那些被錯過的人: 糯米糍
阿悠提過佢嚟係要買花，以我所知，舊邨得一間花店。
就喺街市對出，一個隱蔽嘅角落。
沿路我好注意四周，睇吓會唔會見到佢。行咗十分鐘，我已經去到花店。
「你好呀，想買咩花呀？」
「唔好意思，頭先有冇一個女仔嚟買過花？」
「有呀，個靚女走咗無耐。」
老闆娘一見到我就跑出嚟，而我相信佢講嘅靚女就係阿悠。
「佢向邊個方向走咖？」
老闆娘指一指巴士站嘅方向，我就拔足向巴士站方向進發。
去到巴士站，我見到佢坐喺婆婆賣糯米糍嘅石壆上。
「悠！終於搵到你喇。」
「乜你仲係度？」
阿悠雙眼紅腫，明顯啱啱喊完嚟。
「婆婆叫住你，你做咩走咗去呀？」
「佢係咪咩都同你講哂！」阿悠好兇咁望住我。
「我知你哋係婆孫關係囉。」
之後阿悠將頭先婆婆講嘅說話重覆咗一次，係語言之間聽得出，其實阿悠好錫婆婆，只係擔心婆婆一個人擺檔辛苦。
我都將婆婆講嘅說話，完封不動講返俾佢聽。
「原來佢一個人喺屋企會寂寞。。」阿悠耷低頭。
「你多啲過嚟陪婆婆囉，舊邨又唔係遠。」
「但係。。」
「最多我得閒就陪你過嚟啦。」
「好！你話咖！」
阿悠講完之後，露出一個大大嘅笑容。
我哋坐咗喺度食糯米糍，佢就一路講同公公婆婆嘅往事。
舊村係阿悠長大嘅地方，佢由細到大都係公公婆婆照顧。
公公婆婆平日都會帶埋佢嚟開檔，佢就係呢個公園跑嚟跑去。
『婆婆！又帶個孫女出嚟呀！』
『係呀，佢好乖咖！』
『五。。五五。。』
『妹妹你講咩呀？』
『係囉，悠悠你想講咩呀？』
『五。五。。五蚊！』
『哇，咁細個就識做生意啦？好喇咁姨姨要三粒喇！』
『多謝多謝。』
『悠悠，學識寫字之後幫我同婆婆，寫五蚊三粒糯米糍好冇？』
『公公，好！』
「呢個公園佈滿你腳毛喎。」
「腳印呀！腳毛。我都無毛。」
「唔好拉起！唔睇！」
阿悠拉起條裙俾我睇，我即刻按住佢隻手阻止佢。
「你都摸過啦，怕咩？」
「喂！」
食完糯米糍之後，我哋就準備坐車回程。
阿悠將啱啱買嗰支花，放喺石壆上面，然後雙手合十。
「你做咩呀？」
「公公好鍾意坐呢個位咖。」阿悠合埋雙眼回答。
「但你就咁放支花喺度？」
「得啦有人會拎走，我哋走啦。」
阿悠轉身行向巴士站，我尾隨其後。
行咗幾步我向左望，發現婆婆企係不遠處，我見到之後笑咗一笑，左手向婆婆比咗個OK手勢。
而婆婆都笑住向我揮手。
續