起舞吧!愛與舞蹈的感覺: 5
「好嘅劉太，我地聽日見」劉太？，係唔係佢地兩個阿媽？
「盈盈你仲唔換衫？」「黎啦」好快就換完蚜返屋企，但我同依旋嘅差距…
「姐姐你冇事呀嘛？」依旋行係我隔離問，不過我唔可以比佢知我諗緊咩…
鈴鈴鈴…，呢個時候依旋嘅電話響起，睇到佢set左做阿哥，即係影天。
「阿哥？，係係，我返緊黎，叫埋樂盈姐姐？」講呢句嘅時候，依旋望住我，但面有難色，而聽佢地嘅話語間都提到阿媽，係唔係即係我岩岩聽到嘅劉太？
「姐姐，阿哥叫我問你一唔一齊食飯，仲有我阿媽。」依旋怕怕羞咁問左我。
「我問問屋企先…」「阿女，我同你阿爸今晚都要加班，你自己食啦」正想打電話問媽咪果陣，WhatsApp就收到呢個訊息，即係今晚返到屋企都係食自己…
「可以」好快就復返依旋，而我同佢兩個就慢慢行到佢屋企，望住個舞蹈室…
「樂盈歡迎你呀，做咩望住個舞蹈室嘅？」影天好快就出黎迎接我。
「冇，我見依旋進步得咁快，睇黎佢係呢度都流左唔少汗。」「都係呀，見佢每次溫書後都係度練舞，估唔到佢可以咁勤力」傾傾下計，工人就叫我地食飯。
「大家食飯」係飯枱上同大家講完呢句，就開始食飯，但大家都好靜冇出聲…
「話說阿女你學舞學成點？」「我好好呀，唔知呢次表演跳唔跳得掂呢」「我見你都練得咁辛苦，應該就冇問題」聽到佢地講緊嘅野，而我都冇出聲繼續聽。
「樂盈你有咩意見？」突然比影天點名問意見，會唔會太刺激，太過興奮呢？
「Er…，同依旋跳左差唔多兩個月，其實都見到佢嘅進步，不過呢…」係呢度我都想問下依旋佢每日練多個鐘，同我嘅練習時數有冇咩唔同，點知…
「姐姐你做咩？」「我…冇事…」回應左依旋嘅問題之後，我就努力咁食飯。
「不如姐姐過埋黎一齊練舞」依旋好似知道左我嘅問題，佢咁提議左呢樣野。
「可以咩？」「你肯過黎就得，反正咁大間我都用唔哂」越講越興奮，但其餘兩個主人翁都冇出聲，得依旋一個係度興奮，隔左差唔多半分鐘，影天終於都…
「樂盈你幾時想過黎同我講聲就得」影天嘅一句說話令依旋佢成個人都彈起。
「姐姐可唔可以陪我溫埋書先走？」今日係星期三，即係九點半一定要走…
「都…可以嘅」其實到依個時候，我都應該要做埋功課溫緊書。
「好野」去到依旋間房，我坐係地下度開始自己嘅溫習之旅，兩個鐘之後…
「差唔多時間啦，我都係…」「糖水時間」依旋媽咪拎住兩碗紫米露入黎…
「伯母？」「咁早走？」「聽日仲要返學，所以走啦」同伯母傾左十五分鐘後…
叫工人裝左兩碗紫米露比我拎返屋企，而依旋就成泡眼淚咁送我出大屋。
「做咩呀傻妹」「姐姐，你聽日跳完舞會黎架何？」Er，聽日我其實都要溫書。
「聽日應該唔得啦，星期四應該可以」諗起圖書館就真係正，嗯，我要當值。
「咁好啦…」好快就送左我出大屋，嘩，原來電話有咁多訊息，姊妹們想點？
「睇黎好事近啦」「樂盈要脫離我地啦」吓？，我幾時話唔要班姊妹，傻左？
「你地傾緊咩？」「嘩，樂盈呀😱😱」嚇完佢地之後就冇左件事，之後就到…
「Time up Pens down」好快就到星期四嘅英文科，測驗仲有一科就完啦。
「姐姐」測驗後嘅小息，依旋就走上黎我班房，手上仲拎住本書，綜合科學？
「晏D個小息之後就考啦，點算好」睇到佢本書入面，mark左幾個問題…
「等等…」拎左部Ipad出黎，望住一堆又一堆嘅筆記，終於搵到個問題根本。
「明唔明呀？」「大致上都…」「依旋！」背後突然傳黎一把女聲叫停左依旋。
「咦，做咩你係度嘅」「黎搵你參加聖誕節個活動架，樂盈姐姐你好」見到我之後就主動打招呼，呢位係…？，我個腦又開始打結，之後依旋冇介紹就走左…
「盈盈，係唔係買野飲架？」樂愛係我旁邊問我呢個問題，小息仲有十分鐘…
「呀，快啲落去」拉著樂愛跑落小食部，用左兩分鐘就到，又係選擇困難時…
「樂盈」一位老師係背後叫著我，吓？，想我參加聖誕節個活動，呢個咪…
「樂愛同芝詩都可以一齊參加，我見中一嘅劉依旋都報左名，等睇你地表演」老師講完呢一句就行開左，而上堂鐘聲咁岩呢個時候就響起，即係四人表演？
「行啦盈盈，唔係上堂遲到架啦」樂愛拉著我隻手係度行，而我個腦又轉緊…
「係唔係唔想去果個活動呀，咪唔表演囉，反正聖誕我地都有表演」芝詩聽到樂愛嘅說話之後就係群組上面打左呢句，嗯…，唔係唔想參加，但時間果度…
「Good morning class」英文老師係呢個時候入到黎，唔理啦，上堂先。
鈴鈴鈴…，個問題一直係我個腦到成日，食飯果陣好似傾左啲咩話題，死啦…
「盈盈，聽日見」芝詩係我肩上拍左一下，而佢、樂愛同易心向大門口行去。
「你地唔陪我當值？」「駛咩我地陪呀」「姐姐」我隔離再次出現依旋嘅聲音。
「有依旋陪你得啦，我地返去溫埋聽日果科呀陰公」芝詩一直講住呢句一直同另外兩位姊妹遠離我，而今日圖書館當值嘅野都係借還書，最多係上下架咁…
「有咩書好睇呢？」依旋係我上緊架果陣講左呢句說話，佢都開始睇書？
「睇呢本呀，都唔錯」遞左本書比佢之後就幫同學借書，再開始做功課。
「樂盈，應該冇咩野要做，十五分鐘後就可以走啦」老師係我背後講左呢句。
「好」回應左呢句之後就沉醉左係我份功課上面，咦，要交閱讀報告呀又…
做完手頭嘅功課之後就入左書庫搵岩做讀書報告嘅書籍，而依旋佢都走入黎。
「姐姐你搵緊咩」「閱讀報告用嘅書」「一陣係我屋企比本你呀，有本幾好睇架」「真架」好似有啲大聲左，但係咩都唔洗諗果種感覺真係好，嗯，應該係。
「老師，咁我走啦」「辛苦哂」同老師交待左一聲之後就離開左圖書館。
「姐姐」一直聽到呢把聲叫住我，原來係依旋，係喎，我好似應承去佢屋企。
「嗯，行啦」係呢個路程入面都冇理過依旋，係我個腦一直諗緊聖誕表演。
「小姐，小姐」兩下小姐嘅聲音，提我已經去到依旋屋企，而影天亦都係度。
「依旋，又搵樂盈幫你補習？」「係呀，仲有練舞」呢把聲提醒我要練舞。
「但係我冇帶裝備喎」「我有呀，去我間房先」依旋帶住我入去佢間房。
「姐姐，可以睇下呢本書」依旋比左本書我，多一份知足幸福，好似幾好喎。
係佢間房溫書，溫左差唔多兩個鐘，之後食完飯就比佢留低左，佢開始著鞋…
「依旋，8點啦喎，依家跳舞？」「係呀，姐姐你都陪我跳」依旋拎多左隊鞋比我，咁岩就係我個碼…，明明…我同依旋兩個個碼完全唔同，點解會有係度？
「依旋…」「開始啦」係度練著舞，就係咁又兩個鐘，直到影天黎左叫我地。
「樂盈岩唔岩著呀？」吓…，原來係影天準備架？，點解，點解要咁幫我