那些被錯過的人: 舊邨

「係喎，其實你去舊邨做咩？」

「想買花探爺爺。」

「哦。你陪我買糯米糍先啦。」

「都話無賣囉，你又唔信。」

「你又知？行喇！」





雖然阿悠好堅持，不過我冇理佢，拉住佢個袋行，佢最後都死死氣跟住我。

我哋穿過巴士站，行到屋村中間嘅公園，一個好熟悉嘅畫面出現咗。

一個婆婆坐喺公園石壆，前面有架手推車，手推車上面有個膠箱。

膠箱面有一塊泛黃嘅發泡膠，上面寫住「大大粒糯米糍 5蚊3粒」。

啲字好明顯係一個啱啱學識寫字嘅小朋友寫嘅，雖然婆婆喺度，但就唔見爺爺嘅身影。

「喂！我都話喺度啦！」

「婆婆！好耐冇見！」我跑過去同婆婆打招呼。

「後生仔！係咪買糯米糍呀？」

「係呀，俾3粒我呀。」

我望一望膠箱裡面，剩返五粒糯米糍。

「哇！好好生意喎婆婆，賣剩五粒！」

「唔係喇，我今日整咗好少咋！」

婆婆眯起雙眼笑住答我，成個額頭都係皺紋。

「係呀？咦？爺爺呢？」

「爺爺。。佢喺屋企呀。」

我左望右望都唔見爺爺身影，而婆婆呢刻收起咗笑容，緩緩咁回答我。

「你做咩呀？！」

「吓？我。。我買糯米糍嘛。」





阿悠向住我大叫，我俾佢嚇親，同時見到佢急步行過嚟。

「我問你點解喺度呀！」

「悠悠？點解你過咗嚟嘅？」

原來阿悠唔係同我講嘢，佢企喺我隔離，望住糯米糍婆婆。

「喂，唔好咁大聲。。」

「林俊杰你收聲！我唔係同你講緊嘢！」

「啊，你唔好咁大聲同同學仔講嘢啦。」





「我叫過你以後都唔準出嚟擺檔咖嘛！」

婆婆捉住阿悠隻手，但阿悠手一揮就揚開咗婆婆隻手。

「啊！」

婆婆雙手俾佢揮開，企唔穩向後退後咗一步，我即刻行過去扶住婆婆。

「知喇知喇，我唔擺喇，走啦，唔好嬲喇。。」

婆婆扶住我隻手，望住阿悠。但阿悠依然好嬲，雙頰已經紅哂，佢無講任何說話，轉身走咗。

「悠悠！悠悠！」

「婆婆你坐低先。」

​婆婆想叫停阿悠但唔成功，我就扶婆婆去石壆坐低。

「你識阿悠咖？」

「佢係我孫呀，不過。。」婆婆欲言又止。

「你係佢男朋友仔呀？」

「唔係呀，我係佢朋友，佢叫我陪佢買花喎。」

「朋友。。哈哈，個傻妹竟然識到朋友。」

「點解係竟然呀？」

「佢都唔識同人溝通嘅，細細個已經係咁。小朋友搵佢玩，剩係喱喺我哋後面，返學仲打同學仔添呀。」

婆婆聽到之後好開心，不過呢個世界真係細，糯米糍婆婆竟然係阿悠親人。

婆婆捉住我隻手，好詳細咁講阿悠嘅往事我聽。

「唉。。佢公公八月走咗，佢喊得幾凄凉，之後佢就唔俾我出嚟擺檔喇。」

原來發生過呢件事，平日返學真係睇唔出佢有唔開心，唔怪得之，佢見到婆婆會咁大反應啦。

「我本身都無諗住出嚟擺檔，但屋企得我一個人，有時突然諗起個衰佬，隻手就忍唔住整糯米糍喇，哈哈。」

婆婆雖然笑住，但睇到佢眼裡面有淚光。

「婆婆你返去先，放心我幫你去搵悠悠。」

「真係？啊！呢兩舊糯米糍你拎埋去，悠悠佢好鍾意食咖。」

婆婆入起最後兩粒糯米糍，雙手遞俾我。我接過之後，就出發去搵阿悠。


續