連環輪回不幸事件: 第七章：陰謀 (2)

呢件事我都係事後先知。後到幾時？咁就係另一個故事啦！
時間要追溯返去Eric今朝放工嘅時候。冇錯，當我哋啱啱起身嘅時候，Eric啱啱放工。返shift嘅佢，每次輪回醒返嘅瞬間，就係佢返shift期間偷懶瞓著，之後醒返嘅嗰個瞬間。
最初黑仔睥住我，唔係因爲我太大聲，而係因為佢有印象見過我，我哋當嗰次係第一次輪迴。
當我真係相信我係輪迴緊嘅時候，應該就係第二次嘅輪回。而Eric已經發覺Christopher有異樣，直覺話佢知Christopher都發現咗輪回嘅事實，但佢就要扮乜都唔察覺咁。最初都有諗過佢只係單純太驚，唔想相信呢個係現實，但總係覺得有啲可疑，於是第三次輪回，亦即係大眼美女冇拎陀錶嘅個一次，Eric就提早收工，去到美孚，搵到拎陀錶嘅攤檔附近埋伏，睇下有冇咩發現。
本身並無任何期望，點知喺比以往上車時間早兩個鐘，竟然真係俾佢見到Christopher出現喺附近，於是就決定跟蹤佢。整個過程主要係美孚、長沙灣、荃灣三個地方嘅探索之旅。Eric估計佢係喺第一次輪回打聽到大部份人喺係荃灣上車，加上自己上車嘅美孚以及Stella上車嘅長沙灣，佢大致上就鎖定在這三個地方。
首先好快佢就去到美孚個攤檔，調查完一輪就搭的士去到長沙灣，由於Eric要尾隨佢，冇辦法可以檢查個攤檔。去到長沙灣，佢就喺逐個出口附近搵攤檔，以長沙環嘅地理環境嚟講，佢唔算花上太多時間就搵到呢個攤檔，同樣調查一番之後佢就搭的士入荃灣。去到荃灣，佢以同樣手法搵攤檔，雖然花嘅時間比較耐，但最終都俾佢搵到一個攤檔。好快咁調查完，佢上咗的士，應該就係去返美孚，然後扮冇嘢咁如常上車。而Eric就因為時間關係冇繼續跟住佢，只係留返喺荃灣，拎埋隻陀錶就夠鐘上車。
 
嚟到第四次嘅輪回，即係我哋12人落車進行調查嘅嗰一次。Eric同樣提早收工埋伏Christopher，果然喺差唔多嘅時間再次見到佢。唔同嘅係佢今次冇再周圍去調查唔同嘅攤檔，反而係喺攤檔附近周圍行。行咗一段時間，Eric都估唔到佢嘅意圖，於是佢決定去攤檔調查，睇下之前Christopher究竟發現到啲乜。
相信唔使我多講，大家都知道佢哋發現咗啲咩。雖然並冇睇曬同我哋一樣嘅四個線索，但Eric同Christopher大致上得出結論同我哋都係一樣。
Eric睇到線索後，好似意識到Christopher嚟緊想做嘅事，於是追查翻佢嘅行蹤，繼續跟蹤佢。




喺美孚個攤度附近行多左一陣，之後Christopher就搭的士去左葵興，然後同之前一樣，喺不同嘅出口附近搵陀錶攤檔，然後進行調查；跟住再去荃灣，搵埋之前遺留咗嘅另一個攤檔，最後一樣都係返番去美孚上車。Eric喺佢離開左荃灣後亦趁機調查，所以除咗長沙灣，其餘三個線索都已經睇過。
去到呢一刻，Christopher已經睇過曬四個線索，亦親眼見到冇拎陀錶嘅人，最終喺車上面嘅慘況，於是一個冇人性嘅計劃就此誕生！
而實行嘅時間就係呢一次嘅輪回，第五次輪回。