那天放學後，我撞見有同學在學校後樓梯敦倫: 54 - 談判(2)

「各位同學，聽我講兩句先。」

校長在座位上發言，大家紛紛暫停爭執。

「彭老師已經為咗佢引起同學誤會而道歉，我哋唔應該浪費時間喺呢件事上面，我哋仲有好多樣嘢要處理。」

「校長，我同意我哋仲有好多問題要傾，但係我哋同學對於彭老師搶奪相機嘅行為同埋梁副校長嘅威嚇言論極度唔理解，並且因此感到好憤怒，我希望校方會嚴正處理同埋跟進。同一時間我希望校方能夠交代先前3D班俾人收文宣嘅老師有咩後續。」

「鐘國鋒同學，我哋而家唔討論呢個問題住，我哋必須要move on啦。對於任何老師有乜嘢投訴嘅話，可以寫信去校董會投訴。校董會喺作出調查之後，會喺網站刊登出調查報告。校董會嘅調查係絕對中立嘅，喺校董會對於呢啲調查有任何結果之前，我並不適宜發表任何評論，同學亦都一樣，因為我哋唔應該未審先判。我哋返返去正題先，頭先你哋係咪提到類似各大專院校連儂牆嘅形式？」





「冇錯。」

「我覺得呢個方向係可行嘅，因為符合到畀各方嘅人都發表意見，亦可以訓練學生嘅批判性思考，有學習意義，同一時間又唔會好偏頗，我哋校方有一樣擔心。」

「邊一方面？」

「我哋擔心有同學因為受到社會嘅政治仇恨氣氛影響，會喺埲牆上面寫上一啲有攻擊性、侮辱他人嘅說話、甚至粗言穢語。」

「所以我哋有思考過一個折衷嘅方案。正與校長提到，退一步海闊天空，如果我哋可以確保場上面並冇任何粗言穢語，類似大專院校嘅連儂牆可行性高唔高？」





「我認為係一個可行嘅方案。我提議同學可以喺memo紙上面寫低自己想表達嘅嘢，跟住放學去一個箱度，校方每日放學之後就會現場每一張memo紙上面有冇粗言穢語。如果冇嘅話，我哋就會即時幫你哋釘上去。」

「校長，好高興我哋可以喺連儂牆個問題上面達成共識。」

「談判永遠都係解決衝突嘅最佳手段。」

「另外有一個問題，就係罷課嘅問題。呢一個問題除咗我哋自己研究之外，亦都有詢問過學生會。有請學生會主席。」

「我哋學生會有同其他學校嘅內閣溝通，佢哋提到其他學校允許學生罷課，佢哋會提供操場、禮堂或者課室嘅一啲空間畀罷嘅同學去坐低同埋自行溫習。」





「唔該曬主席。我哋行動組希望校方可以參考其他學校嘅方式，提供一個安全嘅地方畀同學罷課。」

「我哋校方就呢個問題有討論過，亦都思考咗一個方案，有請梁副校長。」

「唔該校長。我哋校方願意提供半個操場畀大家作罷課之用。而喺罷課期間，同學必須要留喺半個操場入面規定嘅範圍，並且穿著整齊嘅校服。我哋亦都希望參與罷課嘅同學保持肅靜，唔好打擾喺其他課室上堂嘅同學。」

「唔該曬梁副校長。校方計劃將連儂牆安置喺操場旁邊，讓到罷課嘅同學亦都可以寫低佢哋嘅諗法。」

「我可唔可以詢問一個問題？」

「梁逸軒同學，請講。」

「有同學曾經詢問過學生會關於口罩嘅問題。同學喺罷課期間、甚至學校範圍，可唔可以戴上口罩？可以嘅話，有冇規定邊啲顏色唔帶得？」

「喺同學嘅衣著形容方面，我將問題交畀訓導主任吳sir。」





「係，唔該校長。校方並無相關嘅規定。我哋校方一向鼓勵同學返嚟學校嘅衣著同儀容要以樸素為主，所以只要係淨色嘅口罩，同學都可以配戴，不論係任何顏色。」

「明白，我哋將會發出公告通知同學。」

「好開心學生代表願意同校方進行交友去避免衝突，我特別要多謝梁逸軒同學同埋鐘國鋒同學。但係，喺大家表達自己意見嘅時候，我哋有一個好重要嘅原則。」

「係...？」

「希望所有自行成立嘅學生組織，包括「行動組」，可以喺作出任何宣布同埋舉辦任何活動嘅時候，講明佢哋嘅立場並非代表校方立場，因為校方喺面對呢啲政治事件係中立嘅。

同一時間我哋亦都唔希望有穿著我校校服嘅同學喺街上面派發政治傳單，以對應返校方喺面對政治事件嘅立場」

「冇問題，呢個係一個合理嘅要求。多謝校方喺一啲重要問題上面讓步，解決到學校緊張嘅氣氛。」





「好開心我哋可以有呢一段建設性嘅對話。」

xxxxxxxxxxxxxxxxxxxxxxxxxxxxxxxxxxxxxx

ig: marx_ice_