連環輪回不幸事件: 最終章：待續 (2)

「我哋都知，兩個鐘後就會自動瞓著然後輪回。」Magnus道。
「...你咁講係乜意思？」Bosco似乎聽出弦外之音。
「既然你哋會主動搵我，我估你哋同我一樣，頭先都係身處喺幻覺入邊面。」得到我哋點頭回應之後，Andy續道：「喺幻覺入面大概兩日，我開始發覺嗰度並唔係我原本嘅世界，於是我喺入面慢慢檢查，點知慢慢咁又再失去自我，好彩得你哋。不過正因為咁，我多咗好多時間調查，俾我發現咗兩樣嘢：第一，一開始我哋所做嗰個同MR有關嘅實驗，其實佢所做嘅係催眠實驗。」
「催眠實驗？」迪迪問。
「佢本身係一間治療失憶嘅醫學中心，但唔知點解，佢向我哋進行逆向催眠，根據我調查所得，催眠最有可能喺我哋下次輪回嘅時候生效，我哋好有可能會唔記得曬所有嘢，包括陀錶。」
「簡單嚟講，即係我哋再冇下次輪回嘅機會？」黑仔作唔肯定嘅結論。
「至少我係咁覺得。」
「咁第二個發現呢？唔好又話其實係冇第二個發現喎！」我借機串下Andy。
「哈，第二係關於林革東。」Andy望向Bosco。
「關於我?」




「喺我嘅幻覺入面，這隻陀錶就係你發明嘅。」
納尼！在場所有人都異常震驚。
「Bosco，你係咪知道陀錶嘅使用方法？」阿寶帶有質疑嘅語氣問出所有人都有嘅疑問。
大家都望向Bosco。
 
「雖然我有印象，幻覺入面嘅我係發明家，但我真係唔知，如果我知一早就同大家講咗啦！」
「我點解要信你？」阿寶繼續追問。
「我有乜理由要呃大家？」Bosco反問。
「我唔知，但正因爲我唔知，所以先唔可以咁易信你。」
「我信Bosco喎！話曬我哋都叫做經歷生死，生死之交都唔信，信邊個？」Billy道。




「同埋你都係信Andy先會質疑Bosco，咁點解你又會信Andy？」黑仔反質問。
阿寶一時無語。睇嚟阿寶嘅疑心仲係好重。
「好啦，有懷疑都係好事，不過我哋先將重點放番起陀錶先。不論我知唔知使用方法，你哋都係唔知點用，所以不如諗下冇得再輪回嘅情況下，點先可以知道點用陀錶突破輪迴啦。利申，逼我供都冇用，我真係唔知。」Bosco道。
可惜大家仍然係一頭霧水，打破呢個悶局嘅係黑客嘅聯絡。
於是我哋再出發，去到黑客所住嘅地址。
就係咁，我哋不停重複住冇意義嘅討論，黑客嘅聯絡，Yoyo嘅表演；雖然最重要嘅問題仲未解決，但好彩黑客工作嘅速度比我哋想象中快，趕得切叫醒全部人。
最後一位係SK。
我哋一邊同啱啱醒返嘅人交代呢個期間嘅事，一邊行去SK屋企附近嘅荃灣海濱公園。到達公園嘅時候，時間已經過咗十一點。
「即係而家要知隻陀錶點用？」SK問。
「係呀！」眾人回應。




「知道點用，之後就跟住做，我哋就可以返番現實，返番正常嘅生活？」SK續問。
「嗯！」眾人回應。
「咁易啦，我識用呀。」SK道。
時間剩返唔夠一個鐘。