連環輪回不幸事件: 第六章：調查 (3)

「我哋不如再交換地點搵多次？」Andy話雖如此，但睇得出佢都冇咩期望。
「你覺得有用咩？」Kiki道。
「冇用都要試架啦！」Billy道。
於是大家就再踏上呢個有盡嘅旅途，而盡頭係晚飯嘅時間。
「不如食飯先？而家都九點啦！」我向其餘三人提議。
今次仍然係TB，SK，Bosco同我一組，而探索嘅地點係長沙灣。我哋喺一無所獲嘅情況下去咗長沙灣一間幾出名嘅小菜館「萬發」醫肚。
萬發喺晚市時段會放好幾張枱凳喺行人路，而我哋就坐咗喺其中一張四人長方枱。
「要多三個靚仔，唔該。」我向伙記叫埋最後一樣野。
「呢度咪有三個靚仔囉。」SK依舊缺乏一種緊張感。
「哈哈哈，好好笑。」TB同時擺出一個敷衍嘅樣。




雖然對話依然日常，反應依舊不變，但氣氛就大有不同，同今朝喺荃灣搵到線索之後完全相反，睇黎大家同我都一樣冇咩希望。但我直覺話我知，我哋身處一個咁奇怪嘅世界，係咪真係可以好似電影咁，喺呢個世界不停搵到線索，然後追查到最後，之後搵出呢個世界嘅秘密，解開一切迷團，最後開開心心返番去原本嘅世界BBQ？
道理就好似我哋困咗喺監獄，仲妄想可以喺監獄裏面搵到鎖匙，之後自己開門去一樣，其實係冇咩可能，唯有靠監獄外嘅人幫手，只有出面嘅人有鎖匙，就唔使查呢樣搵嗰樣，可以直接救我哋，不過咪又係冇可能……
 
「搵唔到其他線索，唔通呢個就係唯一嘅真相？」我忍唔住問大家。
「如果呢個真係真相，呢個所謂嘅神究竟係想救我哋定害我哋？定還是呢個真係一個實驗？」SK道。
「又係你個實驗論，或者可能真係一個人性實驗啦。但真係會有人因為我哋靠自己推測出嚟嘅所謂真相而殺人咩？」我回覆SK之後，發現我唔小心令氣氛變得沉重，好彩有Bosco幫我打圓場。
「啱呀，呢個所謂真相根本可能係我哋誤解咗。又或者可能仲有其他線索未搵到，反正我哋有大把時間，係真正嘅大把時間，咪慢慢搵囉！」
「都係，唉...如果知道俾陀錶我嘅嗰個人講乜就好啦。」
「吓？」三人不約而同「吓」咗一聲。
「做乜咁驚訝？唔通你聽到俾陀錶你哋嘅嗰個人講乜？」




「佢...冇同我哋講嘢喎！」TB講完之後望望望其餘兩人，兩人都分別點頭。
突然之間，這條救命稻草出現喺我哋面前，反而唔係好識點反應。
呢個時候whatsapp突然響起，原來係Kiki喺group度問：如果一直咁樣落去我哋會唔會可以好似平時一樣繼續咁生活落去？
係喎，呢個咁簡單嘅問題我哋一直都冇人提出，其實會唔會係就咁冇事？可能我哋預到嘅怪事實在太多太怪，令我哋忽略咗呢樣嘢。