先」老師同芝詩幾個搬我另一間房休息，之後等到差唔多六點鐘，佢地完左之後就過黎睇我點，而且影天黎到果陣都黎關心下我。
「做咩呀樂盈？」「冇咩事，係有少少事發生左」唔同影天講左之後就等芝詩佢地過黎我，最後…最後就係要去醫院，嗯，睇黎今日開始都唔可以跳舞住…
「邊位係高樂盈屋企人…」我聽到少少關於我隻腳嘅問題，睇黎真係好嚴重…
「阿女你點呀？」「我…我冇咩事，但係我隻腳…」同媽咪講左自己嘅心情之後，就望到姊妹同依旋係度望住我，望住我隻裹蒸糭…，返去休息下再算…
「樂盈你點呀？」係車上面不停收到姊妹嘅關心，但係今日我個心真係好攰…
「好啦，我地聽日再黎探佢…」聽到芝詩最後一句咁樣講，之後我都訓著左…
「阿女，我周你爹地去返工啦，有咩問題你就打比我」媽咪講完呢句都出左門口，而我就想回歸周公嘅懷抱，呼…，希望呢一個禮拜嘅休息可以快啲過。
叮噹，門口傳黎按鐘嘅聲音，係芝詩佢地四個…，但係我好想自己一個靜下…
「樂盈，今日好啲未？」「嗯，你地有野做可以唔使專登過黎架喎」同佢地傾左幾分鐘我就返左房，訓教又訓唔著，睇書都冇心機…，究竟依家有咩可以做？
「不如去唱K呀？」麗晴係呢個時候比左呢個建議，而大家都贊成，但係我…
「我去book位」「唔該，想要12點K Buffet，5位，係，係，學生價，唔該」5位？，姊妹你地去唱咪得囉，做咩，做咩係都要拉埋我呢個唔行得嘅人去。
「入面果個殘豬，行啦」殘豬？，呢個係咩形容詞黎架，想笑死我咩。
「黎啦」我一拗一拗咁行出去，而今次就係芝詩同麗晴兩個支撐我去K房…
「好多謝你地」去到K房第一件事就係喊，喊左出黎果陣佢地都望住我…
「你唔係樂盈，你係邊個，講」喂喂喂，咪住呀，我咪你識果個高樂盈囉。
「哈哈，唱歌嚕」佢地對我嘅多謝好似冇咩反應咁，只係點點頭就點歌…
叮…叮…，手機上收到兩個訊息，係依旋佢send過黎，咦，佢去左我屋企？
「我同芝詩佢地去左K房，你唔洗擔心我」同依旋講左兩三句之後就收左線，直到收到影天嘅訊息，嗯…，冇事冇事冇事，佢只係朋友之間嘅關心啫。
「依旋話你去左K房，有咩需要都可以打比我架」唔通你24小時On Call？
「知啦，多謝你關心」係回復左呢個訊息之後，我就疊埋心水同姊妹們高歌…
「好啦，K就唱完，大家仲想玩咩？」「不如去我屋企，你地咁樣好攰架」「好啦，不如就去IKEA食野？」「有冇聽我講野架？」佢地好似咩都聽唔到咁，一步一步咁帶住我行去IKEA，問我左想食咩之後就去左買野，直到食完之後…
「咪住各位…」係呢個時候講野，佢地終於都聽到我想講野，我想發表嘅野…
「好多謝你地四個咁鍚我，但係我唔知仲可唔可以跳到舞，同你地仲咁好友誼，一齊笑一齊喊，所以…所以你地唔駛對我咁好，我唔係你地想像咁堅強…」講到呢到我已經忍唔住喊左出黎，而佢地四個都走埋黎一齊拍我膀頭。
「你講緊咩呀傻瓜樂盈，你當我地係邊個？，我地係你呢個傻瓜樂盈嘅姊妹，邊度會咁易走」芝詩講完呢句之後大家都點點頭，好多謝你地四個，多謝！
呢一日之後，我地五個一齊玩一齊笑，直到返學前嘅幾日，得返自己一個…