[微血腥] 覺能之戰 (逢二、四更新): 真相篇第四十一章: 解‧封(四)

「咁你知唔知有冇方法還原？」澈硯問

「還原呢⋯⋯就冇嘅！」鹿仔的回答令他們失望，可他短暫停頓過後，笑話：「舒緩都仲有方法嘅！」

「係？」詡雙眼發亮

「係，但就唔知對你有冇效喇！講真，對亞豪就效用唔大。」鹿仔續說

「唔好賣關子，直接講係咩！試咗先！」梓旻伸前身子





「但會力量少咗㗎喎！」鹿仔也靠近梓旻道，梓旻身體一震，對於力量會因而變弱，他有點猶豫

「你猶豫啲咩？變弱同死，你點揀？」詡問

「咁⋯⋯變弱囉⋯⋯」梓旻不情願的回答

「哈哈！一講變弱就猶豫，你太年輕喇！變強機會大把啦！」鹿仔靠回後道

「講啦！佢就算唔想知，我都想知！」澈硯急切的想知道答案





「答案就係⋯⋯求亞塵幫手！」鹿仔的答案令眾人失望

「咁我寧願死！」梓旻失望說

「咁我都唔想幫你！」此時亞塵突然走進來，令梓旻為之一驚，不敢說話。亞塵續說：「而且我都幫唔到你，你要等你家姐返嚟，佢會幫你。剝上衫，我要檢查A Mark！」

「咁就好喇！」詡高興說

「唔好得去邊，我都唔想求佢。」梓旻扁嘴道





「你家姐唔使你求都會做啦！唔好唔記得佢係一個只為屋企人，世界毁滅都唔介意嘅人。」澈硯記起與梓旻閒談間形容的月文是個怎樣的人

「你又幾清楚喎！佢已經趕緊返嚟，另外甘生一陣都會嚟想問你關於獨嘅嘢。」亞塵開始檢查梓旻的A Mark再道：「今次叫擴散得好大，好彩最外邊啡至淺啡嘅地方都比黑色多，應該可以舒緩好多。咩事搞到咁？」

「佢想保護我唔好俾人帶死。」詡有點歉疚道

「終於要承認戀情喇？」鹿仔開玩笑說

「你收聲啦！幫朋友係咁㗎啦！」梓旻怒言

就在此時，走廊傳來重重的腳步裡，走進來的果然是月文。她快步走到梓旻床邊，一手按著梓旻背部，強烈的痛感從背部最外圍傳來，超緩慢地向中央的位置收窄。梓旻不禁大叫起來，月文怒氣匆匆說：「冇檢查你身體有咩問題係我錯，但你都應該講我聽！」

「我⋯⋯唔⋯⋯我⋯⋯呀！」梓旻痛得不能說出完整句子

「我發誓亞塵幫我嘅時候冇咁痛。」鹿仔有點慌張





「或者你應該收聲去買啲補充體力嘅飲品俾佢。」亞塵命令道

「收到！」鹿仔就此離開

可能已適應，或已沒力氣再叫，梓旻上身趴在床上，安靜的看著面前的鐘，分鐘移動了一下，「舒緩」癒程終於完結。見梓旻沒有坐起來，詡立即上前幫忙，而澈硯則過於專注梓旻背上的A Mark變化，需詡提醒才懂上前幫忙。