因為EX 我成為左一個禿頭嘅毒撚 然後遇到一隻猫: 50. 當年 今日
Grace:「佢係hall入面一個師兄… 當時佢比我嘅感覺係真係好叻好耀眼嘅存在。其實…當年雖然我覺得我地差異開始越黎越大，但我果陣都真係好鍾意你，可能因為你始終係我第一個男人，點都會特別有種依戀，加上同你一齊嘅時間係舒服同開心，所以果陣我都有d掙扎，又覺得自己少時間陪你對你都有所虧欠，所以我提議我地一齊去個旅行，或者去完我會更清楚自己想點。
果個trip我地真係好開心… 所以本身我都諗住再繼續努力下，但返黎無耐後，因為hall嘅活動，令我同佢混熟。果陣要攪唔少活動去收生同埋幫freshman過orientation，而衣位師兄係擔當leader嘅角色，見佢帶住成個committee 好有leadership，加上個人又好有目標好清晰自己想做咩，我慢慢都開始比佢吸引到，覺得佢好叻。
到有次機會同佢詳談，佢比左好多啟發同方向我，之後再同你對比，我就發現到個好大嘅分野，然後我再一次清醒同肯定，你唔會比到任何進步我，所以之後我就決心同你分手。而當女人一決定左，就可以變得好快好絕情…」
我:「咁點解你地衣家無繼續一齊?」
「因為佢偷食囉~ 而且一齊耐左後佢比我都已經再無初初果種驚豔嘅感覺，甚至我相信我已經超越左佢… 其實衣家佢係另一條team嘅leader，我成日將佢地當係假想敵，一定要我條team勁過佢地。」Grace平淡咁講。
「哈，原來過左咁耐你都仲係咁好勝…」曾經我都忘記左Grace係一個好好勝嘅人。我感受到佢唔再鍾意果個師兄，但就好想擊敗佢去換取果種成功感。突然我又諗起頭先見到Grace勸Mabel要識適時放手果段片段，或者其實個個人都只係有口話人無口話自己啦。
「如果有一日佢都要under埋我咁我就心涼喇，衣個亦係我衣家嘅目標~」Grace仍然笑笑口咁講，好似一諗起果一日佢就好興奮咁。
「成日咁唔累咩?」我再問。
「累架，但開心喎。人生存總要為自己搵一個目標同動力架嘛，唔係同條鹹魚有咩分別?」Grace 講笑道。
我:「但衣個目標一定要係同人鬥或者同自己鬥?」
「唔一定，所以我咪話每個人個價值觀或者生活態度都唔同囉，衣d野無分對或錯嘅。我唔會話你唔岩或者有問題，只係大家有各自嘅追求，所以我先話大家唔係同一條線上。事實上你衣家好似都過得唔錯呀~ 」Grace耐心解釋道。
「哈，託你嘅福，我其實都改變左好多…」我帶住少少苦笑咁講。
Grace:「係Disco見到你，加上你岩岩嘅表現，我都感受得到嘅…」
「岩岩嘅表現? 係咪比以前勁左好多?」我有d自滿又有少少心虛咁問。
Grace:「係比以前進步左唔少~」
「咁會唔會考慮同返我一齊?」下意識無經大腦我就問左出口，或者衣個其實仲係我心底入面一直嘅願望啦。
「哈，咁你又太高估自己。我唔會因為你床上表現同返你一齊囉，不過間中搵你陪下我都ok嘅~ 正如頭先所講，我間中都想relax下。」Grace笑住咁擰頭。
「咁就等我再幫你relax下啦~」聽佢拒絕我都預左，所以都無咩hard feeling，只係佢一講完我又有衝動再次撲左上佢度，種感覺就好似電影入面果種我得唔到你個人都要得到你個身咁。
「估唔到衣個世界我會咁同Grace重遇返仲成為左SP衣種關係…」天上嘅我忍唔住講。
貓仙人:「衣個世界有好多野都係你地估唔到，所以你地唔係有句野叫”nothing is impossible”又或者”never say never”咩?」
「估唔到你作為仙人都咁留意衣個世界我地d用詞喎…」我真心覺得貓仙人識好多我地平時講嘅語句。
貓仙人:「哈，成日睇你地嘅故事，想學唔到都難啦…」
「嗯…」其實我心入面諗嘅係對方一定同龍珠入面嘅貓仙人一樣平時無野做就係花梨塔睇下人間發生嘅事，不過驚又惹起佢不快所以就無講出口。
不過其實除左同Grace有機會再續前緣外，仲有樣野令我有d釋懷但又有d surprise嘅係我總算有機會親耳聽到佢講返當年我地分手嘅原因，同埋知道佢分手後經歷過d咩。係我嘅世界，分左手段時間後或者覺得我太煩，又或者想我快d死心，所以Grace係完全斷絕晒同我嘅聯絡渠道仲block埋我facebook。我之後都只可以從其他同學口中大概知道佢以後嘅情況，就係最後同左個好有錢嘅男人結婚，仲生左兩個小朋友。衣個世界因為Jessica嘅出現，令我係未比佢block前就停止左對佢嘅騷擾，所以佢之後對我都無咁絕情。
就係咁，之後Grace同我就成為左SP嘅關係。坦白講，衣家嘅我對女仔理論上已經係百毒不侵。但如果話衣個世界仲會有人例外可以令我沉船或者控制唔到自己，咁Grace一定會係其中一個，因為佢始終係我當年一個遺憾同心結。
隨住衣家再一次嘅重遇以及大家身體上緊密嘅結合，確實勾起左我身體同情感上唔少嘅記憶，亦令我有時都會不禁會諗我地有無復合嘅可能。不過係了解到佢當年分手嘅原因，我好明白衣家嘅我應該係好難吸引到佢，除非我有野可以inspire到佢。但要inspire佢又談何容易? 大家嘅目標同價值觀都好唔同。我雖然都變左，但只係限於感情方面，對事業又好個人修養又好，我同以前其實都無太大分別，所以同佢keep住衣家嘅關係無問題，但要吸引到佢鍾意返我然後用個真心對待自己大家係返埋一齊，理性上分析應該無咩可能。
咁樣諗通左我又反而釋然，因為說穿了其實一切都係順其自然，無得強求。正如唔投入就唔會受到傷害，無期望亦唔會有失望。而且問心，衣家嘅Grace同我以前鍾意果個Grace，感覺都差天共地。衣次嘅重遇，反而真係令我釋懷左唔少。
就算再吻一次亦難避免 嘴邊只感受苦澀
遺憾是越努力捉緊這碎片 越難令它重現
就算再說一世的經典 這種感覺仍可改變
請不要再悼念從前 講分手不必講再見
「其實你有無諗過將來嘅野? 定抑或真係打算一世做player?」我記得有次完事後Grace一邊著衫一邊問我。
我:「我都唔知… 但你應該估到我點解會變成咁?」
Grace:「因為我?」
「嗯… 我唔想再受傷害，因為真係好痛… 好似衣家咁開心下又keep住換人唔會悶都幾好呀。」我向佢坦白自己嘅諗法。
Grace:「Sorry… 當年係我傷害左你，至於你嘅愛情觀我亦無咩資格比意見，不過我覺得人總有一日會想定落黎，因為除左生理需要外，人嘅心理上都會寂寞，而你衣家嘅態度到某一日可能只會令你越黎越失落。」
「咁你呢? 你將來又有咩打算?」衣個話題我知無對錯亦無答案，所以係唔需要爭拗只需要理解。我都想知Grace嘅諗法。
「我同你唔同，我唔係要做player亦唔怕受傷，只係現階段我想專注工作唔想拍拖，但同時間有時都想有人陪下我幫我減下壓，所以先會搵你，因為大家本身都咁親咁熟，唔駛再浪費時間去認識同了解得黎自己又容易接受，而且你嘅技術都真係唔錯… 不過當我事業去到搵個位，我就會轉focus開始向我下個人生目標進發架喇。」Grace亦坦白同我講。
「下個人生目標?」我問。
「嗯，搵個可靠嘅人組織家庭，然後我嘅心機就會轉移晒去我嘅小朋友度。」原來Grace下一個人生目標都同一般女仔一樣。
「轉變咁大?而且一定搵到架?」我有少少愕然。
「就好似你打爆左一隻game，自然會搵另一隻game玩咁咋嘛~ 以我嘅條件搵個可付託終生嘅人唔難呀~」Grace好有自信咁講。
「但你唔可以擔保到佢會一直對你好同唔會偷食。」我問。
「你覺得愛情真係有得guarantee一世專一?」Grace反問。
「我係咁諗就唔會選擇衣條路啦。」我反答。
「咁唔去強求咪得囉~佢偷食係正常，專一就當bonus。只要佢本性唔差，有經濟能力，對我同d仔女好，咁就已經夠。當然如果佢真係偷食，我會有方法令佢因為內疚而對我更好。」Grace略帶高深咁講。
「所以你接受到你另一半偷食? 咁你又話同你個師兄分手係因為佢偷食?」對於Grace嘅答案我有d不解。
「偷食都要識尊重我… 而且果陣佢除左偷食，對我嘅魅力已經越黎越低，所以慢慢感覺都無埋。」Grace有少少黯然咁講。