好人卡太多 所以愛神憐憫我?: 4.3

 
「不如推到對面河先，嗰度有條單車經直路幾好踩，易上手。」
我比錢個單車鋪老闆
 
我地喺火車站就近既一間單車鋪租左兩架車。
呀蚊著住一套休閒衫，白色t加條牛仔短褲…
雖然佢大約165左右，但其實有前有後，
而且成對白滑腳出晒黎，都唔好話好殺食…
 
「好呀！」呀蚊好似冇乜點諗過就答




 
「你以前冇踩過單車咩? ？」
 
「長洲嗰d三個轆同埋有輔助轆計唔計先？」呀蚊整左個鬼臉
 
「你話呢…咁你覺得自己平衡感點？」
 
「OK啦正正常常…都係咁…」
 
「我教你一次，你睇住點上車同踩…」我見就到美林商場嗰邊條直路




 
「喂！我跟唔到你嫁…記得唔好踩咁快…」
 
「好…首先呢…你先將你另一隻腳跨去另一邊，坐上去個pat度，左腳先做平衡點，然後兩隻手捉住前面兩個handle，用左腳推一推架車，然後順勢踩…」我做個示範比呀蚊睇
 
我向前面踩左一小段，但見呀蚊唔肯試就番番去
 
「做咩唔試下呀？」我問
 
「我…驚嘛…好似好難咁…」




 
「嗱！驚就輸一世嫁啦！放心啦依度冇人，唔會笑你既！仲有我睇住你呢！」
 
「你係咪真係唔笑嫁…」呀蚊扁起個嘴
 
「試下啦…慢慢黎就識…」
 
呀蚊聽到我講之後就試左幾次，但次次都怕換腳做平衡嗰下…
當然啦…學車最難都係依個位…
細細個我都學左成個禮拜先識…
 
「我知一開始你會feel到做平衡嗰下想跌，但唔洗怕，正常既。克服左就ok！」
 
過左成個鐘，呀蚊都勉勉強強做到平衡個下，
但就踩唔起架車…話唔知個重心放喺邊…




 
「喂呀！乜咁難嫁…又話好易既…」呀蚊個語氣已經話晒比我聽就放棄
 
「嗱！你學識左既我應承你做乜都得。」係要比d甜頭先識努力既
 
「嘻！係咪乜都得嫁！」
 
「係呀！快d啦！」
 
可惜事與願違，第一晚佢都係學唔識…
不過聽日只要加把勁應該都ok既…
 
「…」呀蚊垂頭喪氣推番架車去單車鋪度
 
「仲有一日！放心啦呀蚊！有我教你實掂既…」




依d打氣說話真係平時都唔會講…
 
「嗱！你教唔識我既話…到時你車埋我嫁啦！」
 
呀蚊講完先發覺自己講錯野，係咁話「唔係、唔係」，
傻奸奸咁。
 
「傻瓜。」我細細聲講
 
「咩話？」呀蚊問
 
「冇野啦…我話夜啦！」
 
「好啦咁聽日見啦…掰掰教練！」呀蚊揮揮手
 




「小心d啦，byebye…」
 
依d對話曾幾何時我成日幻想可以講出黎…
依家終於有機會講實在太好啦…
不過聽日試下唔教識佢的話…
係咪真係可以叫佢坐我後面呢哈哈…
原來我已經痴左線…