那天放學後，我撞見有同學在學校後樓梯敦倫: 5 - 學術性交流

「咸濕仔！」

「死淫蟲！」

「摸到女神屎忽正唔正呀？」

最近幾天，梁書豪一進入到我們級的樓層，便被人鋪天蓋地指罵。而他是一如既往，不反擊也不回應，垂下頭徑直走入班房，坐在自己的位置看書。

突然，我們班房響起一陣掌聲。



我知道一定是綽號「小鮮肉」的geog老師何sir入到班房，大家都在一片掌聲中讚美他很英俊。

"Any volunteers? Volunteers can choose!"

這是一個很好的機會去作弄沒有認真上堂的同學，所以我毛遂自薦答問題。

回答問題後，我選擇了只顧鄰座女同學交談的黃逸軒。

「喂，答問題啦，聽唔聽到呀！」



「唔緊要啦，等佢哋一陣，佢哋進行緊學術性交流。」

全班對於何sir的發言的立即報以恥笑，而逸軒毫無準備，最終答錯問題。

恥笑他的包括我的好朋友阿方。

「何sir好波呀，等佢咁鍾意溝女呀喇。陣間一唔一齊落去食嘢？」

「唔去啦，我有啲嘢要做。」



自修室件事太多疑點，我一定要搞清楚先，要整理線索梗係要搵消息最靈通、頭腦最清醒嗰個。

「國鋒，做乜今日又上嚟？係咪後樓梯又畀人塞住咗，條路行唔到。」

「冇呀，想上嚟請教你啲嘢，同埋乜條後樓梯好有問題咩？」

「全校最後問題就係條後樓梯啦！唔講呢個問題住啦，你今日做咩上嚟。小食部啲嘢食畀人搶曬喇喎，尤其每個小息得兩個牛角包。」

「我今朝有食早餐呀台長。入返正題，你知唔知邊個係家祺？」

「梗係知啦，第一次見到蘇家祺，佢吸引到我注意。」

「點樣吸引你注意呀？你喺邊度第一次見到佢先？」

「第一次我見到佢唔係喺學校㗎，係喺條街度。嗰陣時我喺度行屈臣氏，就見到一個好似係初中嘅女仔買咗好多化妝品，我印像中好似仲有其他嘢，不過我唔記得咗。跟住幾個月之後我喺學校門口見到佢.......」



「係咪就想溝佢啦？」

「唔好啦，我對臭雞冇興趣。」

「嘩，台長，你喺出面咁樣講已經畀人告物化女性。」

「咁我係講事實呀嘛。我見到佢著著校服，先知原來佢係我哋學校㗎。最重要係幾個月之前我小學同學話畀我聽，佢最近約咗條女出街。佢畀張相我睇，宜家諗返起原來就係佢。」

「咁同係咪臭雞有咩關係？」

「我兄弟中伏呀，喺感情好地地嘅時候無啦啦飛咗佢，而分手嘅原因就係因為買唔起一啲名貴嘢畀佢。」

「子芊琴日仲話畀我聽家祺有問過佢做唔做PTGF。」



「你覺唔覺得自修室非禮嗰單嘢好奇怪？」

「係啦，咁差多疑點。不過成班咸濕仔一見到係靚女就偏袒女仔，而啲老師一見到家祺喺度喊，就已經冇理到件事入面嘅疑點。係喎，我聽人講書豪好似準備畀人記小過。」

「都未查清楚，認真咩？有冇咩計可以令到我哋更加接近真相？」

「等佢親口講出嚟囉。」

「吓？」

Ig: marx_ice_