連環輪回不幸事件: 第六章：調查 (2)

「前後四個線索……睇黎都未算絕望。」Bosco喺我哋回程巴士上道。
「睇黎得我哋兩個咩都搵唔到。」SK以自嘲嘅語氣道。
「其實都係靠TB先搵到，佢成日都留意到d細微位。本身張紙係貼係枱底，佢都搵到。」Bosco道。
「梗係啦，哈哈。」TB笑道。
「woo，最叻係你。」我道。
「你咁認真讚我我會怕醜架，其實好少事啫，就算我搵唔到，你哋一齊再搵嗰時都會搵到。」
「梗係唔係啦，冇你我哋實收皮。」
「同意。」
「和議。」
「嗯嗯嗯，一定係咁啦。」




我哋不停笠TB高帽，佢就不停敷衍我哋，呢程車比起去嗰程感覺快好多，可能我哋心情輕鬆咗，好快就到咗m記。
「到咗啦？齊人我哋就開始研究我哋幾組搵到嘅四個線索啦。」Andy道。
「咁我哋先聽多次每個線索先。」黑仔之後就將每個線索一一讀出。
除咗我哋，另外三個線索分別係一張memo紙，一張圖畫，以及一份口供。
由長沙灣隊嘅Andy同Kiki搵到Memo內容係「正確的陀錶只有一隻。」
圖畫則係美孚隊嘅Billy，阿寶同黑仔搵到，係一幅畫咗一隻一時正嘅陀錶。
至於口供，係由葵興隊嘅迪迪，Magnus同Yoyo打聽到。當時係一個佢哋三個都冇睇過嘅人坐在喺攤檔，無論問佢乜，佢都只會指住一張寫住 「倒數緊」嘅紙。
 
「咩意思呢？」Yoyo問。
「四個線索會唔會有咩關係呢你哋估？」Magnus提出一個可取嘅思考方向。




「我覺得好有可能。」Bosco道。
「但暫時除咗係同陀錶有關之外都諗唔到有咩其他關係喎。」阿寶道。
之後大家七嘴八舌，但都冇咩進展。
「其實我覺得可以先從喺荃灣搵到嘅紙仔入手，表面睇同長沙灣嗰張memo差唔多意思，但如果係咁接近嘅意思點解要有兩張？」Kiki道。
「你意思係嗰四句有其他意思？」我問。
「嗯，可能啦。」Kiki道。
「戴曬頭盔喎。」SK道。
「咩呀，唔肯定梗係戴定頭盔好好保護自己㗎啦。」Kiki笑道。
之後大家陷入苦思，雖然有人提出過假設，但最後都被推翻。
「會唔會係根本冇其他意思？」Magnus道。




「屌，諗咗咁耐結果咩都冇。」Billy道。
「吖！」TB叫咗出聲。
「咩事呀？」數人同時問道。
「頭四個字！」TB指住我哋喺荃灣搵到嗰張紙仔。
「人生短暫？」Yoyo問。
「唔係呀，打直睇嘅頭四個字呀！」TB道。
「人一存只？即係點呀？」Yoyo再問。
「只存一人……」我細聲道。
大部分人由TB講「頭四個字」開始已經靜落黎，因為大家都明白箇中意思，而之後亦都冇人再出聲……打破呢個寂靜嘅係黑仔。
「或者其他線索有用呢。」
雖然大家冇乜心機，但都繼續係黑暗中尋找光線，可惜得到嘅仍然係黑暗。
我已經唔記得係邊個話長沙灣張memo係同荃灣嘅一樣意思，唔記得係邊個推斷「倒數緊」可能係指隻錶，亦唔記得係邊個留意到隻錶嘅時間有變動，只係記得最後係由我總結。
「一開始我以為係六點，其實佢所表達嘅係十八點，亦即係代表十八個人，而家時針指住五，即係十七點，代表十七個人，符合而家生存嘅人數……加埋美孚張圖，成件事根本好似同我哋講只能夠死淨一個……」