連環輪回不幸事件: 第七章：陰謀 (1)

whatsapp group因為呢個問題忽然變得活躍，我隨即將呢條救命稻草，喺呢個whatsapp group度同大家講，睇下仲有冇人遇到類似嘅情況，同埋佢哋覺得應該點做。
本來已經冇曬線索，冇曬希望，突然發現只有呢個利迷喺俾隻陀錶我之前，似乎想同我講啲嘢，呢個會唔會成為我哋嘅新希望呢？如果知道佢想講乜，會唔會可以打破呢個死局，一切回復正常呢？
討論嘅結果係只有我遇到呢個情況，而大家雖然討論咗好耐，亦有建議再去搵利迷，但葵興組嘅人已經搵唔到利迷，估計係因為太夜已經走咗，無計可施之下，最後大部分人都建議不如嘗試返屋企，睇下聽日會變成點先算，可能真係可以好似Kiki咁講。而喺討論之下，大家都建議點都先上咗地鐵先，始終冇人確保到每次輪回後都可以保留記憶，喺地鐵集合最穩陣。
雖然我覺得唔會咁樣就完結，但無計可施之下，唯有照大隊嘅意見返屋企休息下，或者聽朝一醒會發覺真係一場夢都唔定。
返到屋企，我如常喺瞓覺前撳下電話。嗯，或者唔算如常，只係扮如常咁做平時會做嘅嘢。雙眼冇焦點咁望住部手機嘅時候，whatsapp再次響起：
Dennis「我同Stella聽日唔會再拎隻錶，亦唔會上地鐵，你哋都唔使搵我哋」11:58 PM
瞬間group內多數人都勸佢要諗清楚，唔好咁衝動。正當我想附和大家嘅時候，「佢」又嚟喇……
 
「如果我有逆轉的超能力……」我明明熄咗鬧鐘，不過一瞓醒都係聽到鬧鐘聲，睇黎我又返到呢一日。
喺地鐵站前撞到迪迪，但我哋都冇咩好講，可能係前一晚喺「被瞓著」之前，Dennis講嘅嘢令我哋唔知點應對。係，係被瞓著，即使唔眼瞓都好，一到咗12點，我哋都會好似打咗麻醉針咁突然瞓著， 然後一瞓醒，又輪回返黎呢一日。




雖然直至行到月台都一路無語，但一上車，我哋就同一時間問同一問題。
「點解佢會喺度嘅？」
仔細一望，除咗每次我哋上車都會見到嘅荃灣友之外，車上仲多咗個人，佢就係Christopher。正當我想問點解Christopher喺度之際，我發現氣氛好古怪，應該係話古怪都不足以形容。
車廂中間係Christopher、Eric同Billy三個人，佢哋就好似擂台上嘅三個人，互相對峙。而其他人有部分就神情凝重咁望住佢哋，應該話唔止望住，我覺得好似係包圍住佢哋咁；其餘嘅人就一副唔知發生緊咩事嘅樣企喺側邊。
車門關上。
「一早都估到你啦，而家穿曬，你放低隻錶都仲有可能當乜事都冇。」我未有時間發問就已經聽到Eric搶先一步。
「你以為我會咁天真咩？你望下周圍嘅人，佢哋都知道而家只能夠淨番一個人，根本冇一個人願意幫手，你哋只係懶有良知，唔敢殺人，其實你哋何嘗唔想好似我咁，我只係幫你哋做你哋想做嘅事！」Christopher反擊。
「你哋都同我收聲，Christopher你一早知道我哋只能夠淨返一人，處心積慮想害我哋，而Eric你就一早發覺佢有問題，但都冇出聲，你哋兩個都壞過凱婷！」Billy大叫。
佢哋究竟講啲咩？點解我一啲都聽唔明，究竟發生咗咩事，有冇人可以話我知？