那天放學後，我撞見有同學在學校後樓梯敦倫: 58 - 個心離一離

我正在電腦面前全神貫注地打字，在寧靜的環境中，一把女聲的出現嚇了我一跳。

「咁快食完飯嘅？」

「嘩，嚇死人咩，個心離一離呀。」

「唔驚啦，你又唔係汪明荃嘅年紀，死唔去嘅。況且你死咗對我有冇影響嘅。」

「唔係呀嘛子芊，我哋識咗咁耐，我真係瓜柴嘅話妳連一秒傷心都冇咩？」





「咁我幫你默哀一秒鐘。」

「多謝曬喎。」

「係呢，平日好少見你食完飯之後上嚟，今日做咩一反常態啊？有咩搞先。」

「我唔鍾意拖延，希望今日拿拿聲打埋詢問訓導組關於口罩方面有冇咩特別要求嗰一封email，早啲完成一個target個心就唔會唔掛住件事吖嘛。」

「呢個處理方法非常之國鋒，識你咁耐你都係咁嘅樣，完全冇變過。」





「咁我當你係讚緊我喇，多謝先。」

「我從來未見過好似你呢啲咁厚面皮嘅人。」

「咁你而家咪見到囉。係喎，你話平時見唔到我，即係你平日都成日食飯時間上嚟圖書館啦？」

「係啊，基本上日日都係咁。」

「上嚟有咩做啊，睇書？」





「初中會睇囉，宜家咁鬼多嘢做，邊度得閒啫，我背緊<岳陽樓記>呀。」

「哦~ 自以為好高向嗰條友吖嘛，講到好似成個世界得佢“不以物喜、不以己悲”咁樣。」

「唉呀，你真係好煩呀，搞到我掛住同你講嘢，背唔到書呀！」

「嘩，咁橫蠻無理嘅女人我都係第一次見，明明係你撩我講嘢在先，係都應該我投訴你阻住我打email畀訓導主任啦。」

「咩呀，我有講錯咩？如果唔係你今日無啦啦走上嚟坐喺圖書館嘅電腦前面，我又點會忍唔住要撩你傾計啊。而且你都冇投訴我，又冇打斷我，即係你都有份阻住我溫書！」

「痴線，打橫嚟都有嘅，得啦我錯我錯，妳背書啦，唔煩你喇。」

為了不與蠻不講理的子芊繼續說話，我立即快手完成email，回到班房等待下午上課時間。

xxxxxxxxxxxxxxxxxxxxxxxxxxxxxx




(阿方視角)

「嘩，你做咩喺張工作紙畫咗咁多圖案。嘩，呢個彌豆子真係畫得好似。」

「袁世傑，你唔係真係聽肥拉教書呀嘛，認真？」

「你估我想㗎，學校規定今日晏晝拒絕任何形式嘅罷課，叫我哋返去班房，話有重要宣佈。」

「係嘅阿方，識你一段時間，你上堂最認真嘅時候都係昅女嗰陣時㗎喇。」

「死你個去啦講啲咁嘅嘢，細聲啲添呀。」

「係嘅方哥。」

此時，我眼尾瞥見肥拉突然站在我和袁世傑後面。我頓時嚇到「個心都離一離」，看來我又要承受他的批評了。





「唔好再傾計呀袁世傑！」

我心中稀奇，因為她今次竟然不是罵我，簡直是奇蹟。

「係嘅係嘅。」

「舊年你個班主任李sir同我講，你個蛋散功課又唔交、上堂又唔留心聽書、又成日上堂瞓覺。佢話你淨係得兩樣嘢認真做，一、就係打籃球，二、就係追女仔。你可唔可以返嚟讀書呀？」

此時，全班都恥笑袁世傑，我看著他手足無措、無法解釋的樣子，很想貼出「有時真係忍唔住笑.jpg」。就在我們全班恥笑的時候，中央廣播系統響起。

「各位老師、各位同學，我係梁副校長......」

(阿方視角完)





ig: marx_ice_