那天放學後，我撞見有同學在學校後樓梯敦倫: 33 - 起火

我和阿方在交談途中聽到地下一層有人在尖叫，於是我們打算走下去一看究竟。

今天的樓梯異常擠迫，雖然與平時一樣是放學時間，但今天的同學似乎更希望擠擁到地下。

在就快接近地下的地方，我聽到訓導主任吳sir正在大聲向同學呼喊。

「唔好圍埋嚟，散開，向學校門口嗰邊行！」

我們決定在一樓離開擠迫的樓梯。我們看見在一樓的欄桿旁，有很多同學俯伏在欄桿上，看看地下發生甚麼事情。





我們也走到欄桿旁邊。

「嘩，火燭喎。」

「係呀，係下面嗰層。」

「阿方，火燭嗰個位係邊度嚟㗎？」

「唔知？」





「嗰度係學生會室呀。」

「Hi黃逸軒，你唔使去陪女咩？」

「我條女話好驚，所以自己返屋企先喎。」

「驚閪。我哋咪又係喺度睇，況且唔算特別大火，又冇話有咩濃煙湧上嚟。」

「個個好似你咁勇咩阿方，況且人哋女仔嚟。」





「女仔就一定驚㗎啦咩，左膠撚yeung喺度嘅話一定話你歧視。」

「我今年係佢教英文呀。」

「恭喜曬先。」

「國鋒，聽講你哋班中史堂好開心，仲有人表演歌喉㖭。」

「阿方聽日高唱<天命最高>。」

「恭喜曬你！今年你哋有冇咩極品老師？」

「吔屎啦你。講起極品老師又唔係冇嘅。開咗學先一兩個月，我哋個econ老師堂堂喺度話我哋上堂唔專心、功課又交唔齊，從來未試過教過一屆咁差嘅學生。

佢有個名言係咁重複，就係“我教咗咁多年書，我有冇話過畀你聽我搞咗幾多年書呀？”」





「所以去到最後佢有冇話畀你聽教咗幾多年？」

「冇啊。」

「挑！」

「我哋班個econ老師花名叫做turbo。佢講嘢嘅語速極度快，但係又好譖氣咁一句嘢解好耐。佢堂堂都遲落堂，成日食曬我哋啲小息時間。」

「咁契弟？」

「仲有一次我喺麥當勞撞到佢，嗰陣時謝霆鋒代言安格斯牛堡。我喺佢後面排隊，我聽到佢話“唔該我要一個謝霆鋒”。」

「笑死。」





「今日我搭小巴返學又撞到佢。我琴日冇交到功課畀佢，佢今朝直接喺小巴上面叫我交本簿畀佢。」

「喺小巴上面收功課咁癲？」

「係啊。」

「講到極品老師，你仲記唔記得中一個數學老師？」

「記得呀，肥尹啊嘛。佢成日話叫我哋專心上堂，因為佢話自己上上吓堂會打個關斗，又叫我哋唔好扮大佬，因為佢先係大佬。」

「佢最後真係有打關斗㗎，佢喺表示除變乘嘅時候分子分母要掉轉，用手指打咗個關斗。」

此時，學校的中央廣播響起。

「請所有仍然逗留喺學校嘅同學立即離開，消防員將會好快嚟到學生會室救火。」





此時，黃逸軒問了一個我們忽略了的問題。

「係喎，學生會主席同埋佢個內閣有冇事？」


Ig: marx_ice_
https://instagram.com/marx_ice_?utm_medium=copy_link