因為EX 我成為左一個禿頭嘅毒撚 然後遇到一隻猫: 51. 重遇
綜合佢之前同今日講嘅野，直覺話我聽件事唔係咁簡單。不過都唔重要啦，因為聽完Grace嘅見解我就知我地唔會好似電視劇咁最後可以一齊返然後開心快樂咁生活。Grace一直都好知自己想要d咩，係衣段時間我可能只係佢一個減壓嘅工具，而之所以揀我純粹因為本身大家熟又有過一段感情，所以對佢黎講可以舒服d安全感又大d，甚至連物息人選同陪養感情嘅時間都可以慳返。衣段時間因為佢想搏殺，所以唔想分神同晒時間去拍拖。但正如佢所講，當佢去到某個位知道自己要進入人生另一個階段嘅時候，佢就會開始物色老公衣個人選，而我嘅性格同條性件，絕對唔會係佢人選之列。所以當衣位人選出現左，即係佢原本世界果個有錢老公，自然亦係我功成身退嘅時候。
當然衣段時間我亦唔係得佢一個，照樣有出去獵食。不過當Grace去到某年紀，其實亦代表我去到某年紀。到底player係咪真係一世都想做player?定抑或去到某個位，佢地玩夠都會想停低搵返個長期嘅陪侶?
如果一開始純粹係貪玩，花心，唔想負責任而做player嘅我估可能係。但我係因為唔想受傷而唔再願意認真對待一段感情，所以要我還原基本去相信返愛情衣樣野其實都幾難。但我唔會否認，我嘅內心深處我知我係寂寞，我都想有一份真摰同長久嘅感情去愛同被愛。
當Grace決定左同佢老公一齊後，喺我地一次無比激烈嘅goodbye Q後，佢突然罕有地好有感情咁同我講左一番說話。
「祖，其實重遇返你後都令我有反思返當年嘅自己… 當年我傷害得你咁深令你變成衣家咁我好抱歉，所以以下嘅說話雖然我知彌補唔到d咩，但至少希望可以令你對當年嘅事稍為釋懷…
當年同你分手，其實我唔係完全無感覺，我都有唔開心過傷心過… 因為當年我對你嘅感情並唔係假，曾經亦真係好鍾意你。而近排我都有重新諗返一遍其實當年點解要對你咁絕情…
重新諗一次後，我發現我之所以咁其實某程度上係因為我要說服自己我無揀錯衣條路。或者你地都無講錯，我係真係變左，比以前嘅我其實係更變本加厲。因為只有變成衣家嘅我，我先可以解釋同說服到自己點解我唔可以繼續同你一齊，所以我逼自己要更偏向鍾意chur，鍾意進步，鍾意結果論嘅自己。唔係咁，我其實就可以繼續同你喺同一條線上面啦，咁點解要分手?
正如我之前所講，每個人都有自己嘅生活態度，如果你真係開心，我唔會講d咩，不過就我觀察，我覺得你衣家過得並唔開心。我唔希望你再因為我或者以前嘅事，去過一d自己原來並唔想過嘅生活… 雖然我地再唔係情人，但你始終係我第一個愛過嘅人，我地係有一種特別嘅bonding存在，我真心希望你以後可以過得開心同幸福….」
或者佢知衣次係我地最後一次見面，又或者佢真係唔想見到我咁，衣次可能係我地分手後我第一次見到完全脫去左偽裝嘅佢，對我表露佢真正嘅情感。
無可否認，佢衣段說話係比左唔少衝擊我，至少我知道當年嘅佢，並唔係真表面上咁無所謂。背後裏佢都有掙扎過，甚至不自覺咁逼自己更偏激去說服自己唔比自己回頭。所以或者愛情係會賭輸，但你輸唔代表另一個係贏，又或者輸其實並唔係真係輸晒全部野一無所有，某程度上你可能都會得到另一d你唔知嘅野。
然後正當我都動搖緊自己信念嘅時候，有日我係街竟然又撞見另一個人。佢係Jessica，而係佢身邊竟然仲拖住左一個兩三歲嘅小朋友。
「Hi…」其實我可以係側邊閃過扮見唔到，因為佢嘅focus係佢個女度根本見唔到我。但好奇心作祟下我忍唔住叫住左佢。
「祖?」而佢見到我就好似有d驚訝咁應左聲。
「衣位係… 你個女?」我直接問道。
「係呀… 琪琪，叫聲哥哥啦。」Jessica有少少尷尬。
「哥哥~」衣位叫琪琪嘅小朋友好可愛咁叫左我一聲。
「乖~」我對住佢都甜甜一笑，然後就望返住Jessica。
「我估你有野想問我，不過衣家唔太方便… 再約?」Jessica見我一臉疑問好似好多野想問咁，但礙於個女係側邊所以同我講道。
「好…」
隔左兩日好快我地就係一間café相見。
「好意外?」佢一見我就問我。
我:「都幾架…」
Jessica:「我其實之前都無諗過…」
我:「所以係咩改變左你?」
「果陣同你分左手後，我繼續搵唔同嘅男仔拍短拖，而主要對像其實都好似你當時情況嘅男仔，即係岩岩失戀比較脆弱果d，因為我覺得咁易得手同埋會令佢地更易變成我嘅同類人。但之後有一次，一時失手下我竟然有左對方嘅BB… 當時嘅我當然無諗住生佢出黎，但BB個爸爸知道左後就唔比我咁做…
我有如實咁同佢講我嘅心態同埋我根本唔相信有一生一世嘅愛情，仲即刻同佢分手，但佢無就咁放棄… 而為左阻止我去落胎，更加24小時痴住我，我係屋企佢就會係樓下”捕”住我，成個變態佬咁…
我試過報警處理，但佢係差館出返黎後都完全唔理繼續咁樣。而佢每次見到我對我會噓寒問暖，成日驚我著唔夠衫或者無人睇住會飲湯水唔夠… 結果慢慢我都唔忍心再報警拉佢，然後唔知係咪因為荷爾蒙關係定係因為佢始終係BB爸爸，慢慢我對佢無咁絕情，落BB嘅態度亦漸漸軟化… 突然間我有種想有個自己家庭嘅感覺。
於是我開始無咁抗拒比機會佢，亦想睇下佢可以為我做到咩程度… 最後終於比佢感動到，仲生埋個女出黎…」Jessica一邊回憶一邊好溫柔帶住心滿意足咁講。
「咁佢無令你失望? 感覺你衣家都好幸福?」我問道。
Jessica:「嗯… 衣幾年佢一直都仲對我好好好錫我，仲好比到安全感我，令我對愛情竟然有返信心…」
「咁都幾好呀~」其實從Jessica頭先一路講一路露出幸福甜蜜嘅笑容我就已經知答案。
「所以我都想收返之前同你講嘅說話… 雖然今次唔係我原意想去賭，但原來真係有機會賭得贏，而且當贏左後所得到嘅獎勵仲好大添… 當然，賭得始終都係有機會會輸，但… 至少我唔會再反對人去賭…」Jessica有d唔好意思咁講。
我:「估唔到真係有人可以改變到你…」
Jessica:「有d野真係緣份同整定嘅… 或者係上天派佢同琪琪黎拯救我掛~ 」
「見你搵到幸福，我都替你開心，希望你可以一直幸福落去啦… 至少你可以証明衣個世界真係有人可以賭贏。」雖然Jessica曾經傷害過我，但作為同路人，我好明佢嘅感受亦從無嬲過佢。佢可以搵到幸福改變自己諗法，我係真心為佢高興。
「多謝… 咁你呢? 衣幾年過成點?」Jessica反問返我。
「如你所願，變成左你想我變成嘅果種人… 所以見到你衣家咁先咁驚訝咁大感觸…」我直接講道。
「當年嘅事對唔住… 不過個天比我地撞返，或者係想我再次改變返你?」Jessica帶點內疚咁講。
「邊有咁易? 不過近排我都真係撞返個ex…」於是我將我同Grace嘅事講左比Jessica聽。
「又會咁橋? 咁有無比左咩衝擊你呀?」Jessica好奇問。
「至少我知道左當年我地點解會分手，同埋都算解開左我嘅心結… 因為我地原來真係兩種人黎，而佢當時亦唔係真係表面上咁唔在乎我。」我諗左諗後講。
「每個相遇可能都係有佢嘅用意，無論點都好，希望你會幸福啦。」Jessica略帶感觸地說。
坦白講，Jessica嘅改變，係令我震驚。始終我之所以變成player，至少有7分係佢嘅功勞。但昔日嘅”恩師”竟然帶頭推翻晒佢以前教我嘅野，咁試問我仲可以點堅持落去? 特別仲要係本身我自己都開始動搖緊嘅時候… 而當衣個時候當你遇上一d比較好傾同投緣嘅對象，你就會更加開始問自己，會唔會就係佢?
講起上黎，可以遇見”佢”其實都係要多得阿偉。事源係有日因為佢成家去旅行，知我自己住而住嘅地方又養得寵物，所以佢就老實不客氣咁塞左隻狗比我叫我幫佢暫養一星期。
「得閒帶Bobby落去散下步，包保有好多女仔埋你身呀~」
佢留低左衣句說話同Bobby日常要用嘅野後就頭也不回咁走左。好彩Bobby都算我由細睇到大唔陌生而且本身又比較乖，所以要照顧佢都唔特別困難。