[微血腥] 覺能之戰 (逢二、四更新): 真相篇第四十一章: 解‧封(三)

「亞旻！你醒喇？」睜開眼睛看到的是孔sir

「亞孔，我發生咩事？」梓旻嘗試從病床上撐起自己

「你太用力打班怪，雖然話發現李博士唧，有鈞靖係度就唔好太用力啦！你都知你……」孔sir說，梓旻已起床走到鏡子前

「你明我啦！見到殺死自己朋友嘅人，當然想親手報仇。」梓旻在鏡前把上衣脫下，查看自己的A Mark已不只是背上，已延伸到胸前

「好彩最終都殺死佢，如果你再繼續你嘅復仇之旅，鈞悅一定會發脾氣！」孔sir笑道





「而家終於可以安定，大家都唔使再練AP我諗，我都係時候叫佢專注返學業。」梓旻換上乾淨的衣服

「真係可惜，明明佢AP咁特別！」孔sir笑說

「世界和平喇！唔再係打打殺殺嘅時候！」梓旻打算離開時，眼前一暗，現實中被肆伍擊暈的他終醒來，第一眼看到的不是孔sir，而是煩人的澈硯

「你究竟要暈幾多次先死心？」澈硯問

「已經接近周期性昏迷！」鹿仔在側旁笑





「好彩我跑出去求救搵到陸楠咋！如果唔係，肆伍就要出盡力同你鬥打爆間訓練室！」詡笑說

「我都唔知點解會咁。我覺得……我好……我好興奮，可能因為力量大咗咁多，但係又打唔中佢地。幾大力量都打唔到令我好嬲我自己，嬲到完成控制唔到。」梓旻感困惑的道

「因為你A Mark，擴散之後就會咁，始終都係怪物化第一步。」鹿仔助梓旻坐起來

「你講……你講咩吓？」梓旻驚訝問，澈硯及詡二人也感震驚

「亞塵話你地一早知㗎喎！唔係咩？」鹿仔的表現過於平常令他們驚訝





「係……呀，我……我唔知你……呀？亞豪……」梓旻不敢肯定鹿仔知道他所知道的事

「如果A Mark擴散到盡就變成黑色怪物，亞豪都係咁死……」他望望澈硯，再望望梓旻：「你地唔使為佢嘅死內疚，可以由你地幫手解脫，佢一定好開心。」

「你一早知？」澈硯問：「唔同我地講？」

「同你地講，你地落到手咩？」鹿仔嘆氣：「不過拜託，KiKi唔知，唔好講佢聽。」

「要佢見證自己亞哥死會唔會太無情呢？」詡問

「無法啦！怪物係會誓死追同自己有血源關係嘅人，咁做先可以確保到佢留係入面。」鹿仔解釋

「佢唔知，咁你點知？」詡問

「失控過嘅人都有一啲特別課程要上，我同亞豪一早就被警告過。」鹿仔咬一咬唇：「居然咁死，實在太蠢。但你都見我當時有幾激動，當你情緒失控，力量都會失控，然後A Mark失控地擴大，最後你就真係變成怪物。」